കാനഡയിൽ കുട്ടികൾക്കെതിരായ ഓൺലൈൻ കുറ്റകൃത്യങ്ങൾ ഓരോ വർഷവും വർധിച്ചുവരികയാണെന്ന് സാമ്പത്തിക കുറ്റകൃത്യ നിരീക്ഷണ ഏജൻസി (Financial Crime Watchdog) . കേസുകളുടെ എണ്ണത്തിലും അക്രമത്തിൻ്റെ തീവ്രതയിലും വർദ്ധനവുണ്ടായതായി ഏജൻസി വ്യക്തമാക്കി. ചൈന, ജപ്പാൻ തുടങ്ങിയ രാജ്യങ്ങളിൽ നിന്ന് ഇറക്കുമതി ചെയ്യുന്ന ശിശുരൂപത്തിലുള്ള സെക്സ് പാവകൾ ആശങ്കയുളവാക്കുന്ന ഒരു പുതിയ പ്രവണതയാണെന്നും ഏജൻസി മുന്നറിയിപ്പ് നൽകുന്നു.
ഈ കുറ്റകൃത്യങ്ങളുമായി ബന്ധപ്പെട്ട കള്ളപ്പണം വെളുപ്പിക്കൽ തടയാൻ സഹായിക്കണമെന്ന് ആവശ്യപ്പെട്ട് FINTRAC (Financial Transactions and Reports Analysis Centre of Canada) ബാങ്കുകൾക്കും മറ്റ് ബിസിനസ്സുകൾക്കും ഒരു മുന്നറിയിപ്പ് നൽകിയിട്ടുണ്ട്. കുട്ടികളെ ലക്ഷ്യമിട്ടുള്ള ലൈംഗിക ഭീഷണിപ്പെടുത്തൽ കേസുകളും വർധിക്കുന്നുണ്ടെന്നും ഇവ പലപ്പോഴും സംഘടിത കുറ്റകൃത്യങ്ങളുമായി ബന്ധപ്പെട്ടിരിക്കുന്നു എന്നും നിരീക്ഷണ ഏജൻസി ചൂണ്ടിക്കാട്ടി.
ഇത്തരം ഭീഷണികളെ നേരിടാൻ നടപടി ശക്തമാക്കുമെന്ന് ഫെഡറൽ സർക്കാർ അറിയിച്ചു. തട്ടിപ്പുകൾ, കള്ളപ്പണം വെളുപ്പിക്കൽ, സാമ്പത്തിക തട്ടിപ്പ് എന്നിവ ചെറുക്കുന്നതിനായി പുതിയൊരു സാമ്പത്തിക കുറ്റകൃത്യ ഏജൻസി രൂപീകരിക്കാൻ സർക്കാർ പദ്ധതിയിടുന്നുണ്ട്. കുട്ടികൾക്കെതിരായ ഓൺലൈൻ കുറ്റകൃത്യങ്ങൾക്കുള്ള ശിക്ഷകൾ വർദ്ധിപ്പിക്കുന്നതിനായി പുതിയ നിയമങ്ങൾ തയ്യാറാക്കും. തട്ടിപ്പുകൾ പിടികൂടുന്നതിൽ ബാങ്കുകൾ കൂടുതൽ ശക്തമായ പങ്ക് വഹിക്കണമെന്ന് നിഷ്കർഷിക്കുന്ന പുതിയ നിയമവും പരിഗണനയിലുണ്ട് .
കാനഡയുടെ 2026-ലെ ഫെഡറൽ ആദായനികുതി നിരക്കുകൾ പ്രഖ്യാപിച്ചു. ഇതനുസരിച്ച് മിക്ക കനേഡിയൻ പൗരന്മാർക്കും വരുമാന പരിധിയിൽ നേരിയ വർദ്ധനവുണ്ടാകും. നികുതി നിരക്കുകൾക്ക് മാറ്റമില്ലെങ്കിലും, ഓരോ ബ്രാക്കറ്റിലെയും വരുമാന പരിധികൾ പണപ്പെരുപ്പത്തിന് അനുസരിച്ച് ക്രമീകരിച്ചിട്ടുണ്ട്.
