വെല്ലിങ്ടൺ: ന്യൂസീലൻഡ് പൗരത്വം ആഗ്രഹിക്കുന്ന കുടിയേറ്റക്കാർക്ക് ഇനി മുതൽ കാര്യങ്ങൾ അത്ര എളുപ്പമാകില്ല. രാജ്യത്തെക്കുറിച്ചുള്ള അറിവ് പരിശോധിക്കുന്ന പ്രത്യേക പൊതുവിജ്ഞാന പരീക്ഷ പാസായാൽ മാത്രമേ ഇനി പൗരത്വം ലഭിക്കൂ എന്ന സുപ്രധാന മാറ്റം സർക്കാർ പ്രഖ്യാപിച്ചു. 2026 മെയ് 6-ന് ന്യൂസീലൻഡ് ആഭ്യന്തര മന്ത്രി ബ്രൂക്ക് വാൻ വെൽഡനാണ് ഈ പുതിയ നയം വ്യക്തമാക്കിയത്. പൗരത്വത്തിന്റെ മൂല്യവും ഉത്തരവാദിത്തങ്ങളും കുടിയേറ്റക്കാർക്ക് ബോധ്യപ്പെടുത്തിക്കൊടുക്കുക എന്നതാണ് ഈ നീക്കത്തിന് പിന്നിലെ പ്രധാന ലക്ഷ്യം.
നിലവിൽ, പൗരത്വത്തിന്റെ കടമകളും അവകാശങ്ങളും തനിക്ക് ബോധ്യമുണ്ടെന്ന് ഒരു സത്യവാങ്മൂലത്തിൽ ഒപ്പിട്ടു നൽകിയാൽ കുടിയേറ്റക്കാർക്ക് പൗരത്വം ലഭിക്കുന്ന രീതിയാണ് നിലവിലുള്ളത്. എന്നാൽ ഈ ‘ലളിതവൽക്കരണം’ അവസാനിപ്പിച്ച് അപേക്ഷകരുടെ അറിവ് നേരിട്ട് പരീക്ഷിക്കാനാണ് സർക്കാർ തീരുമാനം. 2027 പകുതിയോടെ ഈ പരീക്ഷ നിർബന്ധമാക്കാനാണ് ഉദ്ദേശിക്കുന്നത്.
ന്യൂസീലൻഡ് പൗരത്വത്തിന് അപേക്ഷിക്കുന്നവർക്കായി ഏർപ്പെടുത്തുന്ന പുതിയ പരീക്ഷാ രീതി അനുസരിച്ച്, ‘സിറ്റിസൺഷിപ്പ് ബൈ ഗ്രാന്റ്’ വഴി അപേക്ഷിക്കുന്ന 16-നും 65-നും ഇടയിൽ പ്രായമുള്ളവർക്ക് ഈ പരീക്ഷ നിർബന്ധമാക്കും. എന്നാൽ കുട്ടികൾക്കും മുതിർന്ന പൗരന്മാർക്കും ഈ നിബന്ധനയിൽ ഇളവ് അനുവദിച്ചിട്ടുണ്ട്. ആകെ 20 മൾട്ടിപ്പിൾ ചോയ്സ് ചോദ്യങ്ങൾ അടങ്ങുന്ന പരീക്ഷയിൽ 15 എണ്ണത്തിന് ശരിയായ ഉത്തരം നൽകി 75 ശതമാനം മാർക്ക് നേടുന്നവർക്ക് മാത്രമേ പൗരത്വം ലഭിക്കുകയുള്ളൂ. ന്യൂസീലൻഡ് ഭരണഘടന, മനുഷ്യാവകാശ നിയമങ്ങൾ (Bill of Rights Act), വോട്ടിംഗ് അവകാശങ്ങൾ, ജനാധിപത്യ മൂല്യങ്ങൾ, രാജ്യത്തെ നിയമവ്യവസ്ഥ എന്നിവയെക്കുറിച്ചുള്ള അറിവാണ് ഇതിലൂടെ പരിശോധിക്കപ്പെടുക. പൂർണ്ണമായും ഇംഗ്ലീഷ് ഭാഷയിലായിരിക്കും പരീക്ഷ നടക്കുക. കൂടാതെ പൗരത്വത്തിനുള്ള അപേക്ഷാ ഫീസിന് പുറമെ ഈ പരീക്ഷയ്ക്കായി അപേക്ഷകർ പ്രത്യേക ഫീസും നൽകേണ്ടി വരും.മുന്നൊരുക്കങ്ങൾ
നിലവിൽ അപേക്ഷ സമർപ്പിച്ചവരെയോ 2027 പകുതിക്ക് മുൻപ് അപേക്ഷിക്കുന്നവരെയോ ഈ മാറ്റം ബാധിക്കില്ല. പരീക്ഷ എഴുതുന്നവർക്ക് പഠിക്കാനാവശ്യമായ പാഠഭാഗങ്ങൾ (Study materials) പരീക്ഷ നടപ്പിലാക്കുന്നതിന് മുൻപ് തന്നെ ആഭ്യന്തര വകുപ്പ് ലഭ്യമാക്കുമെന്ന് മന്ത്രി അറിയിച്ചു. രാജ്യം നൽകുന്ന പദവിയെക്കുറിച്ചും പൗരൻ എന്ന നിലയിലുള്ള കടമകളെക്കുറിച്ചും ഓരോ വ്യക്തിക്കും കൃത്യമായ ബോധ്യമുണ്ടാകണം എന്ന കർശനമായ നിലപാടാണ് ഈ പരിഷ്കാരത്തിലൂടെ ന്യൂസീലൻഡ് സർക്കാർ സ്വീകരിക്കുന്നത്.
