പതിറ്റാണ്ടുകളായി തുടർന്നുപോന്ന ഡേ ലൈറ്റ് സേവിങ് ടൈം അവസാനിപ്പിച്ച് ആൽബർട്ട സർക്കാർ. നവംബർ 1 ഞായറാഴ്ച മുതൽ പ്രവിശ്യയിൽ വർഷത്തിൽ രണ്ടുതവണ ക്ലോക്കുകൾ മുന്നോട്ടും പിന്നോട്ടും മാറ്റുന്ന രീതി പൂർണ്ണമായി ഒഴിവാക്കും. ഇനി മുതൽ മൗണ്ടൻ ഡേലൈറ്റ് ടൈമും (MDT) മൗണ്ടൻ സ്റ്റാൻഡേർഡ് ടൈമും (MST) മാറിമാറി ഉപയോഗിക്കുന്നതിന് പകരം, ‘ആൽബർട്ട ടൈം’ (ABT – UTC-6:00) എന്ന പുതിയ സ്ഥിരമായ സമയക്രമീകരണം നടപ്പിൽ വരും.
വർഷത്തിലൊരിക്കൽ ക്ലോക്കിലെ സമയം മാറ്റുന്നത് ജനങ്ങളുടെ ദൈനംദിന ജീവിതചര്യകളിലും ശാരീരിക-മാനസിക ആരോഗ്യത്തിലും ഉണ്ടാക്കുന്ന തടസ്സങ്ങൾ കുറയ്ക്കുക എന്ന ലക്ഷ്യത്തോടെയാണ് ഈ തീരുമാനം. കാനഡയിൽ നൂറിലധികം വർഷത്തെ ചരിത്രമുള്ള ഡേലൈറ്റ് സേവിങ് സമ്പ്രദായത്തിനാണ് ആൽബർട്ട സർക്കാർ ഇതിലൂടെ അന്ത്യം കുറിക്കുന്നത്.
അതേസമയം, പുതിയ സമയക്രമത്തിലേക്ക് മാറിയ ശേഷമുള്ള ആദ്യ വർഷത്തെ പ്രത്യാഘാതങ്ങളും അനുഭവങ്ങളും സർക്കാർ സൂക്ഷ്മമായി നിരീക്ഷിക്കും. പൊതുജനങ്ങളിൽ നിന്നും വിവിധ മേഖലകളിൽ നിന്നുമുള്ള അഭിപ്രായങ്ങൾ ക്രോഡീകരിച്ച ശേഷമായിരിക്കും മറ്റ് അവലോകനങ്ങൾ നടത്തുകയെന്ന് പ്രവിശ്യാ ഭരണകൂടം അറിയിച്ചു. സ്ഥിരമായ ഈ സമയമാറ്റം സാമ്പത്തിക-വ്യാവസായിക രംഗങ്ങളിൽ പ്രതീക്ഷിച്ച രീതിയിൽ പ്രയോജനപ്പെടുന്നുണ്ടോ എന്ന് സർക്കാർ വിലയിരുത്തും.
