രാജ്യത്തെ തൊഴിൽ ക്ഷാമം പരിഹരിക്കുന്നതിനും വിദേശ പ്രതിഭകളെ കാനഡയിലേക്ക് ആകർഷിക്കുക എന്ന ലക്ഷ്യത്തോടെയും എക്സ്പ്രസ് എൻട്രി നറുക്കെടുപ്പുകളിൽ മാറ്റങ്ങൾ വരുത്താനൊരുങ്ങുകയാണ് ഇമിഗ്രേഷൻ, റഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC). ഇതിനായി 2027-ൽ പുതിയ കാറ്റഗറികൾ നിശ്ചയിക്കുന്നതിനായി പൊതുജനാഭിപ്രായം തേടിയിരിക്കുകയാണ് ഐആർസിസി. 2026 ഓഗസ്റ്റ് 4-ന് ആരംഭിച്ച കൺസൾട്ടേഷൻ സെപ്റ്റംബർ 1 വരെ തുടരും.
2027-ലെ ഇമിഗ്രേഷൻ നയം പ്രകാരം ആഗോള തലത്തിലെ പ്രൊഫഷണലുകളെ ആകർഷിക്കാൻ പുതിയ കാറ്റഗറികൾ ആരംഭിക്കാനാണ് ഐആർസിസി ലക്ഷ്യമിടുന്നത്. ഇതിൽ ആർട്ടിഫിഷ്യൽ ഇന്റലിജൻസ്, ഇൻഫർമേഷൻ ടെക്നോളജി എന്നീ മേഖലകളിലെ വിദഗ്ദ്ധർക്കായി ഗ്ലോബൽ ടാലൻ്റ് സ്ട്രീം, ശാസ്ത്ര ഗവേഷകരെ ആകർഷിക്കുന്നതിനായി ഗ്ലോബൽ റിസേർച്ചേഴ്സ് സ്ട്രീം, ഉയർന്ന സാങ്കേതികവിദ്യ, ആരോഗ്യം, ട്രേഡ്സ് എന്നിവയിലെ ഇന്റർനാഷണൽ ടാലൻ്റ് സ്ട്രാറ്റജി, കൂടാതെ അമേരിക്കയിൽ ജോലി ചെയ്യുന്ന H-1B വിസയുള്ള വിദേശ ജീവനക്കാർക്കായി നേരിട്ടുള്ള സ്പെഷ്യൽ പാത്ത് വേ എന്നിവയാണ് പ്രധാന കാറ്റഗറി നിർദ്ദേശങ്ങൾ.
ഫെഡറൽ സർക്കാരിന്റെ പുതിയ ഇമിഗ്രേഷൻ നയങ്ങൾ പ്രധാനമായും ഹെൽത്ത്കെയർ, ട്രേഡ്സ്, എഡ്യൂക്കേഷൻ, ട്രാൻസ്പോർട്ടേഷൻ എന്നീ മൂന്ന് പാത്ത് വേകളെ അടിസ്ഥാനമാക്കിയാണ് പ്രവർത്തിക്കുന്നത്. കൂടാതെ ക്യുബെക്ക് ഒഴികെയുള്ള പ്രവിശ്യകളിൽ ഫ്രഞ്ച് ഭാഷാ പ്രാവീണ്യമുള്ളവരുടെ സാന്നിധ്യം വർധിപ്പിക്കുക എന്നതും പുതിയ ഇമിഗ്രേഷൻ നയത്തിന്റെ ലക്ഷ്യമാണ്. 2026-ൽ നിലവിലുള്ള പത്ത് വിഭാഗങ്ങളിൽ ഫ്രഞ്ച് ഭാഷാ പ്രാവീണ്യം, ഹെൽത്ത്കെയർ, STEM, ട്രേഡ്സ്, വിദ്യാഭ്യാസം, ഗതാഗതം, ഡോക്ടർമാർ, ഗവേഷകർ, സീനിയർ മാനേജർമാർ എന്നീ ഒൻപത് വിഭാഗവും 2027-ലേക്കും തുടരണമോ എന്നതും കൺസൾട്ടേഷനിൽ അഭിപ്രായം രേഖപ്പെടുത്താം.
