അന്തരീക്ഷത്തിൽ ഈർപ്പത്തിന്‍റെ അളവ് കൂടുന്നതിനാൽ തെക്കൻ ക്യൂബെക്ക്, ഒൻ്റാരിയോ പ്രവിശ്യകളിൽ ഉഷ്ണതരംഗത്തിന് (Heat wave) സാധ്യതയുണ്ടെന്ന് ദേശീയ കാലാവസ്ഥാ വകുപ്പ് മുന്നറിയിപ്പ് നൽകി. ഉഷ്ണതരംഗത്തെ നേരിടാൻ ജനങ്ങൾ ആവശ്യമായ മുൻകരുതലുകൾ സ്വീകരിക്കണമെന്നും എൻവയൺമെൻ്റ് കാനഡ നിർദ്ദേശിച്ചു.

ഒൻ്റാരിയോയിലെ വിവിധ നഗരങ്ങളിൽ ഇന്നലെ മുതൽ കടുത്ത ചൂട് ആരംഭിച്ചിട്ടുണ്ട്. ചില പ്രദേശങ്ങളിൽ താപനില 36 ഡിഗ്രി സെൽഷ്യസ് വരെ ഉയർന്നേക്കുമെന്നും കാലാവസ്ഥാ ഏജൻസി പ്രവചിക്കുന്നു. അന്തരീക്ഷ ഈർപ്പം (Humidex) കൂടി കണക്കിലെടുക്കുമ്പോൾ ചൂട് 40 ഡിഗ്രിക്ക് മുകളിലായേക്കുമെന്നും റിപ്പോർട്ടുകൾ സൂചിപ്പിക്കുന്നു. ബുധനാഴ്ചയോടെ ഉഷ്ണതരംഗം മോൺട്രിയൽ ഉൾപ്പെടെയുള്ള ക്യൂബെക്കിന്‍റെ മറ്റ് ഭാഗങ്ങളിലേക്കും വ്യാപിക്കും. ശനിയാഴ്ച വരെ ഈ കടുത്ത ചൂട് തുടരാനാണ് സാധ്യത. ഉയർന്ന താപനില കടുത്ത ക്ഷീണത്തിനും സൂര്യാഘാതത്തിനും (Heat stroke) കാരണമായേക്കാം. പ്രത്യേകിച്ച് മുതിർന്ന പൗരന്മാർ, കുട്ടികൾ, ആരോഗ്യപ്രശ്നങ്ങളുള്ളവർ എന്നിവർ കൂടുതൽ ജാഗ്രത പാലിക്കണമെന്ന് കാലാവസ്ഥാ വകുപ്പ് അഭ്യർത്ഥിച്ചു.