ഇന്ത്യയ്ക്കും കാനഡയ്ക്കുമിടയിൽ യാത്ര ചെയ്യുന്നവർക്ക് ആശ്വാസമായി എയർ ഇന്ത്യ മുംബൈയിൽ നിന്ന് ടൊറൻ്റോയിലേക്ക് പുതിയ നേരിട്ടുള്ള വിമാന സർവീസ് ആരംഭിച്ചു. ഒക്ടോബർ 25, ഞായറാഴ്ച മുതൽ ആരംഭിച്ച ഈ സർവീസിൽ മുംബൈയിൽ നിന്ന് ടൊറൻ്റോയിലേക്ക് ഏകദേശം 16 മണിക്കൂർ 30 മിനിറ്റും, തിരിച്ച് ടൊറൻ്റോയിൽ നിന്ന് മുംബൈയിലേക്ക് 15 മണിക്കൂർ 10 മിനിറ്റുമാണ് യാത്രാ സമയം. കൂടുതൽ വിവരങ്ങൾക്കും ടിക്കറ്റ് ബുക്കിങ്ങിനുമായി എയർ ഇന്ത്യയുടെ ഔദ്യോഗിക പോർട്ടൽ സന്ദർശിക്കുക.
ബുധൻ, വെള്ളി, ഞായർ എന്നിങ്ങനെ ആഴ്ചയിൽ 3 ദിവസങ്ങളിലായിരിക്കും സർവീസ് നടത്തുക. മുംബൈ – ടൊറൻ്റോ (AI 193) വിമാനം പുലർച്ചെ നാല് മണിക്ക് മുംബൈയിൽ നിന്നും പുറപ്പെട്ട് പിറ്റേ ദിവസം രാവിലെ പത്ത് മണിക്ക് ടൊറൻ്റോയിൽ എത്തിച്ചേരും. ടൊറൻ്റോ-മുംബൈ (AI 192) വിമാനം ഉച്ചക്ക് 12.30-നാണ് പുറപ്പെടുക. തുടർന്ന് 15 മണിക്കൂറിലധികം പറന്ന് അടുത്ത ദിവസം ഉച്ചകഴിഞ്ഞ് 2:10 ന് മുംബൈയിൽ തിരിച്ചെത്തും.
അത്യാധുനിക സൗകര്യങ്ങളോടു കൂടിയ ബോയിങ് 777-300ER വിമാനമാണ് ഈ റൂട്ടിൽ സർവീസ് നടത്തുന്നത്. ഇതിൽ 8 ഫസ്റ്റ് ക്ലാസ് സ്യൂട്ടുകളും, 40 ബിസിനസ് ക്ലാസ് ഫ്ലാറ്റ് ബെഡ് സീറ്റുകളും, 280 നവീകരിച്ച ഇക്കണോമി ക്ലാസ് സീറ്റുകളും ലഭ്യമാണ്.