ഇതനുസരിച്ച് ഏറ്റവും കുറഞ്ഞ ഫെഡറൽ നികുതി നിരക്ക് 14% ആണ്. ഏകദേശം $58,500 വരെ വരുമാനം ഉള്ളവർക്കാണ് ഇത് ബാധകമാവുക. $117,000 വരെയുള്ള വരുമാനത്തിന് 20.5% നിരക്കിൽ നികുതി ചുമത്തും. $117,000-നും $181,000-നും ഇടയിലുള്ള വരുമാനത്തിന് 26 ശതമാനവും $181,000 മുതൽ $258,000 വരെയുള്ളതിന് 29 ശതമാനവുമാണ് നികുതി. $258,000-ന് മുകളിലുള്ള ഏത് വരുമാനത്തിനും 33% നികുതി ചുമത്തും.
ജൂലൈ മാസത്തിൽ, കാനഡ ഏറ്റവും കുറഞ്ഞ വ്യക്തിഗത ആദായനികുതി നിരക്ക് 15 ശതമാനത്തിൽ നിന്ന് 14 ശതമാനമായി കുറച്ചിരുന്നു. ഈ മാറ്റം 2026-ലെ നികുതി ബ്രാക്കറ്റുകളിൽ പ്രതിഫലിച്ചിട്ടുണ്ട്. മധ്യവർഗ്ഗക്കാരെ ഉദ്ദേശിച്ചാണ് ഈ നികുതിയിളവ് . ഇതനുസരിച്ച് 2026-ൽ കാനഡയിലെ ഓരോരുത്തർക്കും $420 വരെ നികുതിയിളവ് ലഭിക്കും.
2025/2026 നികുതി വർഷം മുതൽ ആരംഭിക്കുന്ന അഞ്ച് വർഷത്തിനിടെ കനേഡിയൻ പൗരന്മാർക്ക് $27 ബില്യൺ ഡോളറിലധികം നികുതിയിനത്തിൽ ലാഭമുണ്ടാക്കാൻ ഇത് വഴിയൊരുക്കും. കാനഡ റെവന്യൂ ഏജൻസിയുടെ (CRA) പണപ്പെരുപ്പ ക്രമീകരണം, ജിഎസ്ടി ക്രെഡിറ്റ് , കാനഡ ചൈൽഡ് ബെനഫിറ്റ് , ചൈൽഡ് ഡിസെബിലിറ്റി ബെനഫിറ്റ് പോലുള്ള ആനുകൂല്യങ്ങളുടെ തുകയും വർദ്ധിപ്പിക്കും. ഈ വർദ്ധിച്ച ആനുകൂല്യങ്ങൾ 2026 ജൂലൈ 1 മുതൽ പ്രാബല്യത്തിൽ വരും.
വാഷിംഗ്ടൺ: വാഷിംഗ്ടൺ ഡി.സി.യിൽ രണ്ട് നാഷണൽ ഗാർഡ് അംഗങ്ങൾക്ക് വെടിയേറ്റ സംഭവത്തെത്തുടർന്ന്, ‘രാജ്യത്തിന് ആശങ്കയുള്ള’ രാജ്യങ്ങളിൽ നിന്നുള്ള എല്ലാ കുടിയേറ്റക്കാരുടെയും ഗ്രീൻ കാർഡുകൾ പൂർണ്ണമായി, കർശനമായി പുനഃപരിശോധിക്കാൻ ട്രംപ് ഭരണകൂടം ഉത്തരവിട്ടു. പ്രസിഡന്റ് ട്രംപിന്റെ നിർദ്ദേശപ്രകാരമാണ് യു.എസ്. പൗരത്വ-കുടിയേറ്റ സേവന വിഭാഗം ഈ ഉത്തരവിറക്കിയത്. അഫ്ഗാനിസ്ഥാൻ, ക്യൂബ, ഹെയ്തി, ഇറാൻ, സോമാലിയ, ലിബിയ, സുഡാൻ, യെമൻ, വെനിസ്വേല ഉൾപ്പെടെ 19 രാജ്യങ്ങളാണ് ‘രാജ്യത്തിന് ആശങ്കയുള്ള’ ലിസ്റ്റിൽ ഉള്ളതെന്ന് അധികൃതർ സൂചിപ്പിച്ചു.
