ഷിക്കാഗോ : ഷിക്കാഗോയിലെ വെസ്റ്റേൺ സ്പ്രിങ്സിൽ ആംട്രാക് ട്രെയിൻ കാറിലിടിച്ച് രണ്ട് എലിമെന്‍ററി സ്കൂൾ വിദ്യാർത്ഥികൾ കൊല്ലപ്പെട്ടു. ബുധനാഴ്ച രാവിലെ 8 മണിയോടെയായിരുന്നു അപകടം. പ്ലെസന്റ്ഡെയ്ൽ സ്കൂൾ ഡിസ്ട്രിക്റ്റ് 107-ലെ വിദ്യാർത്ഥികളാണ് മരിച്ചത്. അപകടകാരണം വ്യക്തമല്ല. അന്വേഷണം പുരോഗമിക്കുന്നു.
വെസ്റ്റേൺ സ്പ്രിങ്സിലെ വുൾഫ് റോഡ് റെയിൽവേ ക്രോസിങ്ങിലാണ് അപകടമുണ്ടായത്. ക്രോസിങ് ഗേറ്റുകൾ കൃത്യമായി പ്രവർത്തിച്ചിരുന്നതായി അധികൃതർ വ്യക്തമാക്കി. ട്രെയിനിടിച്ച് വാഹനം പൂർണ്ണമായി കത്തി നശിച്ചു. കാറോടിച്ചിരുന്ന സ്ത്രീയെ ഗുരുതര പരുക്കുകളോടെ ലോയോള ആശുപത്രിയിൽ പ്രവേശിപ്പിച്ചു. ട്രെയിനിലുണ്ടായിരുന്ന 35 യാത്രക്കാരും സുരക്ഷിതരാണ്. അപകടത്തെ തുടർന്ന് മേഖലയിലെ ട്രെയിൻ ഗതാഗതം മണിക്കൂറുകളോളം തടസ്സപ്പെട്ടു.
