കനേഡിയൻ പാർലമെന്റംഗങ്ങൾക്ക് വെസ്റ്റ് ബാങ്കിലേക്കുള്ള പ്രവേശനം തടഞ്ഞ് ഇസ്രയേൽ. ചൊവ്വാഴ്ചയാണ് “കനേഡിയൻ മുസ്ലിം വോട്ട്” എന്ന സംഘടന സംഘടിപ്പിച്ച യാത്ര, ജോർദാൻ അതിർത്തിയിൽ വെച്ച് ഇസ്രയേൽ തടഞ്ഞത്. സംഘാടകർക്ക് ഇസ്രയേൽ ഭീകരസംഘടനയായി പ്രഖ്യാപിച്ച ‘ഇസ്ലാമിക് റിലീഫ് വേൾഡ് വൈഡ്’ എന്ന ഗ്രൂപ്പുമായി ബന്ധമുണ്ടെന്ന് ആരോപണം ഉന്നയിച്ചാണ് പ്രവേശനം തടഞ്ഞത്. ലിബറൽ, എൻഡിപി പാർട്ടികളിലെ ആറ് എംപിമാരാണ് സംഘത്തിലുണ്ടായിരുന്നത്.
പലസ്തീൻ അധികൃതരുമായി സഹായങ്ങളെയും പരിഷ്കരണങ്ങളെയും കുറിച്ച് ചർച്ച ചെയ്യാനും, പലായനം ചെയ്തവരുടെ ക്യാംപുകൾ സന്ദർശിക്കാനുമായിരുന്നു അവരുടെ യാത്രാ പദ്ധതി. എന്നാൽ, സന്ദർശകർ പൊതു സുരക്ഷയ്ക്ക് ഭീഷണിയാണെന്ന് സൂചിപ്പിക്കുന്ന ഫോമുകളിൽ ഒപ്പിടാൻ നിർദ്ദേശിച്ചപ്പോൾ, എംപിമാർ വിസമ്മതിച്ചതിനെത്തുടർന്നാണ് അവർക്ക് പ്രവേശനം നിഷേധിച്ചത്. അതേസമയം, പലസ്തീൻ അനുകൂല സംഘടനകൾ നടപടിയെ വിമർശിച്ച് രംഗത്തെത്തി. എന്നാൽ, എംപിമാരുടെ ഇസ്രയേൽ വിരുദ്ധ നിലപാട് കണക്കിലെടുത്ത് ഇസ്രയേലിന്റെ സുരക്ഷാ നടപടികളെ മറ്റു ചിലർ പിന്തുണച്ചു. സംഘം നിലവിൽ ജോർദാനിൽ തിരിച്ചെത്തി.
