സുരക്ഷാ പരിശോധനയ്ക്കിടെ കനേഡിയൻ പോലീസ് ഉദ്യോഗസ്ഥൻ വെടിയേറ്റു കൊല്ലപ്പെട്ട സംഭവത്തിൽ അന്താരാഷ്ട്ര ഭീകര ശൃംഖലയ്ക്ക് ബന്ധമുണ്ടെന്ന് അന്വേഷണ ഉദ്യോഗസ്ഥരുടെ വെളിപ്പെടുത്തൽ. ഇറാൻ പിന്തുണയുള്ള അന്താരാഷ്ട്ര തീവ്രവാദ സംഘടനയാണ് സംഭവത്തിന് പിന്നലെന്നാണ് നിഗമനം.

നോർത്ത് യോർക്കിലെ ട്രെതവേ, ബ്ലാക്ക് ക്രീക്ക് മേഖലയിൽ വ്യാഴാഴ്ച പുലർച്ചെ റെയ്‌ഡ്‌ നടത്തുന്നതിനിടെയാണ് കോൺസ്റ്റബിൾ മാർക്ക് പിനിസോട്ടോ വെടിയേറ്റു കൊല്ലപ്പെട്ടത്. കഴിഞ്ഞ മാർച്ച് 10-ന് ടൊറൻ്റോയിലെ യു.എസ് കോൺസുലേറ്റിന് നേരെ നടന്ന വെടിവെപ്പുമായി ബന്ധപ്പെട്ട അന്വേഷണത്തിൻ്റെ ഭാഗമായാണ് പോലീസ് റെയ്‌ഡ്‌ നടത്തിയത്. യു.എസ് കോൺസുലേറ്റിന് നേരെ നടന്ന ആക്രമണത്തിൽ ഇറാഖ് സ്വദേശിയായ മുഹമ്മദ് ബഖർ സാദ് ദാവൂദ് അൽ-സാദി എന്നയാൾക്ക് ബന്ധമുണ്ടെന്ന് യു.എസ് അധികൃതർ വ്യക്തമാക്കിയിട്ടുണ്ട്. ഇയാൾക്കെതിരെ ഭീകരവാദ കുറ്റങ്ങൾ ചുമത്തിയിട്ടുണ്ട്. ഇറാൻ്റെ റെവല്യൂഷണറി ഗാർഡുമായും ഇറാഖിലെ കതാഇബ് ഹിസ്ബുള്ളയുമായും അൽ-സാദിക്ക് അടുത്ത ബന്ധമുണ്ടെന്ന് അന്വേഷണ ഉദ്യോഗസ്ഥർ ആരോപിക്കുന്നു. യൂറോപ്പിൽ ഇരുപതോളം ആക്രമണങ്ങളും കാനഡയിൽ രണ്ട് ആക്രമണങ്ങളും ഇയാൾ ആസൂത്രണം ചെയ്തതായി കണ്ടെത്തിയിട്ടുണ്ട്.