യുകെയിൽ ഡീസൽ വില ചരിത്രത്തിലാദ്യമായി ലിറ്ററിന് 2 പൗണ്ട് കടന്നതിനെ തുടർന്ന് ആഗോള വിപണിയിലെ ഇന്ധന പ്രതിസന്ധി പരിഹരിക്കാൻ ഫ്രഞ്ച് പ്രസിഡന്റ് ഇമാനുവൽ മാക്രോ ജി7 ഉച്ചകോടി വിളിച്ചുചേർക്കാൻ തീരുമാനിച്ചു. യുഎസ് പ്രസിഡന്റ് ഡോണൾഡ് ട്രംപുമായി നടത്തിയ ചർച്ചകൾക്ക് ശേഷമാണ് എലിസി കൊട്ടാരം ഈ വിവരം പുറത്തുവിട്ടത്. കയറ്റുമതി നിയന്ത്രണങ്ങളിലേക്ക് കടക്കാതെ ഇന്ധന വിലവർധന തടയാനും അവയുടെ ലഭ്യത ഉറപ്പാക്കാനുമായി ജി7 രാജ്യങ്ങൾ ഏകോപിതമായി പ്രവർത്തിക്കണമെന്ന് മാക്രോ ആവശ്യപ്പെടുകയുണ്ടായി.
ആഗോളതലത്തിലെ ഇന്ധനക്ഷാമം നേരിടാൻ അടിയന്തര ഡീസൽ ശേഖരം വിപണിയിലെത്തിക്കാൻ അമേരിക്ക യൂറോപ്യൻ രാജ്യങ്ങൾക്ക് മേൽ ശക്തമായ സമ്മർദ്ദം ചെലുത്തുന്നുണ്ട്. യൂറോപ്യൻ രാജ്യങ്ങൾ തങ്ങളുടെ കരുതൽ ശേഖരം പുറത്തെടുക്കാൻ തയ്യാറായില്ലെങ്കിൽ അമേരിക്കയിൽ നിന്നുള്ള ഡീസൽ കയറ്റുമതി തടയുമെന്നാണ് വാഷിങ്ടണിന്റെ മുന്നറിയിപ്പ്. ഇറാൻ യുദ്ധം മൂലമുള്ള വിതരണ തടസ്സങ്ങൾ, റഷ്യൻ ഊർജ ഇൻഫ്രാസ്ട്രക്ചറുകൾക്ക് നേരെയുള്ള ആക്രമണങ്ങൾ, ഒക്ടോബറിൽ ചൈന എണ്ണ കയറ്റുമതി ഭാഗികമായി നിർത്തിവെച്ചത് തുടങ്ങിയ ഘടകങ്ങളാണ് നിലവിലെ പ്രതിസന്ധിക്ക് ആക്കം കൂട്ടിയത്.
യൂറോപ്യൻ രാജ്യങ്ങൾ 5 കോടി ബാരൽ ഡീസലും, രാജ്യാന്തര ഊർജ ഏജൻസി അംഗങ്ങൾ 5 കോടി ബാരൽ ക്രൂഡ് ഓയിലും വിപണിയിലെത്തിക്കണമെന്നാണ് ഫ്രാൻസിന്റെ നിർദ്ദേശം. എന്നാൽ അമേരിക്ക ഏകപക്ഷീയമായി ഡീസൽ കയറ്റുമതി നിരോധിക്കില്ലെന്ന് ഉറപ്പുനൽകണമെന്ന വ്യവസ്ഥ യൂറോപ്പ് മുന്നോട്ടുവെക്കുന്നുണ്ട്. ഇറക്കുമതിയെ വലിയ തോതിൽ ആശ്രയിക്കുന്ന യൂറോപ്പിനെ സംബന്ധിച്ച് യുഎസ് ഏർപ്പെടുത്തുന്ന കയറ്റുമതി നിരോധനം അവരുടെ സാമ്പത്തിക ഭദ്രതയെ ദോഷകരമായി ബാധിക്കുമെന്ന് ഇ.യു. ട്രേഡ് ചീഫ് മറോസ് സൈഫ്കോവിച്ച് വ്യക്തമാക്കിയിട്ടുണ്ട്.
