ടൊറൻ്റോ : എയർ ട്രാഫിക് കൺട്രോൾ കേന്ദ്രങ്ങളിലുണ്ടായ ആശയവിനിമയ തകരാറിനെ തുടർന്ന് യു.എസ്. ഫെഡറൽ ഏവിയേഷൻ അഡ്മിനിസ്‌ട്രേഷൻ (FAA) ‘ഗ്രൗണ്ട് സ്റ്റോപ്പ്’ പ്രഖ്യാപിച്ചതോടെ ടൊറൻ്റോയിലെ രണ്ട് വിമാനത്താവളങ്ങളിൽ നിന്നുള്ള നൂറുകണക്കിന് വിമാന സർവീസുകൾ റദ്ദാക്കി. അപ്രതീക്ഷിതമായ ഈ നടപടിയിൽ നിരവധി യാത്രക്കാർ വിവിധയിടങ്ങളിൽ കുടുങ്ങി. ഈസ്റ്റേൺ ടൈം വൈകുന്നേരം 4 മണിയോടെയാണ് ഈ ഉത്തരവ് പുറപ്പെടുവിച്ചത്. തുടർന്ന് രാത്രി 8:15-ഓടെ FAA ഈ നിയന്ത്രണം പിൻവലിക്കുകയും, വിമാനങ്ങൾക്ക് വീണ്ടും സർവീസ് നടത്താൻ അനുമതി നൽകുകയും ചെയ്തു.

നിലവിൽ അമേരിക്കയിലേക്കോ അവിടെ നിന്നോ ഉള്ള ഷെഡ്യൂൾ ചെയ്ത വിമാന സർവീസുകളൊന്നും നടക്കുന്നില്ലെന്ന് ടൊറൻ്റോ പിയേഴ്സൺ അന്താരാഷ്ട്ര വിമാനത്താവളത്തിന്‍റെ ചുമതലയുള്ള ഗ്രേറ്റർ ടൊറൻ്റോ എയർപോർട്ട് അതോറിറ്റി (GTAA) അറിയിച്ചു. പിയേഴ്സൺ വിമാനത്താവളത്തിൽ നിന്നും യു.എസിലേക്കും തിരിച്ചുമുള്ള 120-ലധികം വിമാന സർവീസുകൾ റദ്ദാക്കി.

‘ഗ്രൗണ്ട് സ്റ്റോപ്പ്’ പിൻവലിച്ചതോടെ യുഎസിൽ ഫ്ലൈറ്റ് പുനഃരാരംഭിച്ചിട്ടുണ്ടെങ്കിലും അടുത്ത കുറച്ച് മണിക്കൂറുകളിൽ “കുറച്ച് കാലതാമസങ്ങളും” “ചില റദ്ദാക്കലുകളും” ഉണ്ടാകാമെന്ന് ടൊറൻ്റോ പിയേഴ്സൺ എയർപോർട്ട് വക്താവ് എറിക്ക വെല്ല അറിയിച്ചു.

അമേരിക്കയിലേക്കും തിരിച്ചുമുള്ള തങ്ങളുടെ എല്ലാ വിമാന സർവീസുകളും റദ്ദാക്കിയതായി എയർ കാനഡയും അറിയിച്ചു. അമേരിക്കൻ വ്യോമാതിർത്തിയിലൂടെ കടന്നുപോകുന്ന, കാനഡയും കരീബിയൻ മേഖലയും തെക്കേ അമേരിക്കയും തമ്മിലുള്ള വിമാന സർവീസുകളെയും ഇത് ബാധിച്ചിട്ടുണ്ടെന്ന് എയർലൈൻ അറിയിച്ചു. എയർ കാനഡയ്ക്ക് പുറമേ, പോർട്ടർ എയർലൈൻസ് വെള്ളിയാഴ്ച യുഎസിലേക്ക് വരുന്നതും പുറത്തേക്ക് പോകുന്നതുമായ എല്ലാ വിമാനങ്ങളും റദ്ദാക്കിയതായി ഐലൻഡ് എയർപോർട്ട് അറിയിച്ചു.