ബുധനാഴ്ച വൈറ്റ്ഹൗസിനടുത്ത് നടന്ന വെടിവെപ്പിൽ വെസ്റ്റ് വിർജീനിയ നാഷണൽ ഗാർഡിലെ ആർമി സ്പെഷ്യലിസ്റ്റ് സാറാ ബെക്സ്ട്രോം, എയർഫോഴ്സ് സ്റ്റാഫ് സർജന്റ് ആൻഡ്രൂ വോൾഫ് എന്നിവർക്ക് ഗുരുതരമായി പരിക്കേറ്റിരുന്നു. സംഭവത്തിൽ അറസ്റ്റിലായ പ്രതി അഫ്ഗാൻ പൗരനായ റഹ്‌മാനുള്ള ലകൻവാൾ ആണ്. 2021-ൽ ‘ഓപ്പറേഷൻ അല്ലൈസ് വെൽക്കം’ എന്ന ബൈഡൻ കാലഘട്ടത്തിലെ പ്രോഗ്രാമിലൂടെയാണ് ഇയാൾ യു.എസിൽ എത്തിയത്. ഇയാളുടെ അഭയ അപേക്ഷ ഈ വർഷം ട്രംപ് ഭരണകാലത്ത് അനുവദിച്ചതാണ്. ലകൻവാൾ സി.ഐ.എ.യുമായി അഫ്ഗാനിസ്ഥാനിൽ സഹകരിച്ച് പ്രവർത്തിച്ചിരുന്നതായി സ്ഥിരീകരിച്ചിട്ടുണ്ട്.
ബൈഡൻ ഭരണകൂടത്തിൽ അംഗീകരിച്ച എല്ലാ അഭയ കേസുകളും ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS) ഇപ്പോൾ അവലോകനം ചെയ്യുന്നുണ്ട്. അഫ്ഗാൻ പൗരന്മാരിൽ നിന്നുള്ള എല്ലാ കുടിയേറ്റ അപേക്ഷകളും താൽക്കാലികമായി നിർത്തിവച്ചിട്ടുണ്ട്. സംഭവത്തെ ‘തിന്മയുടെയും വെറുപ്പിന്റെയും ഭീകരതയുടെയും പ്രവൃത്തി’ എന്ന് വിശേഷിപ്പിച്ച ട്രംപ്, രാജ്യത്ത് തുടരാൻ അർഹതയില്ലാത്തവരെ പുറത്താക്കാൻ വേണ്ട നടപടികൾ സ്വീകരിക്കുമെന്ന് പ്രതിജ്ഞയെടുത്തു.
ടെക്സസ്: രണ്ട് യുവതികളെ നിർബന്ധിത വേശ്യാവൃത്തിക്കായി ഹൂസ്റ്റണിൽനിന്ന് റൗണ്ട് റോക്കിലേക്ക് കൊണ്ടുവന്ന കേസിൽ ഒരാൾ അറസ്റ്റിലായി. നവംബർ 26-ന് റൗണ്ട് റോക്കിലെ ഒരു വീട്ടിൽ മനുഷ്യക്കടത്തിന് സാധ്യതയുണ്ടെന്ന് പോലീസിന് രഹസ്യവിവരം ലഭിച്ചു. ഒരു ബന്ധുവിനെ നിർബന്ധിച്ച് ലൈംഗികവൃത്തിയിൽ ഏർപ്പെടുത്തുകയാണെന്നും പുറത്തുപോകാൻ അനുവദിക്കുന്നില്ലെന്നും കോൾ ചെയ്തയാൾ പോലീസിനെ അറിയിച്ചു.
സ്ഥലത്തെത്തിയ പോലീസ് 39 വയസ്സുള്ള ബ്രാൻഡൻ വില്യംസിനെയും (Brandon Williams) ഹൂസ്റ്റൺ സ്വദേശികളായ 20 വയസ്സുള്ള രണ്ട് യുവതികളെയും കണ്ടെത്തി. വേശ്യാവൃത്തിക്കായി വില്യംസ് തങ്ങളെ ഹൂസ്റ്റണിൽ നിന്ന് കൊണ്ടുവന്നതാണെന്നും പോകാൻ അനുവദിക്കുന്നില്ലെന്നും യുവതികളിൽ ഒരാൾ പോലീസിനോട് പറഞ്ഞു. വില്യംസിന്റെ കൈവശം തോക്കും കണ്ടെത്തി.
