ഓട്ടവ : ഒൻ്റാരിയോ ബ്രാംപ്ടണിലെ സ്റ്റെല്ലാൻ്റിസ് പ്ലാൻ്റ് വിൽപ്പനയിൽ കടുത്ത നടപടികൾക്കൊരുങ്ങി ഫെഡറൽ സർക്കാർ. വാഹന നിർമ്മാണ ശാല പ്രതിരോധ കരാർ കമ്പനിയായ റോഷെലിന് (Roshel) വിൽക്കാനുള്ള തീരുമാനം ഫെഡറൽ സർക്കാരുമായുള്ള കരാർ വ്യവസ്ഥകളുടെ ലംഘനമാണെന്ന് വ്യവസായ മന്ത്രി മെലനി ജോളി വ്യക്തമാക്കി. 2022-ലെ കരാർ പ്രകാരമുള്ള വ്യവസ്ഥകൾ പാലിക്കുന്നതിൽ കമ്പനി വീഴ്ച വരുത്തിയതോടെ സ്റ്റെല്ലാൻ്റിസിന് അനുവദിച്ച ഫെഡറൽ ഫണ്ടിങ് തിരികെ ലഭിക്കാൻ കോടതിയെ സമീപിക്കുമെന്നും മെലനി ജോളി പറഞ്ഞു. ജീപ്പ് കോമ്പസ് നിർമ്മാണം നിർത്തിവെച്ചതും പകരം മറ്റൊരു വാഹനം നിർമ്മിക്കാൻ തയ്യാറാകാത്തതും പ്ലാൻ്റ് അടച്ചുപൂട്ടിയതും കരാർ ലംഘനമാണെന്നും മന്ത്രി അറിയിച്ചു.
നിലവിലെ പ്രശ്നങ്ങൾ പരിഹരിക്കാൻ കമ്പനിക്ക് ഒരു മാസത്തെ സമയമുണ്ടെന്നും ഈ സമയപരിധിക്കുള്ളിൽ പ്രശ്നപരിഹാരം ഉണ്ടായില്ലെങ്കിൽ ഫെഡറൽ ഫണ്ടിങ് കരാർ റദ്ദാക്കുമെന്നും ഇതുവരെ നൽകിയ തുക പലിശ സഹിതം തിരികെ ലഭിക്കാൻ കേസ് നൽകുമെന്നും മെലനി ജോളി പറഞ്ഞു. ടൊറൻ്റോയിൽ സ്റ്റെല്ലാൻ്റിസ് കാനഡ സിഇഒ ട്രെവർ ലോംഗ്ലി, തൊഴിലാളി യൂണിയനായ യൂണിഫോർ (Unifor) പ്രതിനിധികൾ, ഒൻ്റാരിയോ പ്രീമിയർ ഡഗ് ഫോർഡ് എന്നിവരുമായി നടത്തിയ നിർണ്ണായക ചർച്ചകൾക്ക് ശേഷമാണ് മെലനി ജോളി ഈ കാര്യങ്ങൾ വ്യക്തമാക്കിയത്. ഒരു വർഷമായി പരിഹാരം കാണാൻ ശ്രമിച്ചിട്ടും കമ്പനി പ്ലാൻ്റ് വിൽപ്പനയുമായി മുന്നോട്ട് പോയത് അംഗീകരിക്കാനാവില്ലെന്നും മന്ത്രി പറയുന്നു.
