വിവാഹത്തിന് ദിവസങ്ങൾ മാത്രം ബാക്കിനിൽക്കെ ബെംഗളൂരുവിലുണ്ടായ ദാരുണമായ വാഹനാപകടത്തിൽ പ്രതിശ്രുത വധുവും ബന്ധുവും മരണപ്പെട്ടു. സോഫ്റ്റ്‌വെയർ എൻജിനീയറായ സിന്ധുശ്രീയും (29) അവസാന വർഷ ഡിപ്ലോമ വിദ്യാർഥിനിയായ വിദ്യയും (19) സഞ്ചരിച്ച ഇരുചക്രവാഹനത്തിൽ ദീപാംജലിനഗറിൽ വെച്ച് ലോറിയിടിക്കുകയായിരുന്നു. ഒരാൾക്ക് കൂടി ക്ഷണക്കത്ത് നൽകാനുണ്ടെന്ന് പറഞ്ഞ് വീട്ടിൽ നിന്നും ഇറങ്ങിയതായിരുന്നു ഇരുവരും.
വ്യാഴാഴ്ച ഹൽദി, വളയിടൽ ചടങ്ങുകളോടെ തുടങ്ങേണ്ടിയിരുന്ന വിവാഹ ആഘോഷങ്ങളുടെ സന്തോഷത്തിലായിരുന്നു ആ കുടുംബം. എന്നാൽ ഞായറാഴ്ച നടത്താനിരുന്ന വിവാഹ സൽക്കാരത്തിന് മുന്നോടിയായി മകളുടെ ചേതനയറ്റ ശരീരം മോർച്ചറിക്ക് മുന്നിൽ കണ്ട് പിതാവ് നഞ്ചുണ്ടപ്പ പൊട്ടിക്കരഞ്ഞത് കണ്ടുനിന്നവരുടെ കണ്ണീരണിയിച്ചു.