നിർബന്ധിത വേശ്യാവൃത്തി (Compelling Prostitution) ചുമത്തി വില്യംസിനെ പോലീസ് അറസ്റ്റ് ചെയ്തു. രക്ഷപ്പെടുത്തിയ യുവതികൾക്ക് ആവശ്യമായ പിന്തുണയും സഹായങ്ങളും പോലീസ് നൽകി വരുന്നു. മനുഷ്യക്കടത്തുമായി ബന്ധപ്പെട്ട സഹായങ്ങൾക്കോ വിവരങ്ങൾക്കോ വേണ്ടി നാഷണൽ ഹ്യൂമൻ ട്രാഫിക്കിംഗ് ഹോട്ട്ലൈനിൽ 888-373-7888 എന്ന നമ്പറിൽ ബന്ധപ്പെടാവുന്നതാണ്.
യുകെയിലേക്ക് യാത്ര ചെയ്യുന്ന കാനഡക്കാർക്ക് ഇനി മുതൽ ഇലക്ട്രോണിക് ട്രാവൽ ഓതറൈസേഷൻ (eTA) ആവശ്യമായി വരും. 2026 ഫെബ്രുവരി 25 മുതലാണ് ഇത് പ്രാബല്യത്തിൽ വരിക. eTA ഇല്ലാതെ വരുന്ന യാത്രക്കാരെ വിമാനത്തിൽ കയറാൻ അനുവദിക്കാതിരിക്കാനുള്ള സാധ്യതയുണ്ട്. ഈ നിയമം ഈ വർഷം ആദ്യം തന്നെ നിലവിൽ വന്നിരുന്നു എങ്കിലും, കർശനമായി നടപ്പാക്കിയിരുന്നില്ല. ആളുകൾക്ക് പൊരുത്തപ്പെടാൻ സമയം നൽകുന്നതിനായിരുന്നു ഇത്.
ഇതിന് ഏകദേശം 30 കനേഡിയൻ ഡോളറാണ് ചെലവ് വരുന്നത്. ഓൺലൈനായോ യു.കെ.യുടെ ഔദ്യോഗിക ആപ്പ് വഴിയോ അപേക്ഷിക്കാം. തട്ടിപ്പുകൾ ഒഴിവാക്കാൻ സർക്കാർ വെബ്സൈറ്റുകൾ മാത്രം ഉപയോഗിക്കണമെന്ന് വിദഗ്ധർ മുന്നറിയിപ്പ് നൽകുന്നുണ്ട്. അനുമതി ലഭിച്ചാൽ ഒരു eTA-ക്ക് രണ്ട് വർഷത്തേക്കോ അല്ലെങ്കിൽ പാസ്‌പോർട്ടിൻ്റെ കാലാവധി തീരുന്നത് വരെയോ പ്രാബല്യമുണ്ടാകും. ഈ കാലയളവിൽ ഇത് ഉപയോഗിച്ച് പലതവണ യു.കെ. സന്ദർശിക്കാം.
മിക്ക അപേക്ഷകളും മിനിറ്റുകൾക്കുള്ളിൽ അംഗീകരിക്കപ്പെടും. എങ്കിലും, പ്രോസസ്സിംഗിനായി മൂന്ന് പ്രവൃത്തി ദിവസങ്ങൾ വരെ സമയം എടുക്കാനും സാധ്യതയുണ്ട്. eTA ലഭിച്ചത് കൊണ്ട് മാത്രം യു.കെ.യിൽ പ്രവേശനം ഉറപ്പാക്കാനാകില്ല. കാനഡ-ബ്രിട്ടീഷ് ഇരട്ട പൗരത്വമുള്ളവർ ബ്രിട്ടീഷ് പാസ്‌പോർട്ടോ പ്രത്യേക സർട്ടിഫിക്കറ്റോ ഉപയോഗിക്കണം. യു.കെ.യിൽ കസ്റ്റംസ് പരിശോധനയ്ക്ക് വിധേയരാകാതെ വിമാനത്താവളത്തിൽ മാത്രം തങ്ങുന്ന എയർ ട്രാവലർമാർക്ക് eTA ആവശ്യമില്ല.
കാനഡയിൽ കഴിഞ്ഞ വർഷം വൈദ്യ സഹായത്തോടെയുള്ള മരണം അഥവാ ‘മെഡിക്കൽ അസിസ്റ്റൻസ് ഇൻ ഡൈയിംഗ്'(MAID) തിരഞ്ഞെടുത്തവരിൽ കൂടുതൽ പേരും അർബുദ രോഗം സ്ഥിരീകരിച്ചവരായിരുന്നു എന്ന് റിപ്പോർട്ട്. കാനഡയുടെ ആരോഗ്യ വിഭാഗം (Health Canada) പുറത്തിറക്കിയ ഏറ്റവും പുതിയ റിപ്പോർട്ട് അനുസരിച്ച്, ഓരോ വർഷവും വൈദ്യ സഹായത്തോടെയുള്ള മരണങ്ങളുടെ എണ്ണം കൂടുന്നുണ്ട്.
