ചൂടും തെളിഞ്ഞതുമായ കാലാവസ്ഥയിൽ നിന്നും മധ്യ, തെക്കൻ, കിഴക്കൻ ആൽബർട്ടയുടെ ഭൂരിഭാഗം പ്രദേശങ്ങളിലും വെള്ളിയാഴ്ച മുതൽ തണുത്ത കാലാവസ്ഥയിലേക്ക് മാറുമെന്ന് സൂചന. വെള്ളിയാഴ്ച മുതൽ എഡ്മിന്‍റനിലും മധ്യ, വടക്കൻ ആൽബർട്ടയുടെ ഭൂരിഭാഗം പ്രദേശങ്ങളിലും പകൽ താപനില കുറയും. നിലവിൽ 15 ഡിഗ്രി സെൽഷ്യസിനോടടുത്തുള്ള താപനില, പൂജ്യം ഡിഗ്രിയിലേക്ക് താഴുമെന്ന് കാലാവസ്ഥാ ഏജൻസി പ്രവചിക്കുന്നു. പ്രവിശ്യയുടെ മിക്ക ഭാഗങ്ങളിലും മഴ, മഞ്ഞുവീഴ്ച, ശക്തമായ കാറ്റ് എന്നിവയുൾപ്പെടെയുള്ള മോശം കാലാവസ്ഥയ്ക്ക് സാധ്യതയുണ്ട്. പ്രവിശ്യയുടെ മിക്ക ഭാഗങ്ങളിലും ശക്തമായ കാറ്റും മഴയും മഞ്ഞുവീഴ്ചയും അനുഭവപ്പെടുമെന്നതിനാൽ യാത്രക്ക് ഒരുങ്ങുന്നവർ കാലാവസ്ഥയും റോഡ് സാഹചര്യങ്ങളും ശ്രദ്ധിക്കണം.

എഡ്മിന്‍റൻ മേഖലയിൽ വെള്ളിയാഴ്ച മണിക്കൂറിൽ 40 മുതൽ 60 കിലോമീറ്റർ വരെ വേഗത്തിൽ കാറ്റ് വീശും. അതേസമയം മധ്യ, വടക്ക്-മധ്യ ആൽബർട്ടയുടെ ചില ഭാഗങ്ങളിൽ കാറ്റിന്‍റെ വേഗം മണിക്കൂറിൽ 80 കിലോമീറ്റർ വരെയാകാനും സാധ്യതയുണ്ട്. വടക്കുകിഴക്കൻ ആൽബർട്ടയിൽ വെള്ളിയാഴ്ച രാത്രിയും ശനിയാഴ്ച പുലർച്ചെയുമായി ഏതാനും സെൻ്റീമീറ്റർ കനത്തിൽ മഞ്ഞുവീഴ്ചയുണ്ടാകാൻ സാധ്യതയുണ്ടെന്നും കാലാവസ്ഥാ വകുപ്പ് പ്രവചിക്കുന്നു. വാരാന്ത്യത്തിലും അടുത്ത ആഴ്ചയിലുടനീളവും പകൽ സമയത്തെ താപനില 1 മുതൽ 5 ഡിഗ്രി സെൽഷ്യസ് വരെയായിരിക്കും.