നീലക്കുറിഞ്ഞി പൂക്കാലം അവസാനിക്കാറായതോടെ മൂന്നാറിലേക്കും ആനച്ചാലിലേക്കും വിനോദസഞ്ചാരികളുടെ വൻ തിരക്കാണ് അനുഭവപ്പെടുന്നത്. സന്ദർശകരുടെ വർദ്ധനവും കൊച്ചി-ധനുഷ്കോടി ദേശീയപാതയിലെ അനധികൃത പാർക്കിങ്ങും വഴിയോരക്കടകളും മൂന്നാർ മേഖലയിൽ രൂക്ഷമായ ഗതാഗതക്കുരുക്കിന് കാരണമായിരിക്കുന്നു. ഈ യാത്രാതടസ്സം കാരണം സർക്കാർ ഉദ്യോഗസ്ഥരുൾപ്പെടെയുള്ളവർക്ക് തങ്ങളുടെ ജോലിസ്ഥലങ്ങളിൽ എത്താൻ മണിക്കൂറുകൾ വൈകുന്നുണ്ട്.
കഴിഞ്ഞ രണ്ടു ദിവസമായി രാവിലെ മുതൽ മണിക്കൂറുകളോളമാണ് ഗതാഗതക്കുരുക്ക് നീണ്ടുനിൽക്കുന്നത്. ശങ്ക്പടി മുതൽ ആനച്ചാൽ, ആൽത്തറ, ചിത്തിരപുരം രണ്ടാം മൈൽ, ടൗൺ, ബൈപാസ് റോഡ്, മാട്ടുപെട്ടി റോഡ്, ദേവികുളം റോഡ് തുടങ്ങി വിവിധ ഭാഗങ്ങളിൽ വലിയ കുരുക്കാണ് അനുഭവപ്പെടുന്നത്. മുൻപ് 25 മിനിറ്റ് കൊണ്ട് ആനച്ചാലിൽ നിന്നും മൂന്നാറിലെത്തുമായിരുന്ന സ്ഥാനത്ത് ഇപ്പോൾ രണ്ടര മണിക്കൂറിലേറെ സമയം വേണ്ടിവരുന്നു.
ഗതാഗതക്കുരുക്കിനെ തുടർന്ന് പല ബസ് സർവീസുകളും റദ്ദാക്കിയിട്ടുണ്ട്. മിക്ക കെഎസ്ആർടിസി ബസുകളും ടൗണിൽ എത്താതെ പഴയ മൂന്നാർ ഡിപ്പോയിൽ സർവീസ് അവസാനിപ്പിച്ച് മടങ്ങുന്നത് യാത്രക്കാരുടെ ദുരിതം ഇരട്ടിയാക്കുന്നു. പ്രധാന പോയിന്റുകളിൽ ഗതാഗതം നിയന്ത്രിക്കാൻ ആവശ്യത്തിന് പോലീസ് ഇല്ലാത്തതും ഈ പ്രതിസന്ധി തുടരാൻ കാരണമാകുന്നുണ്ട്.