2024-ൽ കാനഡയിൽ സംഭവിച്ച ആകെ മരണങ്ങളിൽ ഏകദേശം അഞ്ച് ശതമാനം വൈദ്യ സഹായത്തോടെയുള്ള മരണങ്ങളായിരുന്നു. MAID തിരഞ്ഞെടുത്തവരുടെ മീഡിയൻ ഏജ് 78 വയസ്സാണ്. 2024-ൽ MAID തിരഞ്ഞെടുത്ത ഭൂരിഭാഗം പേരെയും ഈ തീരുമാനത്തിലേക്ക് നയിച്ചത് അർബുദം പോലുള്ള ഗുരുതര രോഗങ്ങളായിരുന്നു. ആകെ രേഖപ്പെടുത്തിയ 16,499 വൈദ്യ സഹായത്തോടെയുള്ള മരണങ്ങളിൽ മിക്കതും, മരണത്തിലേക്കടുത്ത രോഗാവസ്ഥ ഉള്ളവരായിരുന്നു. മരണം പ്രതീക്ഷിക്കാത്തവരും അസഹനീയമായ വേദന അനുഭവിക്കുന്നവരുമായ രോഗികൾ വെറും 4.4 ശതമാനം മാത്രമായിരുന്നു.
കനേഡിയൻ നിയമപ്രകാരം MAID-ന് അർഹതയുള്ളവരെ തിരഞ്ഞെടുക്കുന്നതിൽ എത്രത്തോളം ശ്രദ്ധയും പരിഗണനയും നൽകുന്നുണ്ടെന്നും ഈ റിപ്പോർട്ട് വ്യക്തമാക്കുന്നുണ്ട്. അന്തസ്സോടെയുള്ള മരണം, ആരോഗ്യ സംരക്ഷണം എന്നിവയെക്കുറിച്ചുള്ള ചർച്ചകൾക്ക് ഈ കണ്ടെത്തലുകൾ വഴിയൊരുക്കുമെന്നാണ് പ്രതീക്ഷിക്കപ്പെടുന്നത്.
എണ്ണവിലയിലുണ്ടായ ഇടിവിനെയും വ്യാപാര പ്രശ്നങ്ങളെയും തുടർന്ന് കടുത്ത സാമ്പത്തിക പ്രതിസന്ധി നേരിട്ട് ആൽബർട്ട സർക്കാർ. കഴിഞ്ഞ വർഷം 8.3 ബില്യൺ ഡോളറിൻ്റെ മിച്ചമായിരുന്നു രേഖപ്പെടുത്തിയതെങ്കിൽ ഇപ്പോഴത് 6.5 ബില്യൺ ഡോളറിൻ്റെ കമ്മിയിലേക്ക് എത്തിയത് രൂക്ഷമായ സാമ്പത്തിക പ്രതിസന്ധിയെ ആണ് ചൂണ്ടിക്കാട്ടുന്നത്. പ്രകൃതി വിഭവങ്ങളിൽ നിന്നുള്ള വരുമാനത്തിൽ ഉണ്ടായ 30% കുറവാണ് ഇതിന് പ്രധാന കാരണം.
