ടെക്സസിലെ നോർത്ത് ടെക്സസ് ഡെന്റൺ കൗണ്ടിയിൽ കുടുംബാംഗങ്ങളെ കത്തിയുപയോഗിച്ച് ആക്രമിച്ചു കൊലപ്പെടുത്താൻ ശ്രമിച്ച മുപ്പത്തിയേഴുകാരിയായ ഹോളി ലീയെൻ ഫ്ലോറസ് എന്ന യുവതി പോലീസിന്റെ പിടിയിലായി. ചൊവ്വാഴ്ച പുലർച്ചെ 4.20ഓടെയാണ് ഈ ദാരുണമായ സംഭവം അരങ്ങേറിയത്. കുടുംബത്തിൽ വലിയ രീതിയിലുള്ള സുരക്ഷാ ആശങ്കകളും ഭീതിയും സൃഷ്ടിച്ച ഈ ആക്രമണത്തിന് പിന്നിൽ എന്താണെന്നുള്ള അന്വേഷണത്തിലാണ് അധികാരികൾ.
ഭാര്യ തന്റെ തലയിൽ കത്തികൊണ്ട് കുത്തിയെന്ന് വ്യക്തമാക്കി മുപ്പത്തിനാലുകാരനായ ഭർത്താവ് ജസ്റ്റിൻ തന്നെയാണ് അടിയന്തര സഹായത്തിനായി 911-ൽ പോലീസിൽ വിവരമറിയിച്ചത്. തുടർന്ന് നോർത്ലേക്ക് പോലീസ് ചീഫ് റോബർട്ട് ക്രോഫോർഡിന്റെ നേതൃത്വത്തിലുള്ള പോലീസ് സംഘം അതിവേഗം സ്ഥലത്തെത്തി പരിശോധന നടത്തുകയായിരുന്നു. വീടിനുള്ളിൽ നടത്തിയ ഈ പരിശോധനയിലാണ് നെഞ്ചിൽ ഗുരുതരമായി കുത്തേറ്റ നിലയിൽ മൂന്ന് വയസ്സുള്ള പെൺകുട്ടിയെയും പത്ത് മാസം മാത്രം പ്രായമുള്ള ആൺകുട്ടിയെയും പോലീസ് കണ്ടെത്തിയത്. ആക്രമണത്തിൽ പരിക്കേറ്റ കുഞ്ഞുങ്ങളെ ഉടൻ തന്നെ ആശുപത്രിയിൽ എത്തിച്ച് അടിയന്തര ചികിത്സ ലഭ്യമാക്കി.
