ആൽബർട്ട: സാധാരണക്കാർക്ക് താങ്ങാനാവുന്ന ഭവനങ്ങൾ നിർമ്മിക്കാൻ, ഫെഡറൽ സർക്കാരുമായി ചേർന്ന് 203 മില്യൻ ഡോളറിൻ്റെ സംയുക്ത പദ്ധതിയുമായി ആൽബർട്ട സർക്കാർ. ഈ പണം ഉപയോഗിച്ച് 25 പദ്ധതികളിലായി 2,300-ലധികം യൂണിറ്റുകൾ നിർമ്മിക്കുമെന്ന് ആൽബർട്ട സാമൂഹിക സേവന മന്ത്രി ജേസൺ നിക്സൺ പറഞ്ഞു.
യുവാക്കൾക്കും വിദ്യാർത്ഥികൾക്കുമായി എഡ്മണ്ടൻ്റെ പ്രാന്തപ്രദേശങ്ങളിൽ നിർമ്മിക്കുന്ന വീടുകൾ മുതൽ കാൽഗറിയിലെ ഭവനരഹിതർക്കായുള്ള യൂണിറ്റുകൾ വരെ ഈ പദ്ധതിയിൽ ഉൾപ്പെടുമെന്ന് നിക്സൺ പറഞ്ഞു. 2031ടെ 82,000 യൂണിറ്റുകൾ നിർമ്മിക്കുകയെന്ന ലക്ഷ്യം കൈവരിക്കുന്നതിന് ധനസഹായം ഉപയോഗപ്രദമാകുമെന്നും അദ്ദേഹം പറഞ്ഞു. സർക്കാരുകൾ ഒരുമിച്ച് പ്രവർത്തിക്കുമ്പോൾ എന്ത് സംഭവിക്കുമെന്നതിൻ്റെ ഉദാഹരണമാണ് പുതിയ ഫണ്ടിംഗ് എന്ന് ഫെഡറൽ മന്ത്രി എലീനർ ഓൾസ്വെസ്കി വ്യക്തമാക്കി.
ആവശ്യമുള്ളവർക്ക് വീടുകൾ നിർമ്മിക്കുന്നതിനപ്പുറം, തൊഴിലവസരങ്ങൾ സൃഷ്ടിക്കുന്നതിനും കാനഡയുടെ ഭവന വ്യവസായത്തെ ഉത്തേജിപ്പിക്കുന്നതിനും പുതിയ ഫണ്ട് സഹായകമാകുമെന്നും എലീനർ ഓൾസ്വെസ്കി കൂട്ടിച്ചേർത്തു. ശക്തമായൊരു കാനഡ കെട്ടിപ്പടുക്കുകയാണ് ലക്ഷ്യം, അതിനായി ഫെഡറൽ, പ്രവിശ്യ സർക്കാരുകൾ ഒരേ ദിശയിൽ മുന്നോട്ടു പോവുകയാണ്,” എലീനർ ഓൾസ്വെസ്കി പറഞ്ഞു.