വെസ്റ്റ് ടെക്സസ് ഇൻ്റർമീഡിയേറ്റ് (WTI) എണ്ണവില ശരാശരി ഒരു ബാരലിന് 61.50 യു.എസ്. ഡോളറായിരിക്കുമെന്നാണ് പ്രവിശ്യയുടെ ഇപ്പോഴത്തെ പ്രതീക്ഷ. നേരത്തെ 68 യു.എസ്. ഡോളർ ആയിരുന്നു. എണ്ണവിലയിൽ ഒരു ഡോളറിൻ്റെ കുറവുണ്ടായാൽ പോലും ആൽബർട്ടയുടെ ഖജനാവിന് 750 മില്യൺ ഡോളറിൻ്റെ നഷ്ടമുണ്ടാകും. ആഗോള ഡിമാൻഡ് കുറയുന്നതാണ് ഇതിന് കാരണം. ചൈനയും യു.എസുമായുള്ള വ്യാപാര യുദ്ധങ്ങൾ കൃഷി, ഉൽപ്പാദനം, മരം കയറ്റുമതി എന്നിവയെ ദോഷകരമായി ബാധിക്കുന്നുണ്ട്. അടുത്തിടെ ആൽബർട്ടയിലെ ജനസംഖ്യ അഞ്ച് ദശലക്ഷത്തിൽ എത്തിയതും അധിക സമ്മർദ്ദമുണ്ടാക്കുന്നുണ്ട്. ആകെ ചെലവ് 79 ബില്യൺ ഡോളറും വരുമാനം 73 ബില്യൺ ഡോളറുമായി നിശ്ചയിച്ചതോടെ ആൽബർട്ടയുടെ മൊത്തം കടം 82.9 ബില്യൺ ഡോളറായി ഉയരും. എന്നാൽ വെല്ലുവിളികൾക്കിടയിലും കുടുംബങ്ങൾക്കും സേവനങ്ങൾക്കുമുള്ള നിക്ഷേപം സർക്കാർ തുടരുമെന്ന് ധനമന്ത്രി നേറ്റ് ഹോർണർ അറിയിച്ചു.
അതിനിടെ പ്രവിശ്യ സർക്കാർ ഏറെ പ്രതീക്ഷ പുലർത്തുന്ന ബി.സി.യുടെ വടക്കൻ തീരത്തേക്കുള്ള എണ്ണ പൈപ്പ്‌ലൈൻ നിർമ്മാണത്തിനെതിരെ പ്രതിഷേധമുയരുന്നതും തിരിച്ചടിയാണ്. ഇതേക്കുറിച്ച പ്രധാനമന്ത്രി മാർക്ക് കാർണിയും ആൽബർട്ട പ്രീമിയർ ഡാനിയേൽ സ്മിത്തും ചേർന്ന് കഴിഞ്ഞ ദിവസം കരാറിൽ ഒപ്പുവെച്ചിരുന്നു. എന്നാൽ, തീരദേശത്തെ ഫസ്റ്റ് നേഷൻസ് വിഭാഗങ്ങളുടെ പിന്തുണയില്ലാതെ തങ്ങളുടെ സർക്കാർ ഈ പദ്ധതിയെ പിന്തുണയ്ക്കില്ലെന്ന് ബി.സി. പ്രീമിയർ ഡേവിഡ് ഇബി വ്യക്തമാക്കിക്കഴിഞ്ഞു.
കാനഡയുടെ സമ്പദ്‌വ്യവസ്ഥ 2025-ലെ മൂന്നാം പാദത്തിൽ പ്രതീക്ഷിച്ചതിലും ശക്തമായ വളർച്ച കൈവരിച്ചതായി റിപ്പോർട്ട്. സ്റ്റാറ്റിസ്റ്റിക്സ് കാനഡ പുറത്തുവിട്ട കണക്കുകൾ പ്രകാരം, ജി.ഡി.പി. 2.6 ശതമാനം വാർഷിക നിരക്കിൽ വളർന്നു. മുൻ പാദത്തിലെ 1.8 ശതമാനം Contraction നിന്നുള്ള ശക്തമായ തിരിച്ചുവരവാണിത്. 0.5 ശതമാനം വളർച്ച മാത്രമാണ് സാമ്പത്തിക വിദഗ്ധർ പൊതുവെ പ്രതീക്ഷിച്ചിരുന്നത്. ഇറക്കുമതിയിൽ വലിയ കുറവുണ്ടായതും, കയറ്റുമതിയിൽ നേരിയ വർദ്ധനവുണ്ടായതിൻ്റെയും ഫലമായി വ്യാപാര സന്തുലിതാവസ്ഥയിൽ വന്ന മെച്ചപ്പെടലുമാണ് ഈ വളർച്ചയ്ക്ക് പ്രധാന കാരണം. മാന്ദ്യം ഒഴിവാക്കാൻ ഈ മുന്നേറ്റം കാനഡയെ സഹായിച്ചിട്ടുണ്ട്.
