ടൊറൻ്റോ : കാനഡയ്‌ക്കെതിരായ പ്രസിഡൻ്റ് ഡോണൾഡ് ട്രംപിന്‍റെ വ്യാപാര നയവും ഇറക്കുമതി തീരുവകളും അമേരിക്കന്‍ രാഷ്ട്രീയത്തില്‍ വലിയ തിരിച്ചടിയാകുന്നു. ഇടക്കാല തിരഞ്ഞെടുപ്പില്‍ തിരിച്ചടി നേരിട്ടതോടെ ട്രംപിന്‍റെ തീരുവ നയത്തില്‍നിന്ന് അകലം പാലിക്കാനുള്ള ശ്രമത്തിലാണ് റിപ്പബ്ലിക്കന്‍ നേതാക്കള്‍. അതേസമയം കാനഡയുമായുള്ള വ്യാപാരയുദ്ധം അവസാനിപ്പിക്കാന്‍ ആവശ്യമായ രാഷ്ട്രീയ പിന്തുണ ഉറപ്പാക്കാമെന്ന പ്രതീക്ഷയിലാണ് ഡെമോക്രാറ്റുകള്‍. കാനഡയില്‍നിന്നുള്ള വാഹനങ്ങള്‍, സ്റ്റീല്‍ ഉള്‍പ്പെടെയുള്ള ഉല്‍പ്പന്നങ്ങള്‍ക്ക് ഏര്‍പ്പെടുത്തിയ തീരുവ അമേരിക്കന്‍ സമ്പദ്‌വ്യവസ്ഥയെയും ഉപഭോക്താക്കളെയും പ്രതികൂലമായി ബാധിക്കുന്നുവെന്ന വിമര്‍ശനവും ശക്തമാണ്.
തിരഞ്ഞെടുപ്പില്‍ പരാജയപ്പെട്ട മിഷിഗണിലെ റിപ്പബ്ലിക്കന്‍ സെനറ്റ് സ്ഥാനാർത്ഥി മൈക്ക് റോജേഴ്‌സിന്‍റെ നിലപാടുമാറ്റം ഇതിന് ഉദാഹരണമാണ്. ജൂലൈയില്‍ കാനഡയിലെ കാട്ടുതീയുടെ പുക അമേരിക്കയിലേക്ക് വ്യാപിച്ചപ്പോള്‍ കാനഡയ്‌ക്കെതിരെ കൂടുതല്‍ സാമ്പത്തിക നടപടികള്‍ വേണമെന്ന് റോജേഴ്‌സ് ആവശ്യപ്പെട്ടിരുന്നു. ട്രംപിന്‍റെ തീരുവ നയത്തെ അനുകൂലിച്ച അദ്ദേഹം കാനഡയില്‍നിന്നുള്ള വാഹന ഇറക്കുമതിയെയും വിമര്‍ശിച്ചിരുന്നു. എന്നാല്‍ തിരഞ്ഞെടുപ്പിന് തൊട്ടുമുമ്പ് നിലപാട് മാറ്റിയ റോജേഴ്‌സ് കാനഡ അമേരിക്കയുടെ ശത്രുവല്ലെന്ന് പ്രഖ്യാപിച്ചു. ലബാറ്റ് ബ്ലൂ ബിയര്‍ കുടിച്ചുകൊണ്ട് ഹോക്കിയെക്കുറിച്ച് പരാമര്‍ശിക്കുന്ന പരസ്യത്തിലൂടെയായിരുന്നു തീരുവകള്‍ അവസാനിപ്പിക്കണമെന്ന ആവശ്യം അദ്ദേഹം മുന്നോട്ടുവെച്ചത്. ട്രംപിന്‍റെ വ്യാപാരയുദ്ധത്തില്‍നിന്ന് അകലം പാലിക്കാന്‍ ശ്രമിച്ച നിരവധി റിപ്പബ്ലിക്കന്‍ നേതാക്കളില്‍ ഒരാളാണ് റോജേഴ്‌സ്. കൂടാതെ മെയ്ൻ, കാൻസസ് സംസ്ഥാനങ്ങളിലെ തിരഞ്ഞെടുപ്പുകളില്‍ തിരിച്ചടി ഒഴിവാക്കാന്‍ കാനഡയ്‌ക്കെതിരായ ചില തീരുവകള്‍ പിന്‍വലിക്കണമെന്ന് റിപ്പബ്ലിക്കന്‍ സ്ഥാനാർത്ഥികള്‍ ട്രംപിനോട് ആവശ്യപ്പെട്ടിരുന്നു.
കാനഡയ്‌ക്കെതിരായ തീരുവകള്‍ പിന്‍വലിക്കാന്‍ ഡെമോക്രാറ്റുകള്‍ കോണ്‍ഗ്രസില്‍ നീക്കം ശക്തമാക്കുകയാണ്. കാനഡയില്‍നിന്നുള്ള ഉല്‍പ്പന്നങ്ങളുടെ തീരുവ റദ്ദാക്കുന്നതിന് വ്യാപകമായ പിന്തുണയുണ്ടെന്ന് സെനറ്റ് ഫിനാന്‍സ് കമ്മിറ്റിയിലെ മുതിര്‍ന്ന അംഗം റോണി വൈഡന്‍ വ്യക്തമാക്കി. ട്രംപിന്‍റെ വീറ്റോ മറികടക്കാന്‍ ആവശ്യമായ റിപ്പബ്ലിക്കന്‍ പിന്തുണയും സമാഹരിക്കാനാകുമെന്നാണ് ഡെമോക്രാറ്റുകളുടെ പ്രതീക്ഷ. മിഷിഗണില്‍ റോജേഴ്‌സിനെ പരാജയപ്പെടുത്തിയ ഡെമോക്രാറ്റിക് സെനറ്റര്‍ സ്ഥാനാർത്ഥി അബ്ദുള്‍ എല്‍-സയ്ദും കാനഡയ്‌ക്കെതിരായ തീരുവകള്‍ അവസാനിപ്പിക്കുമെന്ന് പ്രഖ്യാപിച്ചിട്ടുണ്ട്. അമേരിക്കയുടെ ഏറ്റവും വലിയ വ്യാപാര പങ്കാളിക്കെതിരെ വ്യാപാരയുദ്ധം നടത്തുന്നതിന് സാമ്പത്തികമായ കാരണമില്ലെന്നും അദ്ദേഹം വ്യക്തമാക്കി.
തീരുവകള്‍ അമേരിക്കന്‍ സമ്പദ്‌വ്യവസ്ഥയെ ബാധിക്കുന്നുവെന്ന പൊതുവികാരം തിരഞ്ഞെടുപ്പ് ഫലത്തിലും പ്രതിഫലിച്ചതായാണ് വിലയിരുത്തല്‍. അമേരിക്കന്‍ വോട്ടര്‍മാരില്‍ മൂന്നില്‍ രണ്ടുപേരും തീരുവകള്‍ ദേശീയ സമ്പദ്‌വ്യവസ്ഥയെയും പ്രാദേശിക സമ്പദ്‌വ്യവസ്ഥയെയും പ്രതികൂലമായി ബാധിച്ചുവെന്ന് അഭിപ്രായപ്പെട്ടതായി എക്‌സിറ്റ് പോള്‍ വിവരങ്ങള്‍ സൂചിപ്പിക്കുന്നു. ഇറാന്‍ യുദ്ധവും തീരുവകളും ചേര്‍ന്ന് വിലക്കയറ്റത്തിന് ആക്കം കൂട്ടിയതും തിരിച്ചടിക്ക് കാരണമായി.
