ഇംഗ്ലണ്ടിലെ ചരിത്രപ്രസിദ്ധമായ സിൽവർസ്റ്റോൺ ട്രാക്കിൽ മോട്ടോർ സ്പോർട്സ് ലോകത്തെ വിസ്മയിപ്പിച്ചുകൊണ്ട് നാലുതവണ ഫോർമുല വൺ ലോക ചാമ്പ്യനായ മാക്സ് വെർസ്റ്റപ്പൻ ഒരു പുതിയ ചരിത്രം കുറിച്ചു. റെഡ്ബുളും ഡിസ്നി പ്ലസും ഇഎസ്പിഎനും സംയുക്തമായി സംഘടിപ്പിച്ച ഈ വ്യത്യസ്തമായ മത്സരത്തിൽ വെർസ്റ്റപ്പൻ ഉൾപ്പെടെ ആകെ 101 ഗോ കാർട്ടുകളാണ് ട്രാക്കിലിറങ്ങിയത്. തുടക്കക്കാരായ റേസർമാരുടെ നിരയ്ക്ക് ഏറ്റവും പിന്നിൽ, അതായത് 100 ഡ്രൈവർമാർക്ക് പിറകിൽ നിന്നാണ് വെർസ്റ്റപ്പൻ തന്റെ റേസ് ആരംഭിച്ചത്. എന്നാൽ മുന്നിലുണ്ടായിരുന്ന മുഴുവൻ പേരെയും നിഷ്പ്രഭമാക്കി ഒന്നാം സ്ഥാനത്തേക്ക് കുതിക്കാൻ അദ്ദേഹത്തിന് സാധിച്ചു.
റെഡ്ബുൾ അത്ലറ്റുകൾ, പ്രൊഫഷണൽ ഗെയിമർമാർ, സോഷ്യൽ മീഡിയ കണ്ടന്റ് ക്രിയേറ്റർമാർ, മോട്ടോർ സ്പോർട്സ് മാധ്യമപ്രവർത്തകർ, ലോകത്തിന്റെ വിവിധ ഭാഗങ്ങളിൽ നിന്നുള്ള ഗോ കാർട്ട് മത്സര വിജയികൾ എന്നിവരുമായാണ് വെർസ്റ്റപ്പൻ മാറ്റുരച്ചത്. ഒരു ദിവസം നീണ്ടുനിന്ന പരിശീലനത്തിന് ശേഷമാണ് മത്സരം സംഘടിപ്പിച്ചത്. ആകെ 30 ലാപ്പുകളിലായി 75 മിനിറ്റ് പരമാവധി സമയം അനുവദിച്ചിരുന്ന ഈ മത്സരം, വെറും 35 മിനിറ്റുകൾ കൊണ്ടാണ് വെർസ്റ്റപ്പൻ വിജയകരമായി പൂർത്തിയാക്കിയത്. ട്രാക്കിലെ തന്റെ അജയ്യമായ മികവ് ‘മാഡ് മാക്സ്’ എന്ന വിളിപ്പേരിനൊപ്പിച്ച് അദ്ദേഹം വീണ്ടും തെളിയിച്ചു.
ഈ റേസിങ് അനുഭവം കാഴ്ചക്കാർക്കും ആരാധകർക്കും തികച്ചും നവീനമായ ഒരു അനുഭൂതിയാണ് സമ്മാനിച്ചത്. ഡ്രോൺ ക്യാമറകളിലൂടെയുള്ള തത്സമയ ദൃശ്യങ്ങളും, ലൈവ് ട്രാക്കിങ്ങും, വീഡിയോ ഗെയിമുകളെ ഓർമ്മിപ്പിക്കുന്ന തൽസമയ ലീഡർബോർഡും മത്സരത്തിന്റെ ആവേശം ഇരട്ടിച്ചു. കൂടാതെ, പ്രോക്സിമിറ്റി ചാറ്റ് ഇന്റർകോം സൗകര്യമുള്ള ഹെൽമറ്റുകൾ ധരിച്ചിരുന്നതിനാൽ ഡ്രൈവർമാർക്ക് റേസിനിടയിൽ എതിരാളികളോടും കമന്റേറ്റർമാരോടും സംസാരിക്കാൻ സാധിച്ചിരുന്നു. പരമ്പരാഗത കാർട്ട് റേസിംഗുകളിൽ നിന്ന് വ്യത്യസ്തമായി ഇതൊരു മോട്ടോർ സ്പോർട്സ് വീഡിയോ ഗെയിം കളിക്കുന്ന പ്രതീതിയാണ് എല്ലാവരിലും ഉണ്ടാക്കിയത്. ഈ അസാധാരണ മത്സരത്തിന്റെ ദൃശ്യങ്ങൾ വൈകാതെ തന്നെ സോഷ്യൽ മീഡിയയിൽ തരംഗമായി മാറുകയും ചെയ്തു. മോട്ടോർ സ്പോർട്സ് രംഗത്തെ ഏറ്റവും കരുത്തനായ റേസർ താനാണെന്ന് ഒരിക്കൽക്കൂടി ലോകത്തിന് മുന്നിൽ അടയാളപ്പെടുത്തുന്നതായിരുന്നു മാക്സ് വെർസ്റ്റപ്പന്റെ ഈ പ്രകടനം.
