കാനഡയിൽ ഏറ്റവും ഉയർന്ന വേതനം നൽകുന്ന രണ്ടാമത്തെ പ്രവിശ്യയായി ഒൻ്റാരിയോ. തൊഴിലാളികൾക്ക് ആശ്വാസമായി ഒക്ടോബർ ഒന്നു മുതൽ ഒൻ്റാരിയോയിലെ മിനിമം വേതനം 17.60 ഡോളറിൽ നിന്ന് 17.95 ഡോളറായി ഉയരും. ഇതോടെ പ്രതിവാരം 40 മണിക്കൂർ ജോലി ചെയ്യുന്ന തൊഴിലാളിക്ക് പ്രതിവർഷം 728 ഡോളർ അധിക വരുമാനം ലഭിക്കും. പണപ്പെരുപ്പത്തിന് അനുസരിച്ച് ‘ഒൻ്റാരിയോ കൺസ്യൂമർ പ്രൈസ് ഇൻഡക്സ്’ ഉപയോഗിച്ചാണ് മിനിമം വേതന വർധന നടപ്പിലാക്കുന്നത്.
പൊതുവായ മിനിമം വേതനത്തിനൊപ്പം 18 വയസ്സിന് താഴെയുള്ള വിദ്യാർത്ഥികൾ, വീട്ടിലിരുന്ന് ജോലി ചെയ്യുന്നവർ, വന്യജീവി ഗൈഡുകൾ എന്നിവരുടെ വേതനത്തിലും വർധനയുണ്ടായിട്ടുണ്ട്. വിദ്യാർത്ഥികളുടെ മണിക്കൂർ വേതനം 16.60 ഡോളറിൽ നിന്ന് 16.90 ഡോളറായും, വീട്ടിലിരുന്ന് ജോലി ചെയ്യുന്നവരുടേത് 19.35 ഡോളറിൽ നിന്ന് 19.70 ഡോളറായും ഉയരും. കൂടാതെ ഗൈഡുകൾക്കുള്ള പ്രതിദിന വേതന നിരക്കിലും ആനുപാതികമായ വർധന വരുത്തി. ആഴ്ചയിൽ 44 മണിക്കൂറിൽ കൂടുതൽ ജോലി ചെയ്യുന്നവർക്കുള്ള ഓവർടൈം വേതനം ഇനി മുതൽ മണിക്കൂറിന് 26.93 ഡോളറായിരിക്കും.
