അലാസ്‌കയിലെ തിരഞ്ഞെടുപ്പ് ഫലങ്ങളുടെ ഔദ്യോഗിക സ്ഥിരീകരണം തടയണമെന്നാവശ്യപ്പെട്ട് യുഎസ് നീതിന്യായ വകുപ്പ് സമര്‍പ്പിച്ച ഹര്‍ജി ഫെഡറല്‍ കോടതി തള്ളി. ഡെമോക്രാറ്റിക് സ്ഥാനാർത്ഥി യുഎസ് സെനറ്റിലേക്ക് വിജയിച്ചാല്‍ ഫലപ്രഖ്യാപനം തടയണമെന്ന ആവശ്യവുമായാണ് നീതിന്യായ വകുപ്പ് കോടതിയെ സമീപിച്ചത്. ഇടക്കാല തിരഞ്ഞെടുപ്പിന് ദിവസങ്ങള്‍ മാത്രം ശേഷിക്കെയാണ് ട്രംപ് ഭരണകൂടത്തിന് തിരിച്ചടിയായ കോടതി വിധി പുറത്തുവന്നത്. അതേസമയം കോടതി വിധിക്കെതിരെ അപ്പീല്‍ നല്‍കുമെന്ന് യുഎസ് നീതിന്യായ വകുപ്പ് അറിയിച്ചു.
പ്രസിഡൻ്റ് ഡോണൾഡ് ട്രംപിന്‍റെ നിര്‍ദേശപ്രകാരമാണ് നീതിന്യായ വകുപ്പ് കഴിഞ്ഞ ആഴ്ച അസാധാരണമായ ഹര്‍ജി സമര്‍പ്പിച്ചത്. ഡാന്‍ സള്ളിവന് എന്ന പേരുള്ള രണ്ട് സ്ഥാനാർത്ഥികള്‍ മത്സരരംഗത്തുള്ളതിനാല്‍ വോട്ടര്‍മാര്‍ക്കിടയില്‍ ആശയക്കുഴപ്പം ഉണ്ടായിട്ടുണ്ടോയെന്നും ഇത് തിരഞ്ഞെടുപ്പ് ഫലത്തെ ബാധിച്ചിട്ടുണ്ടോയെന്നും പരിശോധിക്കണമെന്നായിരുന്നു ആവശ്യം. അന്വേഷണത്തിന് സമയം അനുവദിക്കുന്നതിനായി തിരഞ്ഞെടുപ്പ് ഫലത്തിന്‍റെ ഔദ്യോഗിക പ്രഖ്യാപനം വൈകിപ്പിക്കണമെന്നും വകുപ്പ് ആവശ്യപ്പെട്ടു.
എന്നാല്‍ നീതിന്യായ വകുപ്പിന്‍റെ ആവശ്യം നിയമപരമായും പ്രായോഗികമായും നിലനില്‍ക്കുന്നതല്ലെന്ന് യുഎസ് ജില്ലാ ജഡ്ജി ഷാരോണ്‍ ഗ്ലീസണ്‍ വ്യക്തമാക്കി. തിരഞ്ഞെടുപ്പ് ദിവസം ഡാനിയല്‍ ജെ. സള്ളിവന് ലഭിച്ച വോട്ടുകള്‍ എങ്ങനെ വേര്‍തിരിച്ചെടുക്കുമെന്നും വോട്ടര്‍മാരുടെ രഹസ്യസ്വഭാവം സംരക്ഷിച്ചുകൊണ്ട് എങ്ങനെ അന്വേഷണം നടത്തുമെന്നും വ്യക്തമാക്കുന്ന പ്രായോഗികമായ പദ്ധതിയൊന്നും സര്‍ക്കാര്‍ സമര്‍പ്പിച്ചിട്ടില്ലെന്ന് ജഡ്ജി ചൂണ്ടിക്കാട്ടി.
സംസ്ഥാനങ്ങള്‍ക്കു കീഴില്‍ നടക്കുന്ന തിരഞ്ഞെടുപ്പ് നടപടികളില്‍ ഫെഡറല്‍ ഭരണകൂടം ഇടപെടാനുള്ള ശ്രമങ്ങള്‍ക്കേറ്റ മറ്റൊരു തിരിച്ചടിയായാണ് വിധി വിലയിരുത്തപ്പെടുന്നത്. ഇടക്കാല തിരഞ്ഞെടുപ്പിന് മുന്നോടിയായി രാഷ്ട്രീയ നീക്കങ്ങള്‍ സജീവമായിരിക്കെയാണ് അലാസ്‌കയിലെ തിരഞ്ഞെടുപ്പ് നടപടികളുമായി ബന്ധപ്പെട്ട കോടതി വിധി പുറത്തുവന്നത്.
