വൈദ്യുതി സ്വയംപര്യാപ്തത ഉറപ്പാക്കുന്നതിനായി ഏകീകൃത എനർജി ഗ്രിഡ് രൂപീകരിക്കുന്നതിനുള്ള ധാരണാപത്രത്തിൽ എട്ട് കനേഡിയൻ പ്രവിശ്യകളും രണ്ട് ടെറിറ്ററികളും ഒപ്പുവെച്ചു. ഒൻ്റാരിയോയുടെ നേതൃത്വത്തിൽ നടന്ന ചർച്ചകൾക്കൊടുവിൽ ടൊറൻ്റോയിൽ നടന്ന ചടങ്ങിലാണ് കരാർ പ്രഖ്യാപിച്ചത്. ബ്രിട്ടീഷ് കൊളംബിയ, ആൽബർട്ട, സസ്ക്കച്ചെവൻ , മാനിറ്റോബ, ഒൻ്റാരിയോ, ന്യൂ ബ്രൺസ്വിക്, പ്രിൻസ് എഡ്വേഡ് ഐലൻഡ്, നോവ സ്കോഷ്യ എന്നീ പ്രവിശ്യകളും യൂക്കോൺ, നോർത്ത് വെസ്റ്റ് ടെറിറ്ററീസ് എന്നീ മേഖലകളുമാണ് പദ്ധതിയുടെ ഭാഗമാകും. നിലവിൽ 13 വ്യത്യസ്ത ഗ്രിഡുകളായി പ്രവർത്തിക്കുന്ന കാനഡയുടെ വൈദ്യുതി മേഖലയെ പരസ്പരം ബന്ധിപ്പിക്കുക എന്നതാണ് ലക്ഷ്യം.
പുതിയ ട്രാൻസ്മിഷൻ അടിസ്ഥാന സൗകര്യങ്ങളും വൈദ്യുതി പദ്ധതികളും നിർമ്മിച്ച് രാജ്യത്തുടനീളം ഒറ്റ ശൃംഖലയായി മാറ്റാനാണ് തീരുമാനം. നിലവിൽ ഒൻ്റാരിയോ ഉൾപ്പെടെയുള്ള പ്രവിശ്യകൾ അയൽ രാജ്യമായ അമേരിക്കയിലേക്ക് വൈദ്യുതി വിൽക്കുമ്പോൾ മറ്റ് പ്രവിശ്യകൾ ഉയർന്ന വിലയ്ക്ക് പുറത്തുനിന്ന് വൈദ്യുതി വാങ്ങേണ്ടി വരുന്ന സാഹചര്യം ഒഴിവാക്കാൻ ഈ നീക്കം സഹായിക്കും. എന്നാൽ പദ്ധതിയുടെ പൂർത്തീകരണത്തിനായുള്ള കൃത്യമായ സമയപരിധിയോ പ്രതീക്ഷിക്കുന്ന ചെലവോ നിലവിൽ പുറത്തുവിട്ടിട്ടില്ല.
