പാർലമെൻ്റ് സമ്മേളനത്തിന് മുന്നോടിയായി പ്രധാനമന്ത്രി മാർക്ക് കാർണിയുടെ നേതൃത്വത്തിൽ കാബിനറ്റ് യോഗം ആൽബർട്ടയിൽ ആരംഭിച്ചു. യുഎസുമായുള്ള വ്യാപാരയുദ്ധവും ആൽബർട്ട റഫറണ്ടവും ആശങ്ക സൃഷ്ടിക്കുന്നതിനിടെയാണ് കാബിനറ്റ് യോഗം ചേരുന്നത്. ഈ പ്രതിസന്ധികൾ പരിഹരിക്കാനുള്ള ഭാവി പദ്ധതികൾ തയ്യാറാക്കുകയാണ് രണ്ടു ദിവസത്തെ യോഗത്തിന്‍റെ പ്രധാന ലക്ഷ്യം. കൂടാതെ ഉയർന്ന ജീവിതച്ചെലവും തൊഴിൽ സുരക്ഷിതത്വവും മുൻനിർത്തിയുള്ള സാമ്പത്തിക പരിഷ്കാരങ്ങൾ യോഗത്തിൽ ചർച്ചയാകും.
കനേഡിയൻ ഉൽപ്പന്നങ്ങൾക്ക് അമേരിക്ക 50% തീരുവ ഏർപ്പെടുത്തിയ പശ്ചാത്തലത്തിൽ കാനഡ 27 ബില്യൺ ഡോളറിലധികം മൂല്യമുള്ള യുഎസ് ഉൽപ്പന്നങ്ങൾക്ക് പ്രതികാര തീരുവ നടപ്പിലാക്കിയിട്ടുണ്ട്. അമേരിക്കയെ ആശ്രയിക്കുന്നത് കുറയ്ക്കാനും മറ്റ് രാജ്യങ്ങളുമായുള്ള വ്യാപാര പങ്കാളിത്തം വർധിപ്പിക്കാനും കാർണി സർക്കാർ പദ്ധതിയിടുന്നു.
