എഡ്മന്റൺ: ഇന്റർനാഷണൽ വർക്ക് പെർമിറ്റുള്ള വിദേശ തൊഴിലാളികൾക്ക് നൽകിവന്നിരുന്ന സർക്കാർ ആരോഗ്യ പരിരക്ഷ (Health Care Coverage) നിർത്തലാക്കാനുള്ള വിവാദ തീരുമാനം ആൽബർട്ട സർക്കാർ താൽക്കാലികമായി മരവിപ്പിച്ചു. ജനുവരി 7-ന് നിലവിൽ വന്ന ഈ പുതിയ പരിഷ്കാരം വൻ പ്രതിഷേധങ്ങൾക്കും ആശങ്കകൾക്കും വഴിതെളിച്ച പശ്ചാത്തലത്തിലാണ് സർക്കാരിന്റെ പിൻവാങ്ങൽ. നയം പുനഃപരിശോധിക്കുമെന്നും അതുവരെ നിലവിലുള്ള ആനുകൂല്യങ്ങൾ തുടരുമെന്നും സർക്കാർ വക്താവ് അറിയിച്ചു.
പ്രധാനമായും ‘ടൈപ്പ് 58’ വിഭാഗത്തിൽപ്പെട്ട ഇന്റർനാഷണൽ എക്സ്പീരിയൻസ് കാനഡ (IEC) വർക്ക് പെർമിറ്റുള്ളവരെയാണ് ഈ നയം ബാധിച്ചിരുന്നത്. വിനോദസഞ്ചാര മേഖലകളിൽ ജോലി ചെയ്യുന്ന നൂറുകണക്കിന് യുവാക്കളെയും സീസണൽ തൊഴിലാളികളെയും ഇത് പ്രതിസന്ധിയിലാക്കിയിരുന്നു. ഈ വിഭാഗത്തിലുള്ളവർക്ക് സ്വകാര്യ ഇൻഷുറൻസ് നിർബന്ധമാണെന്നും അതിനാൽ സർക്കാർ പരിരക്ഷ ആവശ്യമില്ലെന്നുമായിരുന്നു ആദ്യത്തെ വാദം. എന്നാൽ, നികുതി അടച്ച് ജോലി ചെയ്യുന്ന തങ്ങളെ പൊതുജനാരോഗ്യ സംവിധാനത്തിൽ നിന്ന് ഒഴിവാക്കുന്നത് വിവേചനമാണെന്ന് തൊഴിലാളികൾ ചൂണ്ടിക്കാട്ടി.
ബാഫ്, ലേക്ക് ലൂയിസ് തുടങ്ങിയ ടൂറിസം കേന്ദ്രങ്ങളിലെ ബിസിനസ് ഉടമകളും സർക്കാരിന്റെ നീക്കത്തിനെതിരെ രംഗത്തെത്തിയിരുന്നു. തൊഴിലാളികൾക്ക് ആരോഗ്യ പരിരക്ഷ ഇല്ലാതാകുന്നത് പ്രാദേശിക സമ്പദ്വ്യവസ്ഥയെയും തൊഴിൽ മേഖലയെയും ദോഷകരമായി ബാധിക്കുമെന്ന് ഇവർ മുന്നറിയിപ്പ് നൽകി. തീരുമാനം മരവിപ്പിച്ചതിനെ ഇമിഗ്രേഷൻ ഗ്രൂപ്പുകൾ സ്വാഗതം ചെയ്തെങ്കിലും, വരാനിരിക്കുന്ന സീസണിലെ നിയമനങ്ങളെക്കുറിച്ച് വ്യക്തത വേണമെന്ന് ഇവർ ആവശ്യപ്പെട്ടു. കൂടുതൽ പഠനങ്ങൾക്ക് ശേഷം മാത്രമേ നയത്തിൽ അന്തിമ മാറ്റം വരുത്തുകയുള്ളൂവെന്ന് പ്രൈമറി ആൻഡ് പ്രിവന്റീവ് ഹെൽത്ത് മന്ത്രാലയം വ്യക്തമാക്കി.
