അറ്റ്ലാന്റ : അമേരിക്കന്‍ ഇടക്കാല തിരഞ്ഞെടുപ്പില്‍ ജോര്‍ജിയ സംസ്ഥാന ഗവര്‍ണറായി ഡെമോക്രാറ്റിക് പാര്‍ട്ടിയുടെ കീഷ ലാന്‍സ് ബോട്ടംസ് തിരഞ്ഞെടുക്കപ്പെട്ടു. റിപ്പബ്ലിക്കന്‍ സ്ഥാനാർത്ഥി റിക്ക് ജാക്‌സണെ പരാജയപ്പെടുത്തിയാണ് കീഷ വിജയം നേടിയത്. ഇതോടെ ജോര്‍ജിയയുടെ ചരിത്രത്തില്‍ ഗവര്‍ണറായി തിരഞ്ഞെടുക്കപ്പെടുന്ന ആദ്യ കറുത്തവര്‍ഗ വനിത എന്ന നേട്ടവും കീഷ ലാന്‍സ് ബോട്ടംസ് സ്വന്തമാക്കി. സംസ്ഥാനത്ത് 1998-നുശേഷം ഗവര്‍ണര്‍ സ്ഥാനത്ത് വിജയിക്കുന്ന ആദ്യ ഡെമോക്രാറ്റിക് സ്ഥാനാർത്ഥിയുമാണ് കീഷ.
അറ്റ്ലാന്‍റയുടെ മുന്‍ മേയറായ കീഷ ലാന്‍സ് ബോട്ടംസ്, തിരഞ്ഞെടുപ്പ് പ്രചാരണത്തില്‍ ആരോഗ്യപരിരക്ഷാ വികസനം, മിനിമം വേതന വര്‍ധന, പൊതുപ്രവര്‍ത്തകര്‍ക്കുള്ള വേതനവര്‍ധന, സ്ത്രീകളുടെ അവകാശങ്ങള്‍, സംസ്ഥാന നയങ്ങളില്‍ മാറ്റം എന്നിവയാണ് പ്രധാനമായി ഉയര്‍ത്തിക്കാട്ടിയത്.
ജോര്‍ജിയയില്‍ കഴിഞ്ഞ കുറച്ച് വര്‍ഷങ്ങളായി ഡെമോക്രാറ്റിക് പാര്‍ട്ടിയുടെ സ്വാധീനം വര്‍ധിച്ചു വരികയാണ്. ജനസംഖ്യാ മാറ്റം, പ്രത്യേകിച്ച് മെട്രോ അറ്റ്ലാന്റ മേഖലയിലെ വളര്‍ച്ച, ഈ തിരഞ്ഞെടുപ്പ് ഫലത്തിലും പ്രധാന പങ്കുവഹിച്ചുവെന്ന് രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു. ഈ വിജയം ജോര്‍ജിയയിലെ രാഷ്ട്രീയ ഭൂപടത്തില്‍ നിര്‍ണായക മാറ്റത്തിന്റെ സൂചനയായി വിലയിരുത്തപ്പെടുന്നു.
