ഗർഭഛിദ്രത്തിനുള്ള ഗുളികയായ മിഫിപ്രിസ്റ്റോൺ (mifepristone) ടെലിഹെൽത്ത് വഴിയും തപാൽ വഴിയും ലഭ്യമാക്കുന്നതിനുള്ള സൗകര്യം യുഎസ് സുപ്രീം കോടതി താൽക്കാലികമായി പുനഃസ്ഥാപിച്ചു. രാജ്യവ്യാപകമായി ഗർഭഛിദ്ര സേവനങ്ങൾ നൽകുന്ന പ്രധാന മാർഗങ്ങളിലൊന്നിന് ഭീഷണിയായേക്കാവുന്ന കീഴ്കോടതി വിധി തടഞ്ഞുകൊണ്ടാണ് സുപ്രീം കോടതിയുടെ ഈ ഇടപെടൽ. ജസ്റ്റിസ് സാമുവൽ അലിറ്റോ ഒപ്പുവെച്ച ഉത്തരവ് പ്രകാരം മെയ് 11 വരെ ഈ ഇളവ് തുടരും.
ഈ ഉത്തരവ് നിലവിൽ വന്നതോടെ, ഗർഭഛിദ്രം ആഗ്രഹിക്കുന്ന സ്ത്രീകൾക്ക് ഡോക്ടറെ നേരിട്ട് സന്ദർശിക്കാതെ തന്നെ ഫാർമസികളിൽ നിന്നോ തപാൽ വഴിയോ ഈ ഗുളികകൾ കൈപ്പറ്റാൻ സാധിക്കും. കഴിഞ്ഞ കുറച്ചു വർഷങ്ങളായി നിലനിന്നിരുന്ന ഈ ചട്ടം കഴിഞ്ഞ ആഴ്ച ഒരു ഫെഡറൽ അപ്പീൽ കോടതി നിയന്ത്രിച്ചിരുന്നു. ആ നിയന്ത്രണങ്ങൾക്കാണ് സുപ്രീം കോടതി ഇപ്പോൾ താൽക്കാലിക സ്റ്റേ അനുവദിച്ചിരിക്കുന്നത്.
അമേരിക്കയിൽ നടക്കുന്ന ഗർഭഛിദ്രങ്ങളിൽ ഭൂരിഭാഗവും മിഫിപ്രിസ്റ്റോൺ ഉൾപ്പെടെയുള്ള മരുന്നുകൾ ഉപയോഗിച്ചുള്ളതാണ്. 2022-ൽ ‘റോ വേഴ്സസ് വേഡ്’ വിധി റദ്ദാക്കപ്പെട്ടതിന് പിന്നാലെ വിവിധ സംസ്ഥാനങ്ങൾ ഏർപ്പെടുത്തിയ ഗർഭഛിദ്ര നിരോധനങ്ങളെ മറികടക്കാൻ ഇത്തരം മരുന്നുകളുടെ ലഭ്യത വലിയ തോതിൽ സഹായിച്ചിരുന്നു. എന്നാൽ മിഫിപ്രിസ്റ്റോണിന്റെ ലഭ്യത തങ്ങളുടെ സംസ്ഥാനത്തെ നിരോധന നിയമത്തെ അട്ടിമറിക്കുന്നു എന്ന് വാദിച്ചാണ് ലൂസിയാന ഇതിനെതിരെ കോടതിയെ സമീപിച്ചത്.
