ഇല്ലിനോയിയിലെ ഷിക്കാഗോയും കുക്ക് കൗണ്ടിയും ഉള്‍പ്പെടുന്ന പ്രദേശങ്ങളില്‍നിന്ന് വേര്‍പിരിഞ്ഞ് പുതിയൊരു സംസ്ഥാനം രൂപീകരിക്കാനുള്ള നീക്കം വീണ്ടും സജീവമാകുന്നു. നവംബര്‍ മൂന്നിന് നടക്കുന്ന അമേരിക്കന്‍ ഇടക്കാല തിരഞ്ഞെടുപ്പിനൊപ്പം ഇല്ലിനോയിയിലെ 11 കൗണ്ടികളില്‍ ഇതുസംബന്ധിച്ച ജനഹിതപരിശോധന നടക്കും. ഷിക്കാഗോ കേന്ദ്രീകരിച്ചുള്ള രാഷ്ട്രീയ തീരുമാനങ്ങള്‍ സംസ്ഥാനത്തിന്‍റെ മറ്റു ഭാഗങ്ങളിലെ ജനങ്ങളുടെ താല്‍പ്പര്യങ്ങളെ വേണ്ടവിധം പരിഗണിക്കുന്നില്ലെന്ന ആരോപണമാണ് പുതിയ സംസ്ഥാന രൂപീകരണ ആവശ്യത്തിന് പിന്നില്‍. ഈ നീക്കത്തിന് നേതൃത്വം നല്‍കുന്നത് Illinois Separation എന്ന സംഘടനയാണ്. സംഘടനയുടെ ഡയറക്ടര്‍ ലോറെറ്റ് ന്യൂലിന്‍ (Loret Newlin), ഇല്ലിനോയ് നിയമസഭയില്‍ തീരുമാനങ്ങള്‍ എടുക്കുമ്പോള്‍ ഷിക്കാഗോയ്ക്ക് പുറത്തുള്ള പ്രദേശങ്ങളുടെ ആവശ്യങ്ങള്‍ പലപ്പോഴും അവഗണിക്കപ്പെടുന്നതായി ആരോപിച്ചു. നവംബര്‍ മൂന്നിന് കോള്‍സ്, പിയാറ്റ്, ഹെന്‍ഡേഴ്‌സണ്‍, മക്ഡൊണോ, വാറന്‍, മകൂപ്പിന്‍, മണ്‍റോ, വാഷിങ്ടണ്‍, ഹാമില്‍ട്ടണ്‍, സലൈന്‍, ഗാലറ്റിന്‍ എന്നീ 11 കൗണ്ടികളിലാണ് സംഘടനയുടെ നേതൃത്വത്തിലുള്ള ജനഹിതപരിശോധന നടക്കുന്നത്. ആഡംസ് കൗണ്ടിയിലെ ചില ടൗണ്‍ഷിപ്പുകളിലും സമാനമായ ചോദ്യം വോട്ടര്‍മാര്‍ക്ക് മുന്നിലെത്തും. ഫോര്‍ഡ് കൗണ്ടിയിലും സ്വതന്ത്രമായി സമാനമായ അഭിപ്രായശേഖരണം നടക്കുന്നുണ്ട്.

അമേരിക്കയിലെ 51-ാമത്തെ സംസ്ഥാനമായി ഷിക്കാഗോയും കുക്ക് കൗണ്ടിയും ഒഴികെയുള്ള ഇല്ലിനോയ് പ്രദേശങ്ങളെ മാറ്റാനുള്ള സാധ്യത പരിശോധിക്കണമെന്നതാണ് നിര്‍ദേശത്തിന്‍റെ അടിസ്ഥാനം. എന്നാല്‍ നവംബര്‍ മൂന്നിലെ വോട്ടെടുപ്പ് നിയമപരമായി നിര്‍ബന്ധിതമല്ലാത്ത അഭിപ്രായശേഖരണം മാത്രമാണ്. ജനങ്ങള്‍ അനുകൂലമായി വോട്ട് ചെയ്താലും കൗണ്ടികള്‍ ഇല്ലിനോയിയില്‍ നിന്ന് ഉടനടി വേര്‍പിരിയുകയോ പുതിയ സംസ്ഥാനം രൂപീകരിക്കപ്പെടുകയോ ചെയ്യില്ല.

ഇല്ലിനോയിയിലെ 102 കൗണ്ടികളില്‍ 33 കൗണ്ടികള്‍ ഇതിനകം സമാനമായ ജനഹിതപരിശോധനകളില്‍ വേര്‍പിരിയാനുള്ള സാധ്യത പരിശോധിക്കുന്നതിനെ അനുകൂലിച്ചിട്ടുണ്ട്. 2020 മുതല്‍ 2024 വരെയുള്ള കാലഘട്ടത്തിലാണ് ഈ വോട്ടെടുപ്പുകള്‍ നടന്നത്. ഈ കൗണ്ടികള്‍ നിയമപരമായി ഇല്ലിനോയിയില്‍ നിന്ന് വേര്‍പിരിഞ്ഞിട്ടില്ലെങ്കിലും, ഷിക്കാഗോയ്ക്ക് പുറത്തുള്ള ചില പ്രദേശങ്ങളിലെ രാഷ്ട്രീയ അസംതൃപ്തിയുടെ സൂചനയായി സംഘാടകര്‍ വോട്ടെടുപ്പ് ഫലങ്ങളെ അവതരിപ്പിക്കുന്നു.