മംഗലംഡാം കടപ്പാറയിലെ ചിറയത്ത് ജോസിന്റെ പറമ്പിൽ നിന്ന് കൂറ്റൻ കപ്പ വിളവെടുത്തത് നാട്ടുകാരിൽ കൗതുകമുണർത്തി. ഏകദേശം 35 കിലോഗ്രാം ഭാരമുള്ള വലിയൊരു കപ്പയാണ് ഇവിടെ നിന്ന് ലഭിച്ചത്. വീടിനോട് ചേർന്നുള്ള സ്ഥലത്ത് ആകെ 10 മൂട് കപ്പ മാത്രമാണ് ജോസ് വച്ചുപിടിപ്പിച്ചിരുന്നത്. ഇതിനുമുമ്പ് വിളവെടുത്ത ഓരോ മൂട്ടിൽ നിന്നും 25 മുതൽ 30 കിലോ വരെ കപ്പ ലഭിച്ചിരുന്നതായി ഇദ്ദേഹത്തിന്റെ കുടുംബാംഗങ്ങൾ വ്യക്തമാക്കുന്നു.
കപ്പയ്ക്ക് നല്ല വിളവ് ലഭിച്ചിരുന്നതിനാൽ ആവശ്യമനുസരിച്ച് ഒന്നോ രണ്ടോ കിഴങ്ങുകൾ മാത്രം മാന്തിയെടുത്ത് ഉപയോഗിക്കുകയായിരുന്നു പതിവ്. എന്നാൽ വീട്ടിൽ വിരുന്നെത്തിയ ബന്ധുക്കൾക്ക് കൊടുക്കാനായി ഒരു മൂട് പൂർണ്ണമായി പിഴുതെടുത്തപ്പോഴാണ് കണ്ടുനിന്നവരെയും അത്ഭുതപ്പെടുത്തിയ ഈ ഭീമൻ കപ്പ ലഭിക്കുന്നത്.
‘വേളാങ്കണ്ണി’ ഇനത്തിൽപ്പെട്ട, നല്ല മൂപ്പുള്ള കപ്പയുടെ തണ്ട് കഴിഞ്ഞ വർഷത്തെ കൃഷിയിൽ നിന്ന് ശേഖരിച്ച് നടുകയായിരുന്നു. മണ്ണ് നല്ലതുപോലെ ആഴത്തിൽ കൊത്തിയിളക്കി തടമെടുത്തു നട്ടു എന്നതല്ലാതെ യാതൊരുവിധ രാസവളങ്ങളും ഇതിനായി ഉപയോഗിച്ചിട്ടില്ലെന്ന് ജോസ് പറയുന്നു. പൂർണ്ണമായും ജൈവരീതിയിലാണ് ഈ മികച്ച വിളവ് അദ്ദേഹം കൊയ്തെടുത്തത്.
