വാഷിംഗ്ടൺ: കുപ്രസിദ്ധ ലൈംഗിക കുറ്റവാളി ജെഫ്രി എപ്സ്റ്റീനുമായുള്ള ബന്ധത്തെക്കുറിച്ച് വിശദീകരണം നൽകാനായി മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സ് ജൂൺ 10-ന് യുഎസ് കോൺഗ്രസ് സമിതിക്ക് മുന്നിൽ ഹാജരാകും. എപ്സ്റ്റീനും കൂട്ടാളി ഗിസ്ലെയ്ൻ മാക്സ്വെല്ലും ഉൾപ്പെട്ട ലൈംഗിക അതിക്രമ കേസുകളെക്കുറിച്ച് അന്വേഷിക്കുന്ന പ്രതിനിധി സഭയുടെ പാനലിന് മുൻപാകെയാണ് അദ്ദേഹം മൊഴി നൽകുന്നത്. യുഎസ് നീതിന്യായ വകുപ്പ് പുറത്തുവിട്ട രേഖകളിൽ എപ്സ്റ്റീനുമായി അടുത്ത സൗഹൃദമുണ്ടായിരുന്ന പ്രമുഖരുടെ പട്ടികയിൽ ബിൽ ഗേറ്റ്സിന്റെ പേരും ഉൾപ്പെട്ടതിനെത്തുടർന്നാണ് ഈ നീക്കം. സി.ടി.വി ന്യൂസ് റിപ്പോർട്ട് പ്രകാരം, അടച്ചിട്ട മുറിയിൽ നടക്കുന്ന പ്രത്യേക അഭിമുഖത്തിലൂടെയായിരിക്കും ഗേറ്റ്സ് മൊഴി നൽകുക.
നേരത്തെ മുൻ പ്രസിഡന്റ് ബിൽ ക്ലിന്റണും ഹിലരി ക്ലിന്റണും ഇതേ രീതിയിൽ സമിതിക്ക് മുന്നിൽ മൊഴി നൽകിയിരുന്നു. സമിതിയുടെ അന്വേഷണത്തോട് പൂർണ്ണമായി സഹകരിക്കുമെന്നും ചോദ്യങ്ങൾക്ക് മറുപടി നൽകാൻ താൻ തയ്യാറാണെന്നും ബിൽ ഗേറ്റ്സിന്റെ വക്താവ് അറിയിച്ചു. എപ്സ്റ്റീന്റെ നിയമവിരുദ്ധമായ പ്രവർത്തനങ്ങളിൽ താൻ പങ്കാളിയായിട്ടില്ലെന്നും അത്തരം കാര്യങ്ങൾക്ക് സാക്ഷ്യം വഹിച്ചിട്ടില്ലെന്നും ഗേറ്റ്സ് വ്യക്തമാക്കിയിട്ടുണ്ട്. എപ്സ്റ്റീനുമായുള്ള സൗഹൃദം തന്റെ ജീവിതത്തിലെ വലിയൊരു തെറ്റായിരുന്നുവെന്നും ഇതിനകം തന്നെ അദ്ദേഹം സമ്മതിച്ചിട്ടുണ്ട്.
അടുത്തിടെ പുറത്തുവന്ന ചില ഇമെയിൽ രേഖകളിൽ, ബിൽ ഗേറ്റ്സിന്റെ സ്വകാര്യ ജീവിതത്തെക്കുറിച്ചുള്ള വിവരങ്ങൾ വെളിപ്പെടുത്തുമെന്ന് ഭീഷണിപ്പെടുത്തി എപ്സ്റ്റീൻ അദ്ദേഹത്തെ ബ്ലാക്ക് മെയിൽ ചെയ്യാൻ ശ്രമിച്ചിരുന്നതായി ആരോപണമുണ്ട്. ഗേറ്റ്സിന് ചില റഷ്യൻ യുവതികളുമായി ബന്ധമുണ്ടായിരുന്നുവെന്നും അതിന് താൻ സഹായം നൽകിയിട്ടുണ്ടെന്നും എപ്സ്റ്റീൻ അവകാശപ്പെട്ടിരുന്നു. ഒരു റഷ്യൻ ബ്രിഡ്ജ് പ്ലെയറുമായും ആണവ ശാസ്ത്രജ്ഞയുമായും തനിക്ക് ബന്ധമുണ്ടായിരുന്നുവെന്ന് 70-കാരനായ ഗേറ്റ്സ് ഒരു ടൗൺഹാൾ മീറ്റിംഗിൽ തുറന്നുപറഞ്ഞിരുന്നു. എന്നാൽ എപ്സ്റ്റീൻ നടത്തുന്ന പെൺവാണിഭ സംഘത്തെക്കുറിച്ച് തനിക്ക് അറിവില്ലായിരുന്നുവെന്നാണ് അദ്ദേഹത്തിന്റെ നിലപാട്.
2011-ൽ എപ്സ്റ്റീൻ ശിക്ഷിക്കപ്പെട്ടതിന് ശേഷമാണ് താൻ അദ്ദേഹത്തെ പരിചയപ്പെട്ടതെന്ന് ഗേറ്റ്സ് പറയുന്നു. തന്റെ മുൻഭാര്യ മെലിൻഡ ഫ്രഞ്ച് ഗേറ്റ്സ് എപ്സ്റ്റീനുമായുള്ള സൗഹൃദത്തിൽ ആശങ്ക പ്രകടിപ്പിച്ചിരുന്നെങ്കിലും ഒരു വർഷത്തോളം ആ ബന്ധം തുടർന്നത് തെറ്റായിപ്പോയെന്ന് അദ്ദേഹം ഇപ്പോൾ കരുതുന്നു. 2019-ൽ ജയിലിനുള്ളിൽ വെച്ച് എപ്സ്റ്റീൻ മരിച്ചെങ്കിലും അദ്ദേഹവുമായി ബന്ധമുണ്ടായിരുന്ന അതിസമ്പന്നരിലേക്കും രാഷ്ട്രീയ നേതാക്കളിലേക്കും അന്വേഷണം നീളുകയാണ്. ജൂണിൽ നടക്കാനിരിക്കുന്ന ബിൽ ഗേറ്റ്സിന്റെ മൊഴി ഈ കേസിലെ നിർണ്ണായകമായ പല രഹസ്യങ്ങളും പുറത്തുകൊണ്ടുവരുമെന്നാണ് കരുതപ്പെടുന്നത്.
