വന്‍കൂവര്‍ : ബ്രിട്ടിഷ് കൊളംബിയ ചില്ലിവാക്കില്‍ ചെറു വിമാനം തകര്‍ന്ന് രണ്ടു പേര്‍ മരിച്ചു. ശനിയാഴ്ച ഉച്ചകഴിഞ്ഞ് മൂന്നരയോടെ ചില്ലിവാക്ക് തടാകത്തിന് സമീപമാണ് അപകടമുണ്ടായത്. പ്രദേശത്ത് നടത്തിയ തിരച്ചിലില്‍ തകര്‍ന്ന നിലയില്‍ സെസ്ന 172 ചെറുവിമാനം കണ്ടെത്തിയതായി ചില്ലിവാക്ക് ആര്‍സിഎംപി അറിയിച്ചു.
അപകടത്തില്‍ വിമാനത്തിലുണ്ടായിരുന്ന രണ്ടു പേര്‍ മരിച്ചതായി അധികൃതര്‍ സ്ഥിരീകരിച്ചു. മരിച്ചവരെ കുറിച്ച് കൂടുതല്‍ വിവരമൊന്നും ലഭിച്ചിട്ടില്ല. അപകടത്തിന് ഒരു മണിക്കൂര്‍ മുമ്പ് രണ്ടരയോടെ വിമാനത്തില്‍ നിന്ന് ”എമര്‍ജന്‍സി ലൊക്കേറ്റര്‍ ട്രാന്‍സ്മിറ്റര്‍ സിഗ്‌നല്‍” ലഭിച്ചതായി ജെആര്‍സിസി അറിയിച്ചു. തുടര്‍ന്ന് ഫ്‌ലൈറ്റ് ട്രാക്കിങ് സോഫ്റ്റ്വെയറിലൂടെ കോണ്‍ടാക്റ്റ് നഷ്ടപ്പെട്ടതിനെത്തുടര്‍ന്ന് വിമാനം കാണാതായതായി റിപ്പോര്‍ട്ട് ചെയ്തതായും അധികൃതര്‍ പറഞ്ഞു. സംഭവത്തില്‍ ട്രാന്‍സ്പോര്‍ട്ടേഷന്‍ സേഫ്റ്റി ബോര്‍ഡ് ഓഫ് കാനഡ അന്വേഷണം ആരംഭിച്ചു.
