ബിഹാറിലെ ജൻസേവ എക്സ്പ്രസ് ട്രെയിനിന്റെ ജനറൽ കോച്ചിൽ പാമ്പുകളെ കാണിച്ച് യാത്രക്കാരിൽ നിന്ന് പണം പിരിച്ച ആറ് പേരെ ആർ.പി.എഫ്. (റെയിൽവേ പ്രൊട്ടക്ഷൻ ഫോഴ്സ്) പിടികൂടി. റെയിൽവേയുടെ ‘റെയിൽമദദ്’ ആപ്പ് വഴി ലഭിച്ച പരാതിയെ തുടർന്ന് ദീഘ്‌വാര സ്റ്റേഷനിൽ വെച്ചാണ് ഇവരെ ട്രെയിനിൽ നിന്ന് പുറത്തിറക്കിയത്. കിഴക്കൻ സെൻട്രൽ റെയിൽവേയുടെ സോൺപൂർ ഡിവിഷന് കീഴിലുള്ള 14618 നമ്പർ ജൻസേവ എക്സ്പ്രസിലാണ് സംഭവം നടന്നത്.
റെയിൽമദദ് വഴി ലഭിച്ച വിവരത്തെ തുടർന്ന് സോൺപൂർ ഔട്ട്‌പോസ്റ്റിലെ സബ് ഇൻസ്പെക്ടർ ഷംഷേർ കുമാർ, അസിസ്റ്റന്റ് സബ് ഇൻസ്പെക്ടർ വിജയ് കുമാർ എന്നിവരടങ്ങുന്ന ആർ.പി.എഫ്. സംഘം ട്രെയിൻ നിരീക്ഷിക്കുന്നുണ്ടായിരുന്നു. ചാപ്രാ സ്റ്റേഷൻ വിട്ടയുടനെ ആർ.പി.എഫ്. സംഘം ജനറൽ കോച്ചുകളിൽ നടത്തിയ പരിശോധനയിലാണ് യാത്രക്കാരുടെ ഇടയിൽ പാമ്പുകളെ കാണിച്ച് പണം ആവശ്യപ്പെട്ട ആറ് പേരെ കണ്ടെത്തിയത്.
ട്രെയിനിന്റെ അടുത്ത സ്റ്റേഷനായ ദീഘ്‌‌വാരയിൽ വെച്ച് ആറ് പേരെയും ട്രെയിനിൽ നിന്ന് താഴെയിറക്കിയതായി കിഴക്കൻ സെൻട്രൽ റെയിൽവേ ചീഫ് പബ്ലിക് റിലേഷൻസ് ഓഫീസർ അറിയിച്ചു. ചോദ്യം ചെയ്യലിൽ ഇവർ കൃത്യമായ പേരും വിലാസവും നൽകിയിട്ടില്ലെന്നും ലക്നൗ, ഹിമാചൽ പ്രദേശ് എന്നിങ്ങനെ വിവിധ വിലാസങ്ങളാണ് പറഞ്ഞതെന്നും ഉദ്യോഗസ്ഥർ വ്യക്തമാക്കി. തുടർനടപടികൾക്കായി വിഷയം വനംവകുപ്പിന്റെ ശ്രദ്ധയിൽപ്പെടുത്തിയിട്ടുണ്ട്.
ട്രെയിനുകളിൽ പാമ്പുകളെ കാണിച്ച് പണം പിരിക്കുന്നത് നിയമവിരുദ്ധമാണെന്ന് റെയിൽവേ ആവർത്തിച്ചു വ്യക്തമാക്കി. ഇത്തരം പ്രവർത്തനങ്ങൾ ശ്രദ്ധയിൽപ്പെട്ടാൽ യാത്രക്കാർ എത്രയും പെട്ടെന്ന് അധികൃതരെ വിവരം അറിയിക്കണമെന്നും റെയിൽവേ അധികൃതർ അഭ്യർത്ഥിച്ചു.
