ആൽബർട്ടയിലെ സ്റ്റോണി ട്രെയിലിലുണ്ടായ വാഹനാപകടത്തിൽ ഒരു കുട്ടി ഉൾപ്പെടെ നാല് പേർ മരിച്ചു. ഞായറാഴ്ച രാത്രി 11 മണിയോടെ ‘ത്സൂട്ടിന പാർക്ക്വേയ്ക്ക്’ സമീപം മെഴ്സിഡസ് ബെൻസ് കാർ എതിർദിശയിൽ വന്ന കാറുമായി കൂട്ടിയിടിക്കുകയായിരുന്നു.
ഇടിയുടെ ആഘാതത്തിൽ രണ്ട് കാറുകൾക്കും തീപിടിച്ചു. മെഴ്സിഡസ് ബെൻസിലെ ഡ്രൈവർ, ഒരു സ്ത്രീ, ഒരു കുട്ടി എന്നിവരും, കാറിലുണ്ടായിരുന്ന 43-കാരനായ ഡ്രൈവറുമാണ് മരിച്ചത്. നാലുപേരും സംഭവസ്ഥലത്ത് തന്നെ മരിച്ചതായി സ്ഥിരീകരിച്ചു. അപകടത്തിൽപ്പെട്ട ബെൻസിലേക്ക് പിന്നാലെ വന്ന മറ്റൊരു കാർ ഇടിച്ചു കയറി. ഈ കാറിലുണ്ടായിരുന്ന സ്ത്രീയെയും മൂന്ന് കുട്ടികളെയും ഗുരുതര പരുക്കുകളോടെ ആശുപത്രിയിൽ പ്രവേശിപ്പിച്ചു. അമിതവേഗവും മദ്യപിച്ചു വാഹനമോടിച്ചതുമാകാം അപകട കാരണമെന്ന് കരുതുന്നതായി കാൽഗറി പോലീസ് അറിയിച്ചു. അന്വേഷണം പുരോഗമിക്കുന്നു.
