ഒൻ്റാരിയോയിൽ നിന്നുള്ള കാണാതായ എയർ ആംബുലൻസിന്‍റെ അവശിഷ്ടങ്ങൾ അമേരിക്കൻ തീരത്തിന് സമീപം കണ്ടെത്തി. ബോസ്റ്റണിന് തെക്കുകിഴക്കായി ഏകദേശം 150 കിലോമീറ്റർ അകലെയായാണ് അവശിഷ്ടങ്ങൾ കണ്ടെത്തിയത്. അവ കാണാതായ വിമാനത്തിന്‍റെതാണെന്ന് സ്ഥിരീകരിച്ചിട്ടുണ്ട്. അതേസമയം വിമാനത്തിനായുള്ള തിരച്ചിൽ നിർത്തിവെച്ചതായി യു.എസ്. കോസ്റ്റ് ഗാർഡ് അറിയിച്ചു. ആകെ 66 മണിക്കൂറോളം നീണ്ട തിരച്ചിലിൽ കോസ്റ്റ് ഗാർഡും മറ്റു ഏജൻസികളും ചേർന്ന് 4,445 മൈൽ (7,154 കിലോമീറ്റർ) വിസ്തൃതിയിലുള്ള പ്രദേശത്ത് പരിശോധന നടത്തിയതായി നോർത്ത് ഈസ്റ്റ് ഡിസ്ട്രിക്റ്റ് കമാൻഡറായ റിയർ അഡ്മിറൽ മാത്യു ലേക്ക് പറഞ്ഞു.
ഒൻ്റാരിയോയിലെ ഹാമിൽട്ടൺ ആസ്ഥാനമായി പ്രവർത്തിക്കുന്ന ‘ലാറ്റിറ്റ്യൂഡ് എയർ ആംബുലൻസ്’ (Latitude Air Ambulance) ഓപ്പറേറ്റ് ചെയ്യുന്ന ഗൾഫ്‌സ്ട്രീം G100 വിമാനം, ബെർമുഡയിൽ നിന്ന് ബോസ്റ്റണിലേക്കുള്ള യാത്രയ്ക്കിടെ ശനിയാഴ്ച പുലർച്ചെയാണ് അപ്രത്യക്ഷമായത്. നാല് കനേഡിയൻ പൗരന്മാരും രണ്ട് ബെർമുഡ പൗരന്മാരുമായിരുന്നു വിമാനത്തിലുണ്ടായിരുന്നത്. വിമാനത്തിൽ ഒരു രോഗിയും അവരുടെ കുടുംബാംഗവും (ഇരുവരും ബെർമുഡ പൗരന്മാരാണ്), കൂടാതെ രണ്ട് പൈലറ്റുമാരും രണ്ട് മെഡിക്കൽ ജീവനക്കാരുമാണ് ഉണ്ടായിരുന്നതെന്ന് ലാറ്റിറ്റ്യൂഡ് എയർ ആംബുലൻസിന്‍റെ ഓപ്പറേഷൻസ് മാനേജർ ക്ലാറൻസ് ടോഗെറെറ്റ്സ് പറഞ്ഞു.
