കനത്ത മഴയെത്തുടർന്നുണ്ടായ പ്രളയത്തിലും മണ്ണിടിച്ചിൽ ഭീഷണിയിലും വാൻകൂവർ ദ്വീപിന്റെ (Vancouver Island) വടക്കുപടിഞ്ഞാറൻ തീരത്തുള്ള സെബാലോസ് (Zeballos) ഗ്രാമത്തിൽ ഒഴിഞ്ഞുപോകാൻ ഉത്തരവ്. സംഭവത്തെ തുടർന്ന് ഗ്രാമത്തിൽ പ്രാദേശിക അടിയന്തരാവസ്ഥയും പ്രഖ്യാപിച്ചിട്ടുണ്ട്. 125 ഓളം പേർ മാത്രമാണ് ഈ ഗ്രാമത്തിൽ താമസിക്കുന്നത്.

സ്ട്രാത്ത്കോണ റീജിയണൽ ഡിസ്ട്രിക്റ്റ് നൽകുന്ന വിവരമനുസരിച്ച്, പാണ്ടോറ ക്രസന്റ്, മക്വിന്ന അവന്യൂ എന്നിവിടങ്ങളിലെ 22 വീടുകളെയും സ്വത്തുക്കളെയും ഒഴിയൽ ഉത്തരവ് ബാധിച്ചിട്ടുണ്ട്. ഇതിനുപുറമെ ഫെറിസ് റോഡിലെ മൂന്ന് വിലാസങ്ങളിൽ താമസിക്കുന്നവർക്ക് ജാഗ്രതാ നിർദ്ദേശവും നൽകിയിട്ടുണ്ട്. പാണ്ടോറ, ഗോൾഡ് വാലി, റെനോ റോഡുകൾ ഉൾപ്പെടുന്ന പ്രദേശത്തുള്ളവരോട് സ്വന്തം വീടുകളിൽ തന്നെ സുരക്ഷിതമായി തുടരാനും നിർദ്ദേശമുണ്ട്. ജീവനും സുരക്ഷയ്ക്കും വലിയ ഭീഷണിയുള്ളതിനാൽ ഉത്തരവ് ബാധിച്ച പ്രദേശത്തുള്ളവർ ഉടൻ തന്നെ ഒഴിഞ്ഞുപോകണമെന്ന് ‘എമർജൻസി ഇൻഫോ ബി.സി.’ അറിയിച്ചു.

മണ്ണിടിച്ചിലിൽ നിന്നുള്ള അവശിഷ്ടങ്ങൾ പ്രദേശത്തെ ഗുരുതരമായി ബാധിച്ചിട്ടുണ്ടെന്നും ജിയോടെക്നിക്കൽ പരിശോധന പൂർത്തിയാകുന്നതുവരെ കൂടുതൽ മണ്ണിടിച്ചിലിന് സാധ്യതയുണ്ടോ എന്ന് വ്യക്തമല്ലെന്നും സ്ട്രാത്ത്കോണ റീജിയണൽ ഡിസ്ട്രിക്റ്റ് വ്യക്തമാക്കി. പ്രതിരോധ പ്രവർത്തനങ്ങളുടെ ഭാഗമായി എമർജൻസി ഓപ്പറേഷൻസ് സെന്റർ പ്രവർത്തനക്ഷമമാക്കിയിട്ടുണ്ട്. പൊതുജന സുരക്ഷയ്ക്കാണ് മുൻഗണന നൽകുന്നതെന്നും കൂടുതൽ വിവരങ്ങൾ ലഭ്യമാകുന്ന മുറയ്ക്ക് അറിയിക്കുമെന്നും അധികൃതർ അറിയിച്ചു.

രാത്രിയിൽ ഗ്രാമത്തിൽ മണ്ണിടിച്ചിൽ ഉണ്ടായതായി എമർജൻസി മാനേജ്‌മെന്റ് ആന്റ് ക്ലൈമറ്റ് റെഡിനസ് മന്ത്രാലയം വ്യക്തമാക്കി. അർദ്ധരാത്രിയോടെ ശക്തമായ മഴ ആരംഭിച്ചെന്നും വെള്ളിയാഴ്ച പുലർച്ചെയോടെ പ്രളയം തുടങ്ങിയെന്നുമാണ് ഏഹാത്തെസാറ്റ് ഫസ്റ്റ് നേഷൻ ചീഫ് സൈമൺ ജോൺ പറയുന്നത്. പുലർച്ചെ 3 മണിയോടെ വീടുകളിൽ വെള്ളം കയറുകയാണെന്ന് അയൽക്കാരൻ അറിയിച്ചതായും, മുറ്റത്തടക്കം വെള്ളം നിറഞ്ഞിരുന്നതായും അദ്ദേഹം പറഞ്ഞു. തൊഴിലാളികൾ വെള്ളത്തിന്റെ ഗതി തിരിച്ചുവിട്ടെങ്കിലും വീടുകൾക്ക് മുകളിലായി വൻതോതിൽ അവശിഷ്ടങ്ങൾ അടിഞ്ഞുകൂടിയിട്ടുണ്ടെന്നും ഇത് ഏത് നിമിഷവും താഴേക്ക് പതിക്കാമെന്നും അദ്ദേഹം ആശങ്ക പ്രകടിപ്പിച്ചു.

2018-ൽ സെബാലോസിന് മുകളിലുള്ള മലനിരകളിൽ ഉണ്ടായ കാട്ടുതീ ഗ്രാമത്തിലേക്കുള്ള ചരിവിന് കേടുപാടുകൾ വരുത്തിയിരുന്നുവെന്നും, നിലവിലുള്ള പ്രളയത്തിന് അതുമായി ബന്ധമുണ്ടെന്നും അദ്ദേഹം ചൂണ്ടിക്കാട്ടി. ഏകദേശം 12 മണിക്കൂറിനുള്ളിൽ പ്രദേശത്ത് 140 മില്ലീമീറ്ററോളം മഴയാണ് പെയ്തത്. കഴിഞ്ഞ ആഴ്ച നടന്നുകടക്കാൻ കഴിഞ്ഞിരുന്ന സെബാലോസ് നദി ഇപ്പോൾ കവിഞ്ഞൊഴുകുന്ന അവസ്ഥയിലാണുള്ളത്. സെബാലോസ് ഉൾപ്പെടെ വാൻകൂവർ ദ്വീപിന്റെ വിവിധ ഭാഗങ്ങളിൽ പരിസ്ഥിതി കാനഡ കനത്ത മഴ മുന്നറിയിപ്പ് പുറപ്പെടുവിച്ചിട്ടുണ്ട്. ബി.സി. തീരത്തെ ബാധിക്കാൻ പോകുന്ന ശക്തമായ മഴയും കാറ്റുമുള്ള കാലാവസ്ഥാ വ്യതിയാനങ്ങളുടെ പരമ്പരയിലെ ആദ്യത്തെ ശക്തമായ കൊടുങ്കാറ്റാണിതെന്നാണ് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നത്.