ന്യൂഡൽഹി : ഇന്ത്യ-അമേരിക്ക ഉഭയകക്ഷി വ്യാപാര കരാറിൽ ഇരുരാജ്യങ്ങളും ധാരണയായെന്നും ചർച്ചകൾ അന്തിമഘട്ടത്തിലാണെന്നും ഇന്ത്യൻ വിദേശകാര്യമന്ത്രി എസ്. ജയശങ്കർ അറിയിച്ചു. താരിഫ് നിരക്കുകൾ ഉൾപ്പെടെയുള്ള പ്രധാന തർക്കവിഷയങ്ങൾ പരിഹരിച്ചതായും കരാർ ഉടൻ ഒപ്പുവെക്കാനാകുമെന്നാണ് പ്രതീക്ഷയെന്നും എച്ച്.ടി. ലീഡർഷിപ്പ് സമ്മിറ്റിൽ സംസാരിക്കവെ അദ്ദേഹം വ്യക്തമാക്കി. പ്രധാനമന്ത്രി നരേന്ദ്ര മോദിയും അമേരിക്കൻ പ്രസിഡൻ്റ് ഡോണൾഡ് ട്രംപും തമ്മിൽ നടത്തിയ ഫോൺ സംഭാഷണത്തെത്തുടർന്ന് കഴിഞ്ഞ ഫെബ്രുവരിയിലാണ് കരാറിന്‍റെ ആദ്യഘട്ടത്തിന് രൂപം നൽകിയത്.
അമേരിക്കയുടെ താരിഫ് നയങ്ങളിലുണ്ടായ മാറ്റങ്ങളെ തുടർന്ന് കരാറുമായി ബന്ധപ്പെട്ട ചർച്ചകൾ ഇടക്കാലത്ത് അനിശ്ചിതത്വത്തിലായിരുന്നു. ചർച്ചകളിൽ ഇനി പരിഹരിക്കാനുള്ള വിഷയങ്ങളിൽ ഭൂരിഭാഗവും അമേരിക്കൻ ഭാഗത്തുണ്ടായ മാറ്റങ്ങളുമായി ബന്ധപ്പെട്ടതാണെന്നും ഇന്ത്യയുടെ ഭാഗത്തുനിന്നുള്ള വിഷയങ്ങളല്ലെന്നും ജയശങ്കർ വ്യക്തമാക്കി. മറ്റ് സാമ്പത്തിക ശക്തികളെ അപേക്ഷിച്ച് ഇന്ത്യയ്ക്ക് കൂടുതൽ അനുകൂലമായ താരിഫ് വ്യവസ്ഥകൾ കരാറിലൂടെ ലഭിക്കുമെന്നാണ് പ്രതീക്ഷിക്കുന്നത്.
ഡിസംബർ 14, 15 തീയതികളിൽ മയാമിയിൽ നടക്കുന്ന ജി-20 ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും ട്രംപും ചേർന്ന് കരാറിന്‍റെ ഒന്നാംഘട്ടം ഔദ്യോഗികമായി പ്രഖ്യാപിച്ചേക്കുമെന്നാണ് സൂചന. കഴിഞ്ഞ മാസം മുംബൈ സന്ദർശനത്തിനിടെ അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോയും ഇരുരാജ്യങ്ങളും വ്യാപാര കരാർ അന്തിമമാക്കുന്നതിലേക്ക് അടുത്തതായി വ്യക്തമാക്കിയിരുന്നു.
