30 വർഷത്തെ പൊതുപ്രവർത്തനത്തിന് ശേഷം കൺസർവേറ്റീവ് എംപി സ്കോട്ട് ഐച്ചിസൺ പാർലമെൻ്റ് അംഗത്വം രാജിവെക്കാൻ ഒരുങ്ങുന്നതായി റിപ്പോർട്ട്. ഒരു വർഷത്തിനുള്ളിൽ പിയേർ പൊളിയേവിന്റെ കോക്കസിൽ നിന്ന് പുറത്തുപോകുന്ന എട്ടാമത്തെ വ്യക്തിയാണ് സ്കോട്ട് ഐച്ചിസൺ. ഇതുസംബന്ധിച്ച ഔദ്യോഗിക പ്രഖ്യാപനം വരും ദിവസങ്ങളിൽ ഉണ്ടാകുമെന്ന് പ്രതീക്ഷിക്കുന്നു. രാജിവെക്കാനുള്ള തന്റെ തീരുമാനത്തെക്കുറിച്ച് ഐച്ചിസൺ കഴിഞ്ഞ ആഴ്ച തന്നെ പൊളിയേവിനെ അറിയിച്ചിരുന്നതായും റിപ്പോർട്ടുകളുണ്ട്.
2019 മുതൽ പാരി സൗണ്ട്-മസ്കോക്ക റൈഡിങിനെ പ്രതിനിധീകരിക്കുന്ന എംപിയാണ് ഐച്ചിസൺ. 2022-ൽ നടന്ന കൺസർവേറ്റീവ് പാർട്ടി നേതൃത്വത്തിലേക്കുള്ള മത്സരത്തിൽ പൊളിയേവിനോട് അദ്ദേഹം പരാജയപ്പെട്ടിരുന്നു. ഫെഡറൽ രാഷ്ട്രീയത്തിലേക്ക് വരുന്നതിന് മുൻപ്, 2014 മുതൽ 2019 വരെ ഹണ്ട്സ്വിൽ മേയറായും അദ്ദേഹം സേവനമനുഷ്ഠിച്ചിട്ടുണ്ട്.
കഴിഞ്ഞ ശരത്കാലം മുതൽ പൊളിയേവിന് ഏഴ് എംപിമാരെയും സ്വന്തം കൂടാരത്തിൽ നിന്നും നഷ്ടമായിട്ടുണ്ട്. ക്രിസ് ഡി’എൻട്രെമോണ്ട്, മൈക്കൽ മാ, മാറ്റ് ജെനെറോക്സ്, മെർലിൻ ഗ്ലാഡു എന്നിവർ ലിബറൽ പാർട്ടിയിലേക്ക് കൂറുമാറിയപ്പോൾ, റിച്ചാർഡ് മാർടെൽ സെനറ്റ് നിയമനം സ്വീകരിച്ച് പാർലമെൻ്റ് വിട്ടു. അതേസമയം, ലാറി ബ്രോക്കും കാത്തി വാഗൻ്റാലും അടുത്തിടെ ഫെഡറൽ രാഷ്ട്രീയത്തിൽ നിന്ന് പിന്മാറുകയും ചെയ്തു.
അഭിപ്രായ വോട്ടെടുപ്പുകളിലും കൺസർവേറ്റീവുകൾ പിന്നിലാണ്. ഏറ്റവും പുതിയ ‘നാനോസ് റിസർച്ച്’ കണക്കുകൾ പ്രകാരം ലിബറൽ പാർട്ടിക്ക് 49.9 ശതമാനവും കൺസർവേറ്റീവ് പാർട്ടിക്ക് 27.9 ശതമാനവുമാണ് ജനപിന്തുണയുള്ളത്. പോയിലിവറിന് 19.6 ശതമാനം പിന്തുണയുള്ളപ്പോൾ, 61.5 ശതമാനം കനേഡിയൻമാരും മാർക്ക് കാർണിയെയാണ് പ്രധാനമന്ത്രി സ്ഥാനത്തേക്ക് കൂടുതൽ ഇഷ്ടപ്പെടുന്നതെന്നും അതേ സർവേ വ്യക്തമാക്കുന്നു.
