പ്രധാനമന്ത്രി നരേന്ദ്ര മോദിയെയും കേന്ദ്ര ഭരണത്തെയും പുകഴ്ത്തുന്ന ബോളിവുഡ് താരങ്ങളായ വിവേക് ഒബ്‌റോയിക്കും ആർ. മാധവനുമെതിരെ ശക്തമായ വിമർശനവുമായി എംഎൻഎസ് അധ്യക്ഷൻ രാജ് താക്കറെ രംഗത്തെത്തി. മോദി ഭരണത്തിൽ ഇന്ത്യയിൽ എല്ലാം ഭംഗിയായി നടക്കുന്നുണ്ടെന്ന് വിശ്വസിക്കുന്നവരാണെങ്കിൽ, ഇരുവരും എന്തിനാണ് സ്വന്തം കുടുംബത്തോടൊപ്പം ദുബായിൽ സ്ഥിരതാമസമാക്കിയതെന്ന് മുംബൈയിൽ നടന്ന ചടങ്ങിൽ അദ്ദേഹം ചോദ്യമുന്നയിച്ചു.
എംഎൻഎസിന്റെ വിദ്യാർത്ഥി വിഭാഗം സംഘടിപ്പിച്ച പരിപാടിയിൽ സംസാരിക്കവെയാണ് താക്കറെ രാഷ്ട്രീയ വിഷയങ്ങളിൽ നിലപാട് വ്യക്തമാക്കിയത്. വിദേശത്ത് സുഖമായി താമസിച്ചുകൊണ്ട് കേന്ദ്ര സർക്കാരിനെ പ്രശംസിക്കുന്ന ചിത്രങ്ങളിൽ അഭിനയിക്കുന്നത് ഇരട്ടത്താപ്പാണെന്ന് അദ്ദേഹം ചൂണ്ടിക്കാട്ടി. രാജ്യത്തെ ആയിരക്കണക്കിന് വ്യവസായികൾ ഇന്ത്യ വിട്ടുപോയ കാര്യം ഓർമ്മിപ്പിച്ച അദ്ദേഹം, 2019-ൽ പ്രധാനമന്ത്രിയുടെ ബയോപ്പിക്കിൽ വേഷമിട്ട വിവേക് ഒബ്‌റോയും പ്രശംസ ചൊരിഞ്ഞ ആർ. മാധവനും എന്തുകൊണ്ട് വിദേശത്ത് കഴിയുന്നുവെന്ന് തുറന്നടിച്ചു.
കൂടാതെ, രാഷ്ട്രീയ പ്രക്ഷോഭങ്ങളിൽ പ്രധാനമന്ത്രിക്കെതിരെ അശ്ലീല വാക്കുകൾ ഉപയോഗിക്കുന്നത് തെറ്റായ പ്രവണതയാണെന്ന് അദ്ദേഹം അഭിപ്രായപ്പെട്ടു. എന്നാൽ ഇത്തരം മോശം ഭാഷാപ്രയോഗങ്ങളും അധിക്ഷേപ ശൈലികളും സോഷ്യൽ മീഡിയയിലൂടെ ആദ്യം പ്രചരിപ്പിച്ചു തുടങ്ങിയത് ബിജെപിയുടെ ട്രോൾ ഗ്രൂപ്പുകളാണെന്നും രാജ് താക്കറെ കൂട്ടിച്ചേർത്തു.
