യുഎസിലെ ഇടക്കാല തെരഞ്ഞെടുപ്പിന് ദിവസങ്ങള്‍ മാത്രം ശേഷിക്കെ അയോവയിലും കാൻസസിലും നടത്താനിരുന്ന പ്രചാരണ റാലികള്‍ പ്രസിഡൻ്റ് ഡോണൾഡ് ട്രംപ് റദ്ദാക്കി. ശനിയാഴ്ച കാൻസസിലും ഞായറാഴ്ച അയോവയിലും നടത്താനിരുന്ന റാലികളാണ് റദ്ദാക്കിയത്. പകരം വിവിധ സംസ്ഥാനങ്ങളിലെ റിപ്പബ്ലിക്കന്‍ സ്ഥാനാർത്ഥികള്‍ക്കായി ടെലിഫോണ്‍ വഴി പ്രചാരണ പരിപാടികളില്‍ ട്രംപ് പങ്കെടുക്കുമെന്ന് റിപ്പബ്ലിക്കന്‍ നാഷണല്‍ കമ്മിറ്റി അറിയിച്ചു.
കാൻസസിലെ റിപ്പബ്ലിക്കന്‍ സെനറ്റര്‍ റോജര്‍ മാര്‍ഷല്‍ മികച്ച നിലയിലാണെന്നും അതിനാല്‍ നേരിട്ടുള്ള റാലിക്ക് പകരം ഫോണിലൂടെ അദ്ദേഹത്തിന് വേണ്ടി പ്രചാരണം നടത്തുമെന്നും ട്രംപ് വ്യക്തമാക്കി. ട്രംപിന്‍റെ രാഷ്ട്രീയ സംഘടനയായ മാഗാഐഎന്‍സി 15ലധികം സംസ്ഥാനങ്ങളിലെ സ്ഥാനാർത്ഥികള്‍ക്കായി ടെലി-റാലികള്‍ സംഘടിപ്പിക്കുമെന്നും അറിയിച്ചു. നവംബര്‍ മൂന്നിന് നടക്കുന്ന ഇടക്കാല തിരഞ്ഞെടുപ്പില്‍ കോണ്‍ഗ്രസിലെ അധികാര ശക്തി നിര്‍ണയിക്കുന്ന നിര്‍ണായക മത്സരങ്ങളാണ് നടക്കുന്നത്.
അതിനിടെ, അലാസ്‌കയിലെ ഡെമോക്രാറ്റിക് സെനറ്റ് സ്ഥാനാർത്ഥി മേരി പെല്‍റ്റോളയെ ബന്ധപ്പെടുത്തിയുള്ള പ്രചാരണ വിവാദവും രാഷ്ട്രീയ ചര്‍ച്ചകള്‍ക്ക് വഴിവെച്ചിരിക്കുകയാണ്. റിപ്പബ്ലിക്കന്‍ സെനറ്റര്‍ ഡാന്‍ സള്ളിവന്‍റെ പേരിനോട് സാമ്യമുള്ള പേരുള്ള മറ്റൊരു സ്ഥാനാർത്ഥിയെ മത്സരിപ്പിച്ച് റിപ്പബ്ലിക്കന്‍ വോട്ടുകള്‍ ഭിന്നിപ്പിക്കാന്‍ പെല്‍റ്റോളയുടെ പ്രചാരണ സംഘത്തിലെ ചിലര്‍ ശ്രമിച്ചതായി പ്രമുഖ മാധ്യമം റിപ്പോർട്ട് ചെയ്തിരുന്നു.
