തിയേറ്ററുകളിൽ പ്രേക്ഷകർക്ക് വേറിട്ടൊരു ദൃശ്യവിരുന്നൊരുക്കിയ ‘GU’ (ഗു) എന്ന മിസ്റ്ററി ഹൊറർ ചിത്രം പ്രമുഖ മലയാളം ഒടിടി പ്ലാറ്റ്ഫോമായ മനോരമമാക്സിൽ സ്ട്രീമിങ് ആരംഭിച്ചു. വടക്കൻ കേരളത്തിലെ പ്രാദേശിക മിത്തുകളിലും കേട്ടുകേൾവികളിലും നിറഞ്ഞുനിൽക്കുന്ന ‘ഗുളികൻ’ എന്ന സങ്കല്പത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. നാട്ടുഭീതിയുടേയും അദൃശ്യശക്തികളുടേയും പശ്ചാത്തലത്തിൽ വികസിക്കുന്ന ഈ സിനിമ ജൂൺ 19 മുതലാണ് പ്രേക്ഷകരിലേക്ക് എത്തിയത്. അഞ്ഞൂറിലധികം ചിത്രങ്ങളുള്ള മനോരമമാക്സിന്റെ വലിയ സിനിമ ശേഖരത്തിലേക്കാണ് പുതിയ ചിത്രമായി ‘ഗു’വും കടന്നുവന്നിരിക്കുന്നത്.
വടക്കൻ കേരളത്തിലുള്ള തങ്ങളുടെ കുടുംബ തറവാട്ടിലേക്ക് അവധിക്കാലം ചെലവഴിക്കാനെത്തുന്ന ഒരു കുടുംബത്തിന്റെ കഥയാണ് ചിത്രം പറയുന്നത്. യുക്തിവാദിയായ സായിയും ഭാര്യ മിനിയും അവരുടെ ഏഴുവയസ്സുകാരിയായ മകൾ മിന്നയുമാണ് പ്രധാന കഥാപാത്രങ്ങൾ. തറവാട്ടിലെ ഇരുണ്ട അന്തരീക്ഷവും കാവുകളും മിന്ന എന്ന കൊച്ചുപെൺകുട്ടിയെ അവിടുത്തെ പ്രാദേശിക കഥകളിലേക്കും ഗുളികൻ എന്ന ശക്തിയിലേക്കും ആകർഷിക്കുന്നു. തുടർന്ന് അവൾക്ക് ചുറ്റും നടക്കുന്ന വിചിത്രമായ സംഭവങ്ങളിലൂടെയാണ് സംവിധായകൻ മനു രാധാകൃഷ്ണൻ കഥ മുന്നോട്ട് കൊണ്ടുപോകുന്നത്. മലബാറിലെ തെയ്യം തനിമയും സൈക്കോളജിക്കൽ സസ്പെൻസും കൃത്യമായി കോർത്തിണക്കാൻ ചിത്രത്തിന് കഴിഞ്ഞിട്ടുണ്ട്.
ചിത്രത്തിൽ യുക്തിവാദിയായ അച്ഛൻ കഥാപാത്രത്തെ സൈജു കുറുപ്പ് മനോഹരമായി അവതരിപ്പിച്ചപ്പോൾ, ‘മാളികപ്പുറം’ എന്ന സിനിമയിലൂടെ ശ്രദ്ധേയയായ ബാലതാരം ദേവനന്ദ മിന്നയായി വീണ്ടും മികച്ച പ്രകടനം കാഴ്ചവെച്ചു. പാലക്കാടുള്ള ഒരു പുരാതന തറവാട്ടിൽ ചിത്രീകരിച്ച ഈ സിനിമ നാട്ടിൻപുറത്തെ ഭയവും തെയ്യത്തിന്റെ തനതായ സംസ്കാരവും ഒരേപോലെ ദൃശ്യവൽക്കരിച്ചിരിക്കുന്നു. മണിയൻപിള്ള രാജു പ്രൊഡക്ഷൻസിന്റെ ബാനറിൽ മണിയൻപിള്ള രാജുവാണ് ഈ ചിത്രം നിർമ്മിച്ചിരിക്കുന്നത്. കെട്ടുകഥകൾ എന്ന് വിശ്വസിച്ചിരുന്ന കാര്യങ്ങൾ യാഥാർത്ഥ്യമായി മുന്നിലെത്തുമ്പോഴുണ്ടാകുന്ന ഭീതി അനുഭവിച്ചറിയാൻ മനോരമമാക്സിലൂടെ ഇപ്പോൾ പ്രേക്ഷകർക്ക് സാധിക്കും.