എന്നാൽ, കണക്കുകൾക്ക് പിന്നിലെ വിശദാംശങ്ങൾ പരിശോധിച്ച സാമ്പത്തിക വിദഗ്ധർ സമ്പദ്‌വ്യവസ്ഥയുടെ ദുർബലമായ അടിത്തറയെക്കുറിച്ച് മുന്നറിയിപ്പ് നൽകുന്നുമുണ്ട്. പ്രതിരോധ മേഖലയിലുൾപ്പടെ സർക്കാർ നിക്ഷേപം 82 ശതമാനം വർദ്ധിച്ചത് സമ്പദ്‌വ്യവസ്ഥയെ ഉത്തേജിപ്പിച്ചു. യു.എസ്. താരിഫ് ഭീഷണികൾക്കിടയിലും ബിസിനസ് നിക്ഷേപം മാറ്റമില്ലാതെ തുടർന്നു. വാഹനങ്ങൾ വാങ്ങുന്നത് കുറഞ്ഞതിനെ തുടർന്ന് ഗാർഹിക ചെലവുകൾ 0.1 ശതമാനം കുറഞ്ഞു. പുതിയ താമസ കെട്ടിടങ്ങളുടെ നിർമ്മാണത്തിൽ 0.8 ശതമാനം കുറവുണ്ടായത് ഭവന മേഖലയിലെ ദുർബലതയെയും സൂചിപ്പിക്കുന്നുണ്ട്.
കാനഡയിൽ ഭീഷണിപ്പെടുത്തി പണം തട്ടൽ, കവർച്ച തുടങ്ങിയ കുറ്റകൃത്യങ്ങളുമായി ബന്ധപ്പെട്ട്, മൂന്നുപേരെ രാജ്യത്ത് നിന്ന് പുറത്താക്കി. 78 പേർക്കെതിരെ അന്വേഷണം തുടരുകയാണ്. ബ്രിട്ടീഷ് കൊളംബിയയിൽ ദക്ഷിണേഷ്യൻ വംശജരായ വ്യവസായികളെ ലക്ഷ്യമിട്ടുള്ള ഭീഷണിപ്പെടുത്തി പണംതട്ടൽ വർധിച്ചതിനെ തുടർന്ന് രൂപീകരിച്ച പ്രത്യേക അന്വേഷണ സംഘത്തിൻ്റെ നടപടികൾ ഫലം കണ്ടു തുടങ്ങിയതിൻ്റെ സൂചനയാണിത്. ഇതുമായി ബന്ധപ്പെട്ട് മൂന്ന് വിദേശ പൗരന്മാരെ കാനഡ അതിർത്തി സേന (CBSA) രാജ്യത്തുനിന്ന് പുറത്താക്കി.
നാടുകടത്തപ്പെട്ടവർ പിടിച്ചുപറി ശ്രമങ്ങളിലും സംഘടിത കുറ്റകൃത്യങ്ങളിലും പങ്കാളികളായിരുന്നു. കൂടാതെ, കാനഡയിൽ തുടരാൻ അർഹതയില്ലാത്തവരും ഈ കുറ്റകൃത്യങ്ങളുമായി ബന്ധമുള്ളവരുമായ 78 വിദേശ പൗരന്മാരെക്കുറിച്ച് കൂടി സി.ബി.എസ്.എ. കുടിയേറ്റ നിയമപ്രകാരം അന്വേഷണം ആരംഭിച്ചിട്ടുണ്ട്. ബി.സി.യിൽ നിരവധി വെടിവയ്പ്പുകൾക്കും ഭീഷണികൾക്കും ഇടയാക്കിയ അന്തർദ്ദേശീയ ക്രിമിനൽ സംഘങ്ങളെ തകർക്കുക എന്ന ലക്ഷ്യത്തോടെയാണ് ഈ ടാസ്‌ക് ഫോഴ്‌സ് രൂപീകരിച്ചിരിക്കുന്നത്.
കുറ്റകൃത്യങ്ങളിൽ ഏർപ്പെടുന്നവർ കനേഡിയൻ പൗരന്മാരല്ലെങ്കിൽ അവരെ അറസ്റ്റ് ചെയ്യുകയും രാജ്യത്തുനിന്ന് പുറത്താക്കുകയും ചെയ്യുമെന്ന് ബി.സി. പൊതുസുരക്ഷാ മന്ത്രി നിന ക്രീഗർ വ്യക്തമാക്കി. കുടിയേറ്റ സംവിധാനത്തെ ദുരുപയോഗം ചെയ്യുന്നവരെയും സമൂഹത്തിൻ്റെ സുരക്ഷയ്ക്ക് ഭീഷണി ഉയർത്തുന്നവരെയും എത്രയും വേഗം നാടുകടത്താനുള്ള നടപടികൾ തുടരുമെന്ന് സി.ബി.എസ്.എ. അറിയിച്ചു. ഈ പിടിച്ചുപറി ശ്രമങ്ങൾക്ക് പിന്നിൽ ലോറൻസ് ബിഷ്‌ണോയി സംഘത്തിന് ബന്ധമുണ്ടെന്ന് കനേഡിയൻ അധികൃതർ സംശയിക്കുന്നുണ്ട്.
