തൃശ്ശൂർ ചേലക്കോട്ടെ വഴിയോര ചായക്കടയിലേക്ക് നിയന്ത്രണം വിട്ട മിൽമ ടാങ്കർ ലോറി ഇടിച്ചുകയറി രണ്ട് പേർക്ക് ദാരുണാന്ത്യം. തിരുവോണ നാളിൽ രാവിലെ എട്ട് മണിയോടെയായിരുന്നു നാടിനെ നടുക്കിയ ഈ ദുരന്തം നടന്നത്. പെട്രോൾ ടാങ്കർ ഡ്രൈവറായ മണ്ണാർക്കാട് സ്വദേശി ജോസഫ്, പഴയന്നൂരിലേക്ക് പോകുകയായിരുന്ന കല്ലേപ്പാടം സ്വദേശി ഷമീർ എന്നിവരാണ് അപകടത്തിൽ ജീവൻ വെടിഞ്ഞത്.
തന്റെ വാഹനം വഴിയരികിൽ നിർത്തിയിട്ട ശേഷം ചായ കുടിക്കാനിറങ്ങിയ ജോസഫും, ആ സമയത്ത് അവിടെയെത്തിയ ഷമീറും കടയ്ക്ക് മുന്നിൽ നിൽക്കുമ്പോഴാണ് അമിതവേഗതയിലെത്തിയ മിൽമ ടാങ്കർ ഇരുവരുടെയും ഇടയിലേക്ക് പാഞ്ഞുകയറിയത്. ഇടിയുടെ ആഘാതത്തിൽ ലോറിക്കടിയിൽ കുടുങ്ങിയ ഇരുവരെയും പോലീസും അഗ്നിരക്ഷാസേനയും നാട്ടുകാരും ചേർന്ന് ഏറെ ശ്രമപ്പെട്ടാണ് പുറത്തെടുത്തത്. തുടർന്ന് ഉടനടി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
