ഷിക്കാഗോ : ക്രിസ്മസ് ആഘോഷങ്ങള്‍ക്ക് വര്‍ണപ്പകിട്ടേകാന്‍ നോര്‍ത്ത്ബ്രൂക്കില്‍ പ്രശസ്തമായ വില്ലോ ഹില്‍ ലൈറ്റ്‌സ് (Willow Hill Lights) വീണ്ടും ഒരുങ്ങുന്നു. നവംബര്‍ 13 വെള്ളിയാഴ്ച മുതല്‍ ആരംഭിക്കുന്ന ഈ വര്‍ഷത്തെ ആഘോഷത്തില്‍ ഏകദേശം 15 ലക്ഷം എല്‍ഇഡി വിളക്കുകളാണ് സന്ദര്‍ശകരെ വരവേല്‍ക്കുന്നത്. ഏകദേശം രണ്ടര മൈല്‍ നീളമുള്ള പ്രത്യേക പാതയിലൂടെ സ്വന്തം വാഹനത്തില്‍ സഞ്ചരിച്ചുകൊണ്ട് വര്‍ണാഭമായ ക്രിസ്മസ് അലങ്കാരങ്ങളും പ്രകാശവിസ്മയങ്ങളും ആസ്വദിക്കാമെന്നതാണ് പരിപാടിയുടെ പ്രധാന ആകര്‍ഷണം. നവംബര്‍ 13 മുതല്‍ 2027 ജനുവരി 3 വരെയാണ് പ്രദര്‍ശനം. ഞായര്‍ മുതല്‍ വ്യാഴം വരെ വൈകുന്നേരം അഞ്ചുമുതല്‍ രാത്രി ഒമ്പതുവരെയും വെള്ളി, ശനി ദിവസങ്ങളില്‍ രാത്രി പത്തുവരെയും സന്ദര്‍ശകര്‍ക്ക് പ്രവേശനമുണ്ടാകും.

ആറാം തവണയാണ് വില്ലോ ഹില്‍ ലൈറ്റ്‌സ് സംഘടിപ്പിക്കുന്നത്. 400-ലധികം ചലിക്കുന്ന പ്രകാശാലങ്കാരങ്ങള്‍, പ്രകാശതുരങ്കങ്ങള്‍, 30 അടി ഉയരമുള്ള ക്രിസ്മസ് ട്രീ, റുഡോള്‍ഫ്, ഫ്രോസ്റ്റി തുടങ്ങിയ ക്രിസ്മസ് കഥാപാത്രങ്ങള്‍ എന്നിവയും ഒരുക്കിയിട്ടുണ്ട്.

ഒരു വാഹനത്തിന് ഒരു ടിക്കറ്റ് മാത്രം മതിയെന്നതും പരിപാടിയുടെ പ്രത്യേകതയാണ്. ഓണ്‍ലൈനായി ടിക്കറ്റ് വാങ്ങുന്നവര്‍ക്ക് പ്രവേശനകവാടത്തില്‍നിന്ന് നേരിട്ട് ടിക്കറ്റ് വാങ്ങുന്നതിനെക്കാള്‍ പത്ത് ഡോളര്‍ ലാഭിക്കാമെന്നാണ് സംഘാടകർ അറിയിച്ചു. ഓണ്‍ലൈന്‍ ടിക്കറ്റ് നിരക്ക് ഒരു കാറിന് 40 ഡോളറും പ്രവേശനകവാടത്തില്‍ 50 ഡോളറുമാണ്. ഡിസംബര്‍ 14-ന് സൈനികര്‍ക്കും മുന്‍ സൈനികര്‍ക്കും അടിയന്തരസേവന വിഭാഗങ്ങളിലെ ജീവനക്കാര്‍ക്കും 50 ശതമാനം ഇളവും ലഭിക്കും.