2026 ഏഷ്യൻ ഗെയിംസ് ഇന്ത്യ: ഐച്ചി-നഗോയയിൽ നടക്കുന്ന ഏഷ്യൻ ഗെയിംസിന്റെ 12-ാം ദിവസം കോമ്പൗണ്ട് ആർച്ചറി താരങ്ങൾ ഇന്ത്യക്കായി രണ്ട് സ്വർണ മെഡലുകൾ ഇതിനകം നേടിക്കഴിഞ്ഞു. മറ്റൊരു സ്വർണത്തിനായി അവർ വീണ്ടും പോരാടുകയാണ്.

ഏഷ്യൻ ഗെയിംസ് ഇന്ത്യ തത്സമയം: ഐച്ചി-നഗോയ ഏഷ്യൻ ഗെയിംസിന്റെ 12-ാം ദിവസം ഇന്ത്യയുടെ കോമ്പൗണ്ട് ആർച്ചർമാർ രണ്ട് സ്വർണ മെഡലുകളോടെയാണ് തുടക്കം കുറിച്ചത്. ആദ്യം ജ്യോതി സുരേഖ വെണ്ണം, പ്രിതിക പ്രദീപ്, താനിപ്പർത്തി ചികിത എന്നിവരടങ്ങിയ വനിതാ ടീം സെമിയിൽ ശക്തരായ ദക്ഷിണ കൊറിയയെയും ഫൈനലിൽ ചൈനയെയും തോൽപ്പിച്ച് ഐച്ചി-നഗോയയിലെ ഇന്ത്യയുടെ ഏഴാം സ്വർണം സ്വന്തമാക്കി. തുടർന്ന്, താനിപ്പർത്തി ചികിതയും സാഹിൽ രാജേഷ് യാദവും ചേർന്ന് ആവേശകരമായ ഷൂട്ട്-ഔട്ടിൽ കൊറിയൻ ജോഡിയെ പരാജയപ്പെടുത്തി സ്വർണ മെഡലും ലോസ് ആഞ്ചലസ് ഒളിമ്പിക്സിനുള്ള ക്വാട്ടയും നേടി. വനിതകളുടെ 60 കിലോഗ്രാം വിഭാഗം ബോക്സിങ് സെമിയിൽ പരാജയപ്പെട്ട പ്രിയ ഘങ്ഹാസ് വെങ്കല മെഡൽ സ്വന്തമാക്കി.

അതേസമയം, തൻവി ഖന്ന, അനാഹത് സിംഗ്, ജ്യോത്സ്ന ചിന്നപ്പ എന്നിവരടങ്ങിയ വനിതാ സ്ക്വാഷ് ടീം സിംഗപ്പൂരിനെ തോൽപ്പിച്ച് സെമിയിൽ പ്രവേശിക്കുകയും ഇന്ത്യ്ക്ക് സ്ക്വാഷിൽ മറ്റൊരു മെഡൽ കൂടി ഉറപ്പാക്കുകയും ചെയ്തു. ചൊവ്വാഴ്ച വൈകുന്നേരത്തോടെ അത്‌ലറ്റിക്സ് മത്സരങ്ങൾ ഇന്ത്യക്ക് അഭിമാനകരമായ നേട്ടത്തോടെ അവസാനിച്ചെങ്കിലും, ഷൂട്ടിങ്, ആർച്ചറി, സ്ക്വാഷ്, ഗുസ്തി എന്നീ ഇനങ്ങളിൽ 12-ാം ദിവസവും കൂടുതൽ മെഡലുകൾ ഇന്ത്യയെ തേടിയെത്താനുണ്ട്. ചൊവ്വാഴ്ച ചരിത്രപരമായ വ്യക്തിഗത സ്വർണ മെഡൽ നേടിയ നീരു ധണ്ഡ, മിക്സഡ് ടീം യോഗ്യതാ മത്സരത്തിലും ടീം ഇനത്തിലും പങ്കാളിയാകാൻ വീണ്ടും കളത്തിലിറങ്ങുന്നുണ്ട്. ചൊവ്വാഴ്ച ട്രാക്ക് ആൻഡ് ഫീൽഡ് താരങ്ങൾ നേടിയതിന് സമാനമായ മെഡൽ നേട്ടം ആവർത്തിക്കാനൊരുങ്ങുകയാണ് ഹരിയാനയിൽ നിന്നുള്ള ഇന്ത്യയുടെ ഗുസ്തി സംഘം.