എഡ്മൺട്ടണിൽ ആവേശമായി ‘കേരള ഡേയ്സ് 2026′; മെയ് 30-ന് മലയാളി സാംസ്കാരിക മഹോത്സവം

എഡ്മൺട്ടൺ: കാനഡയിലെ എഡ്മൺട്ടണിലുള്ള മലയാളി സമൂഹത്തിന്റെ ഏറ്റവും വലിയ സാംസ്കാരിക മാമാങ്കമായ ‘കേരള ഡേയ്സ് 2026′ മെയ് 30-ന് അരങ്ങേറും. കേരളത്തിന്റെ സമ്പന്നമായ പാരമ്പര്യവും കലകളും രുചിവൈവിധ്യങ്ങളും ഒത്തുചേരുന്ന ഈ വിപുലമായ ആഘോഷത്തിന് നഗരം സാക്ഷ്യം വഹിക്കാനൊരുങ്ങുകയാണ്.

വൈവിധ്യമാർന്ന കലാപരിപാടികൾ, സംഗീതം, ആവേശകരമായ ഗ്രൂപ്പ് ഡാൻസ് മത്സരങ്ങൾ എന്നിവ കോർത്തിണക്കിക്കൊണ്ടുള്ള ഒരു വലിയ കലാവിരുന്നാണ് ഇവിടെ ഒരുങ്ങുന്നത്. കായിക പ്രേമികൾക്കായി പുരുഷന്മാർക്കും സ്ത്രീകൾക്കുമായി പ്രത്യേകം സംഘടിപ്പിക്കുന്ന വടംവലി മത്സരങ്ങൾ ആവേശം പകരും. പുതുതലമുറയുടെ സർഗ്ഗാത്മകത പ്രോത്സാഹിപ്പിക്കുന്നതിനായി പ്രത്യേക ‘റീൽസ്’ (Reels) മത്സരങ്ങളും ഇതിന്റെ ഭാഗമായി സംഘടിപ്പിച്ചിട്ടുണ്ട്. പരിപാടിക്ക് മാറ്റുകൂട്ടാനായി കേരളത്തിന്റെ തനതായ രുചികൾ ആസ്വദിക്കാൻ സാധിക്കുന്ന വിഭവസമൃദ്ധമായ ഭക്ഷണ സ്റ്റാളുകളും മേളയിൽ ഉടനീളം ലഭ്യമായിരിക്കും.

സമൂഹത്തോടുള്ള കടപ്പാട് രേഖപ്പെടുത്തുന്നതിനായി സംഘടിപ്പിക്കുന്ന “Giving Back to the Community” ക്യാമ്പെയ്‌നിന്റെ ഭാഗമായി, ആകെ 20,000 കാനഡിയൻഡോളർ വിലമതിക്കുന്ന ആകർഷകമായ സമ്മാനങ്ങളാണ് വിജയികളെയും പങ്കാളികളെയും കാത്തിരിക്കുന്നത്. സമൂഹ ഐക്യം ശക്തിപ്പെടുത്തുക എന്ന ലക്ഷ്യത്തോടെയാണ് ഈ വമ്പൻ സമ്മാനത്തുക സംഘാടകർ പ്രഖ്യാപിച്ചിരിക്കുന്നത്.

പ്രാദേശിക മലയാളി അസോസിയേഷനുകളും സ്പോർട്സ് ക്ലബ്ബുകളും കൈകോർത്താണ് ഈ വർഷത്തെ കേരള ഡേയ്സ് ഒരുക്കുന്നത്. കഴിഞ്ഞ വർഷം ആയിരക്കണക്കിന് ആളുകൾ പങ്കെടുത്തതിനാൽ, ഇത്തവണ അതിലും വലിയ ജനപങ്കാളിത്തമാണ് സംഘാടകർ പ്രതീക്ഷിക്കുന്നത്.

സ്ക്വാഡ് ലെൻസ് ഇവന്റ്‌സ് (Squad Lensevents) സംഘടിപ്പിക്കുന്ന ഈ വമ്പിച്ച പരിപാടി മെയ് 30-ന് ഹെറിറ്റേജ് പാർക്കിൽ (Heritage Park) വെച്ച് നടക്കുന്നു. പരിപാടിയെക്കുറിച്ചുള്ള കൂടുതൽ വിവരങ്ങൾക്കും രജിസ്ട്രേഷനുമായി www.squadlensevents.com എന്ന വെബ്സൈറ്റ് സന്ദർശിക്കാവുന്നതാണ്.

Executive Members