എഡ്മിന്‍റൻ : കിഴക്കൻ ആൽബർട്ടയിലുണ്ടായ വാഹനാപകടത്തിൽ രണ്ട് കുട്ടികളടക്കം മൂന്ന് പേർ മരിച്ചതായി ആർ.സി.എം.പി (RCMP) അറിയിച്ചു. വ്യാഴാഴ്ച വൈകുന്നേരം നടന്ന അപകടത്തിൽ ഉൾപ്പെട്ട എട്ട് വയസ്സുള്ള കുട്ടി ഗുരുതരാവസ്ഥയിൽ ചികിത്സയിലാണ്. എഡ്മിന്‍റനിൽ നിന്നും ഏകദേശം 230 കിലോമീറ്റർ അകലെ കിറ്റ്‌സ്‌കോട്ടിക്ക് സമീപം ഹൈവേ 16-ൽ വൈകുന്നേരം 7:30-ഓടെയായിരുന്നു അപകടം.
ലോയ്ഡ്മിൻസ്റ്ററിന് സമീപം റേഞ്ച് റോഡ് 14-ൽ ഹൈവേ 16 മുറിച്ചുകടക്കാൻ ശ്രമിക്കുകയായിരുന്ന എസ്‌യുവി (SUV)യിൽ സെമി ട്രക്ക് (ലോറി) ഇടിക്കുകയായിരുന്നു. എസ്‌യുവി ഓടിച്ചിരുന്ന വെർമിലിയൻ സ്വദേശിയായ 37 വയസ്സുള്ള യുവതി സംഭവസ്ഥലത്തുതന്നെ മരിച്ചു. അപകടത്തിൽപ്പെട്ട മൂന്ന് കുട്ടികളെ ആശുപത്രിയിൽ എത്തിച്ചെങ്കിലും, അഞ്ച് വയസ്സും ഒമ്പത് വയസ്സും പ്രായമുള്ള രണ്ട് കുട്ടികൾ പിന്നീട് മരിച്ചതായി സ്ഥിരീകരിച്ചു. മരിച്ച സ്ത്രീയും കുട്ടികളും തമ്മിലുള്ള ബന്ധം വ്യക്തമല്ല.
അപകടത്തെത്തുടർന്ന് ഹൈവേ രാത്രി മുഴുവൻ അടച്ചിട്ടിരുന്നു. അമിതവേഗതയോ മദ്യപാനമോ ഈ അപകടത്തിന് കാരണമായിട്ടില്ലെന്ന് അന്വേഷണ ഉദ്യോഗസ്ഥർ അറിയിച്ചു. അന്വേഷണം പുരോഗമിക്കുന്നു.
