വത്തിക്കാൻ സിറ്റി : കത്തോലിക്കാ സഭയുടെ ചരിത്രത്തിൽ പുതിയൊരു അധ്യായം കുറിച്ച്, വത്തിക്കാന്‍റെ വാർത്താവിനിമയ വിഭാഗമായ ഡിക്കാസ്റ്ററി ഫോർ കമ്മ്യൂണിക്കേഷൻ പ്രിഫെക്ടായി മെക്സിക്കൻ-അമേരിക്കൻ മാധ്യമപ്രവർത്തക മരിയ മോൺസെറാത്ത് (മോൺസെ) അൽവരാഡോ ചുമതലയേറ്റു. ലെയോ പതിനാലാമൻ മാർപാപ്പ നടത്തിയ നിയമനം നവംബർ 1 മുതൽ പ്രാബല്യത്തിൽ വന്നു. ഈ പദവിയിലെത്തുന്ന ആദ്യ വനിതയും ആദ്യ അൽമായ വനിതയും ഇറ്റലിക്കാരിയല്ലാത്ത ആദ്യ വ്യക്തിയുമാണ് മരിയ. മുൻ പ്രിഫെക്ട് പൗലോ റുഫീനിയുടെ പിൻഗാമിയായാണ് അൽവരാഡോ ചുമതലയേറ്റത്.
വത്തിക്കാൻ ന്യൂസ്, വത്തിക്കാൻ റേഡിയോ, ദിനപത്രമായ L’Osservatore Romano, ഹോളി സീ പ്രസ് ഓഫീസ്, പ്രസിദ്ധീകരണ-അച്ചടി വിഭാഗങ്ങൾ തുടങ്ങിയവയുടെ പ്രവർത്തനങ്ങൾ ഏകോപിപ്പിക്കുന്ന സുപ്രധാന ഉത്തരവാദിത്വമാണ് പുതിയ പ്രിഫെക്ടിനുള്ളത്. വിവിധ ഭാഷകളിലൂടെയും ആധുനിക ഡിജിറ്റൽ മാധ്യമങ്ങളിലൂടെയും സഭയുടെ സന്ദേശം ലോകമെമ്പാടുമുള്ള ജനങ്ങളിലേക്ക് എത്തിക്കുക എന്നതാണ് ഈ വിഭാഗത്തിന്‍റെ പ്രധാന ദൗത്യം.
1986-ൽ മെക്സിക്കോ സിറ്റിയിൽ ജനിച്ച അൽവരാഡോ ബാല്യത്തിൽ അമേരിക്കയിലേക്ക് കുടിയേറി. ഫ്ലോറിഡ ഇന്‍റർനാഷണൽ യൂണിവേഴ്സിറ്റിയിൽ നിന്ന് ബിരുദവും ജോർജ് വാഷിങ്ടൺ യൂണിവേഴ്സിറ്റിയിൽ നിന്ന് ബിരുദാനന്തര ബിരുദവും നേടി. മതസ്വാതന്ത്ര്യ സംരക്ഷണത്തിനായി പ്രവർത്തിക്കുന്ന അമേരിക്കയിലെ പ്രമുഖ നിയമസംഘടനയായ ബെക്കറ്റ് ഫണ്ട് ഫോർ റിലീജിയസ് ലിബർട്ടിയിൽ ഒരു ദശാബ്ദത്തിലേറെ വിവിധ നേതൃത്വസ്ഥാനങ്ങളിൽ സേവനമനുഷ്ഠിച്ചു.
2021-ൽ ആഗോള കത്തോലിക്കാ മാധ്യമശൃംഖലയായ EWTN-ൽ ചേർന്ന മരിയ വാർത്താ അവതാരകയായും EWTN News In Depth പരിപാടിയുടെ അവതാരകയായും ശ്രദ്ധ നേടി. 2023-ൽ EWTN News-ന്‍റെ പ്രസിഡന്റും ചീഫ് ഓപ്പറേറ്റിംഗ് ഓഫീസറുമായി നിയമിതയായി. അന്താരാഷ്ട്ര ടെലിവിഷൻ, അച്ചടി, ഡിജിറ്റൽ മാധ്യമ പ്രവർത്തനങ്ങൾക്ക് നേതൃത്വം നൽകിയ വിപുലമായ പരിചയവും അവർക്കുണ്ട്.
