പ്രവിശ്യാ തിരഞ്ഞെടുപ്പിലുണ്ടായ കനത്ത പരാജയം മറികടക്കാൻ പുതിയ നേതൃത്വത്തെ തിരഞ്ഞെടുത്തതായി ബി.സി. എൻ.ഡി.പി അറിയിച്ചു. വ്യാഴാഴ്ച നടന്ന ബി.സി. എൻ.ഡി.പി (BC NDP) കോക്കസ് യോഗത്തിനൊടുവിൽ, പാർട്ടിയുടെ ഇടക്കാല നേതാവായി ജെന്നിഫർ വൈറ്റ്‌സൈഡ് തിരഞ്ഞെടുക്കപ്പെട്ടു. കോക്കസ് യോഗത്തിൽ നിയമസഭാ ഹൗസ് ലീഡറായി മൈക്ക് ഫാർൺവർത്തിനെയും ‘കോക്കസ് ചെയർ’ ആയി നിക്കി ശർമ്മയേയും തിരഞ്ഞെടുത്തു. പ്രീമിയർ ഡേവിഡ് എബി യോഗത്തിൽ പങ്കെടുത്തില്ല.
തിരഞ്ഞെടുപ്പിലുണ്ടായ കനത്ത പരാജയത്തിന് പിന്നാലെ, നിയമസഭാ മന്ദിരത്തിൽ ചേർന്ന യോഗത്തിൽ—അഞ്ച് മണിക്കൂറോളം നീണ്ട ചർച്ചകൾക്കൊടുവിലാണ് തൊഴിൽ മന്ത്രിയായിരുന്ന വൈറ്റ്‌സൈഡിന് പുതിയ കോക്കസ് അംഗങ്ങളുടെ പിന്തുണ നേടാൻ സാധിച്ചത്. ഈ തിരഞ്ഞെടുപ്പിലൂടെ, ബ്രിട്ടിഷ് കൊളംബിയയിലെ ജനങ്ങൾ പാർട്ടിക്കൊരു മുന്നറിയിപ്പ് നൽകിയതായി ‘ന്യൂ വെസ്റ്റ്മിൻസ്റ്റർ-കോക്വിറ്റ്‌ലാം’ മണ്ഡലത്തിൽ നിന്ന് വീണ്ടും വിജയിച്ച വൈറ്റ്‌സൈഡ് പറഞ്ഞു. നേരത്തെ വിദ്യാഭ്യാസ മന്ത്രിയായും, മാനസികാരോഗ്യം ലഹരിവിമുക്ത കാര്യങ്ങൾക്കായുള്ള മന്ത്രിയായും വൈറ്റ്‌സൈഡ് സേവനമനുഷ്ഠിച്ചിട്ടുണ്ട്. താത്കാലിക നേതാവ് എന്ന പദവി ഏറ്റെടുക്കുന്നതോടെ, സ്ഥിരം നേതാവാകാനുള്ള മത്സരത്തിൽ നിന്ന് വൈറ്റ്‌സൈഡ് ഒഴിവാക്കപ്പെടും.
