ജനപ്രിയ ഓൺലൈൻ ഡേറ്റിങ് ആപ്പായ ‘ഗ്രൈൻഡർ’ ദുരുപയോഗം ചെയ്ത് ആളുകളെ അപായപ്പെടുത്തുന്ന കൗമാരക്കാരുടെ സംഘത്തിനെതിരെ മുന്നറിയിപ്പ് നൽകി നോർത്ത് വൻകൂവർ RCMP. വ്യാജ അക്കൗണ്ടുകൾ വഴി സൗഹൃദം സ്ഥാപിച്ച് നേരിട്ട് കൂടിക്കാഴ്ചയ്ക്കായി ഇരകളെ നിശ്ചിത സ്ഥലങ്ങളിൽ എത്തിച്ച ശേഷം ആക്രമണം നടത്തുകയാണ് ഈ സംഘത്തിന്‍റെ രീതി. 16 നും 20 നും ഇടയിൽ പ്രായമുള്ള കൗമാരക്കാരുടെ സംഘം ഇരകളെ ക്രൂരമായി മർദ്ദിക്കുകയും വാഹനങ്ങൾക്ക് കേടുപാടുകൾ വരുത്തുകയും ചെയ്യുന്നതായി അന്വേഷണ ഉദ്യോഗസ്ഥർ കണ്ടെത്തിയിട്ടുണ്ട്. ഓൺലൈൻ പ്ലാറ്റ്‌ഫോമുകൾ വഴി അപരിചിതരുമായി കൂടിക്കാഴ്ച നടത്തുമ്പോൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. ഇത്തരം ആക്രമണങ്ങൾക്ക് ഇരയായവർ ഭയം കൂടാതെ പരാതി നൽകാൻ മുന്നോട്ട് വരണമെന്നും അഭ്യർത്ഥിച്ചു. പ്രദേശത്തുനിന്ന് സംഭവദിവസങ്ങളിലെ സംശയാസ്പദമായ ഡാഷ്‌ക്യാം അല്ലെങ്കിൽ സുരക്ഷാ ക്യാമറ ദൃശ്യങ്ങൾ ലഭ്യമായിട്ടുള്ളവർ വിവരം ഉടൻ പൊലീസിനെയോ ക്രൈം സ്റ്റോപ്പേഴ്‌സിനെയോ അറിയിക്കണമെന്നും അന്വേഷണ ഉദ്യോഗസ്ഥർ നിർദ്ദേശിച്ചു.
ഓഗസ്റ്റിൽ നടന്ന മൂന്ന് വ്യത്യസ്‌ത ആക്രമണങ്ങളെ തുടർന്നാണ് RCMP അന്വേഷണം ആരംഭിച്ചത്. ഓഗസ്റ്റ് 27, 31 തീയതികളിൽ നടന്ന അക്രമ സംഭവങ്ങളിൽ ഇരകളുടെ പരാതി പ്രകാരം പൊലീസ് സിസിടിവി ദൃശ്യങ്ങൾ ശേഖരിച്ച് പരിശോധിച്ചിരുന്നു. ഈ പരിശോധനയിലാണ് ഓഗസ്റ്റ് 29-ന് ഒരു സ്‌കൂൾ പരിസരത്തു വച്ച് സമാനമായ രീതിയിൽ നടന്ന മൂന്നാമതൊരു അക്രമ സംഭവത്തെക്കുറിച്ച് അധികൃതർക്ക് നിർണായക വിവരം ലഭിക്കുന്നത്.