ഇമിഗ്രേഷൻ അധികൃതരെ കബളിപ്പിച്ച് ഇന്ത്യൻ വനിതകളെ കാനഡയിൽ എത്തിക്കുന്നതിനായി ഇന്ത്യയിൽ രണ്ട് വിവാഹങ്ങൾ കഴിച്ച് ഒൻ്റാരിയോ സ്വദേശി. അമൃത്പാൽ സിംഗ് സിദ്ധു എന്ന ഇന്ത്യൻ വംശജനാണ് രണ്ട് വിവാഹങ്ങൾ കഴിച്ചതായി കോടതിയിൽ സമ്മതിച്ചത്. കാനഡയിലേക്ക് കുടിയേറാൻ ആഗ്രഹിക്കുന്ന ഇന്ത്യൻ വനിതകളിൽ നിന്ന് പണവും, രോഗിയായ അമ്മയെ പരിചരിക്കുന്നതിനുള്ള സഹായവുമാണ് ഇയാൾ പ്രതിഫലമായി കൈപ്പറ്റിയത്. ഈ സംഭവങ്ങൾ കനേഡിയൻ ഇമിഗ്രേഷൻ നിയമങ്ങളെ ദുരുപയോഗം ചെയ്യുന്ന ഷാം മാര്യേജ് കേസുകളിലെ ഏറ്റവും ഒടുവിലത്തെ ഉദാഹരണമാണ്.
സിദ്ധുവിൻ്റെ ഈ പ്രവൃത്തികൾ കോടതിയിൽ തുറന്നുകാട്ടപ്പെട്ട തോടെ ഈ വിവാഹങ്ങൾക്ക് നിയമ സാധുത നൽകാനാവില്ലെന്ന് കോടതി നിരീക്ഷിച്ചു. 1997-ൽ അമൻദീപ് കൗറുമായി പരമ്പരാഗത രീതിയിൽ വിവാഹം കഴിച്ച ശേഷം ഇരുവരും കാനഡയിൽ ‘അവിവാഹിതർ’ എന്ന് രേഖപ്പെടുത്തിയിരുന്നു. ഇതിനുപിന്നാലെയാണ് ഇയാൾ കാനഡയിലേക്ക് വരാൻ ആഗ്രഹിച്ച സ്ത്രീകളെ സഹായിക്കുന്നതിനായി തട്ടിപ്പ് വിവാഹങ്ങൾ നടത്തിയത്. ആദ്യത്തെ തട്ടിപ്പ് വിവാഹം കരൺജിത് കൗറുമായിട്ടായിരുന്നു. പിന്നീട് 2001-ൽ ഇവർ ഒൻ്റാjfയോയിൽ വെച്ച് വിവാഹമോചനം നേടുകയും ചെയ്തു.
2022-ൽ, സിദ്ധു വീണ്ടും ഇന്ത്യയിലേക്ക് പോവുകയും ഹർജിത് കൗറുമായി രണ്ടാമത് വിവാഹം കഴിച്ചു. 2000-നും 2017-നും ഇടയിൽ സിദ്ധു ഔദ്യോഗിക രേഖകളിൽ അവിവാഹിതൻ എന്നാണ് രേഖപ്പെടുത്തിയിരുന്നത്. എന്നാൽ, തൻ്റെ മുൻ ഭാര്യയായ അമൻദീപ് കൗർ നികുതി ആനുകൂല്യങ്ങൾ ലഭിക്കുന്നതിനായി ഔദ്യോഗിക രേഖകളിൽ ‘അവിവാഹിതൻ’ എന്ന് രേഖപ്പെടുത്താൻ തന്നോട് ആവശ്യപ്പെടുകയായിരുന്നു എന്നും ഇയാൾ കോടതിയിൽ മൊഴി നൽകിയിട്ടുണ്ട്.
