പുകവലിക്കുന്നവരെയല്ല, മറിച്ച് മറ്റുള്ളവരുടെ പുക ശ്വസിക്കേണ്ടി വരുന്നവരെയാണ് പുകയിലയുടെ ദൂഷ്യഫലങ്ങൾ ഏറെയും ബാധിക്കുന്നത്. ‘ലാൻസെറ്റ് പബ്ലിക് ഹെൽത്ത്’ പ്രസിദ്ധീകരിച്ച പഠനപ്രകാരം, കഴിഞ്ഞ മൂന്ന് പതിറ്റാണ്ടിനിടയിൽ ഇന്ത്യയിൽ പാസ്സീവ് സ്മോക്കിങ് അഥവാ സെക്കൻഡ് ഹാൻഡ് സ്മോക്ക് മൂലമുള്ള മരണനിരക്കിൽ 60 ശതമാനത്തോളം വർദ്ധനവാണ് ഉണ്ടായിരിക്കുന്നത്. ചൈന കഴിഞ്ഞാൽ പാസ്സീവ് സ്മോക്കിംഗിന് ഇരയാകുന്നവരുടെ എണ്ണത്തിൽ ലോകത്ത് രണ്ടാം സ്ഥാനത്താണ് ഇന്ത്യ. 1990-ൽ 2,17,700 ആയിരുന്ന മരണം 2023-ൽ എത്തിയപ്പോൾ 3,25,600 ആയി ഉയർന്നു. കൂടാതെ, പുകയുമായി സമ്പർക്കത്തിൽ വരുന്ന ഇന്ത്യക്കാരുടെ എണ്ണം 375 ദശലക്ഷത്തിൽ നിന്ന് 444 ദശലക്ഷമായി വർദ്ധിക്കുകയും ചെയ്തിട്ടുണ്ട്.
മറ്റുള്ളവർ വലിച്ചെറിയുന്ന പുക അറിയാതെ ശ്വസിക്കേണ്ടി വരുന്ന വ്യക്തികൾക്ക് അതിൽ യാതൊരു നിയന്ത്രണവുമില്ല. ഹൃദ്രോഗം, പക്ഷാഘാതം, ശ്വാസകോശാർബുദം, ക്രോണിക് ഒബ്സ്ട്രക്ടിവ് പൾമണറി ഡിസീസ് (COPD), സ്തനാർബുദം, ടൈപ്പ് 2 പ്രമേഹം, ആസ്ത്മ തുടങ്ങിയ ഗുരുതരമായ ആരോഗ്യപ്രശ്നങ്ങൾക്ക് പാസ്സീവ് സ്മോക്കിങ് കാരണമാകുന്നു. ശ്വാസകോശവും രോഗപ്രതിരോധ സംവിധാനങ്ങളും പൂർണ്ണമായി വളർച്ചയെത്താത്ത കുട്ടികളിലാണ് ഇതിന്റെ ദോഷഫലങ്ങൾ കൂടുതൽ ഗുരുതരമായി കണ്ടുവരുന്നത്. അകാലമരണത്തിനും വൈകല്യങ്ങൾക്കും പുറമെ, ആരോഗ്യകരമായ ജീവിത വർഷങ്ങൾ നഷ്ടപ്പെടുന്ന ‘ഡിസേബിലിറ്റി അഡ്ജസ്റ്റഡ് ലൈഫ് ഇയേഴ്സ്’ (DALY’s) കണക്കുകൾ പ്രകാരം 2023-ൽ ഇന്ത്യയിൽ മാത്രം 9.28 ദശലക്ഷം DALY’s-ന് പാസ്സീവ് സ്മോക്കിങ് കാരണമായിട്ടുണ്ട്.
പുകവലിക്കാരെ ബോധവൽക്കരിക്കുന്നതിനേക്കാൾ ഉപരിയായി, പുകയുമായുള്ള സമ്പർക്കം ഒഴിവാക്കാനുള്ള മുൻകരുതലുകളാണ് അടിയന്തരമായി സ്വീകരിക്കേണ്ടത്. വീടുകൾ, തൊഴിലിടങ്ങൾ, പൊതുസ്ഥലങ്ങൾ എന്നിവ പൂർണ്ണമായും പുകരഹിതമാക്കി മാറ്റുന്നത് വഴി കുട്ടികളെയും സ്ത്രീകളെയും വലിയ തോതിൽ സംരക്ഷിക്കാൻ സാധിക്കും. കർശനമായ പുകയില നിയന്ത്രണ നിയമങ്ങൾ നടപ്പിലാക്കുന്നതും പൊതുജനങ്ങളിൽ കൃത്യമായ അവബോധം സൃഷ്ടിക്കുന്നതും ദശലക്ഷക്കണക്കിന് ആളുകളെ ഹൃദ്രോഗം, കാൻസർ, അകാലമരണം തുടങ്ങിയ മാരക വിപത്തുകളിൽ നിന്ന് രക്ഷിക്കാൻ സഹായിക്കും.
