ആരാധകർക്കായി പുതിയ ചിത്രങ്ങളും വീഡിയോകളും പങ്കുവെക്കുന്നതിനായി 76-ാം വയസ്സിൽ ഓൺലിഫാൻസ് (OnlyFans) അക്കൗണ്ട് ആരംഭിച്ചിരിക്കുകയാണ് ‘ഫാൽക്കൺ ക്രസ്റ്റ്’, ‘ഫ്രണ്ട്സ്’ തുടങ്ങിയ പരമ്പരകളിലൂടെ പ്രശസ്തയായ നടിയും മോഡലുമായ മോർഗൻ ഫെയർചൈൽഡ്. ‘ക്രിയേറ്റേഴ്‌സ് ഇൻക്’ എന്ന കമ്പനി വഴിയാണ് താരം ഈ പുതിയ സംരംഭത്തിന് തുടക്കമിട്ടിരിക്കുന്നത്.
എന്നാൽ എല്ലാവരും കരുതുന്നത് പോലെയുള്ള ഉള്ളടക്കമല്ല ഇതിൽ ഉണ്ടായിരിക്കുകയെന്ന് മോർഗൻ വ്യക്തമാക്കുന്നു. തമാശ നിറഞ്ഞ നിമിഷങ്ങളും മനസ്സിലെ ചിന്തകളുമാണ് ഇതിലൂടെ പങ്കുവെക്കുകയെന്ന് താരം ‘പീപ്പിൾ’ മാഗസിനോട് പറഞ്ഞു. പതിറ്റാണ്ടുകൾ നീണ്ട അഭിനയ ജീവിതത്തിൽ താൻ ചെയ്ത കഥാപാത്രങ്ങളിലൂടെയും വേഷവിധാനങ്ങളിലൂടെയുമാണ് ആളുകൾക്ക് തന്നെ അറിയുന്നത്. എന്നാൽ താനൊരു സയൻസ് പ്രേമിയാണെന്ന കാര്യവും സഹോദരിയോടൊപ്പം തമാശകൾ പറഞ്ഞു ചിരിക്കുന്ന യഥാർത്ഥ വ്യക്തിത്വവും ആരാധകർക്ക് അറിയില്ലെന്നും, അത് പങ്കുവെക്കാനാണ് ഈ പ്ലാറ്റ്‌ഫോം ഉപയോഗിക്കുന്നതെന്നും മോർഗൻ കൂട്ടിച്ചേർത്തു.
ഡെന്ന മിൽസ്, ഷാനൺ എലിസബത്ത്, ജാമി പ്രെസ്ലി എന്നിവർക്ക് ശേഷം മോർഗൻ ഫെയർചൈൽഡിനെയും ഓൺലിഫാൻസിലേക്ക് എത്തിച്ചിരിക്കുന്നത് ‘ക്രിയേറ്റേഴ്‌സ് ഇൻക്’ സി.ഇ.ഓ ആൻഡി ബാച്ച്മാനാണ്. സിനിമാലോകം ഒരു താരത്തിന്റെ ജനപ്രീതി അളക്കുന്നത് അവരുടെ പുതിയ ചിത്രങ്ങളെ വെച്ചാണെങ്കിലും ആരാധകർക്ക് അതല്ല പ്രധാനം എന്നും, ഈ പ്ലാറ്റ്‌ഫോം വഴി താരത്തിന് ആരാധകരുമായി നേരിട്ട് സംവദിക്കാൻ സാധിക്കുമെന്നും അദ്ദേഹം പറഞ്ഞു.
നേരത്തെ 85-ാം വയസ്സിൽ പ്രശസ്ത നടി ഡോണ മിൽസും ഓൺലിഫാൻസിൽ അക്കൗണ്ട് തുറന്നിരുന്നു. ‘നോട്ട്സ് ലാൻഡിങ്’ കാലം മുതൽ തന്നെ പിന്തുണയ്ക്കുന്ന ആരാധകരുമായി നേരിട്ട് ആശയവിനിമയം നടത്താനാണ് താൻ ഈ പ്ലാറ്റ്‌ഫോമിൽ എത്തിയതെന്നായിരുന്നു ഡോണ മിൽസ് പ്രതികരിച്ചത്. ഒരു മാസം കൊണ്ട് തന്നെ ഡോണ മിൽസിന് ഈ പ്ലാറ്റ്‌ഫോമിലൂടെ ലക്ഷക്കണക്കിന് ഡോളറിന്റെ വരുമാനം ലഭിച്ചതായി ആൻഡി ബാച്ച്മാൻ വെളിപ്പെടുത്തിയിരുന്നു.
