ടെക്സസ് : റിപ്പബ്ലിക്കന്‍ പാര്‍ട്ടിയുടെ ശക്തികേന്ദ്രമായ ടെക്സസിൽ ചരിത്ര നേട്ടം കൈവരിച്ച് ഡെമോക്രാറ്റ് പാർട്ടി. റിപ്പബ്ലിക്കന്‍ പാര്‍ട്ടി 38 വര്‍ഷങ്ങളായി കൈവശം വെച്ചിരുന്ന സെനറ്റ് സീറ്റിൽ ഡെമോക്രാറ്റ് സ്ഥാനാര്‍ത്ഥി ജെയിംസ് തലറിക്കോ മിന്നുന്ന വിജയം സ്വന്തമാക്കി. ലോകത്തിലെ ഏറ്റവും ധനികനായ വ്യക്തിയുടെ നേതൃത്വത്തില്‍ 168 ദശലക്ഷം ഡോളര്‍ ചെലവഴിച്ച് നടത്തിയ പ്രചാരണത്തെ അതിജീവിച്ച ജെയിംസ് തലറിക്കോ അസാധാരണ വിജയമാണ് കൈവരിച്ചത്. ഡോണൾഡ് ട്രംപ് മൂന്ന് തവണ വ്യക്തമായ ഭൂരിപക്ഷത്തോടെ വിജയിച്ച ഈ സംസ്ഥാനത്ത് ‘മാഗ’ (MAGA) പ്രസ്ഥാനത്തിന് ശക്തമായ തിരിച്ചടിയായിരിക്കുകയാണ് ജെയിംസ് തലറിക്കോയുടെ വിജയം.
സംസ്ഥാന നിയമസഭാംഗമായ തലറിക്കോ, ട്രംപിന്‍റെ അടുത്ത അനുയായിയായ സ്റ്റേറ്റ് അറ്റോര്‍ണി ജനറല്‍ കെന്‍ പാക്സ്റ്റനെയാണ് പരാജയപ്പെടുത്തിയത്. തന്‍റെ പാര്‍ട്ടിക്ക് വര്‍ഷങ്ങളായി വിജയിക്കാന്‍ കഴിയാതിരുന്ന ടെക്സസിൽ, സമ്പന്നരും ദരിദ്രരും തമ്മിലുള്ള അന്തരം, അഴിമതി തുടങ്ങിയ വിഷയങ്ങള്‍ ഉയര്‍ത്തിക്കാട്ടിയുള്ള തലറിക്കോയുടെ പ്രചാരണം ദേശീയ തലത്തില്‍ ശ്രദ്ധ നേടിയിരുന്നു.
